ni 21.12.2017 (ningani)

YMA TEN KAWNG SIAM :

Nimin khan Khawbung Branch YMA huaihawtin Tuipuiral khaw tam zawk zin kawng ‘Tuipui kawng’ chu a chhiat leh khuar nasat tawh avangin hnatlangin an siam tha.

Khawbung leh Tuipui inkar kawng hi Champhai-North Vanlaiphai, CNV Road tia sawi thin a ni a. Siam a nih hnu kum 20 hnuah pawh siam that a la ni lova, Tuipuiral khaw tam zawk zin kawng niin, Tuipuiral tlangdunga hmun hlui leh hmun pawimawh tlawh khualzin tam tak kalna a ni a. Khualzinte tan chetsual palh leh lithei sawhchhiat mai hlauhawm khawpa kawngpui hi khuar khawkrawk a nih avangin Khawbung Branch YMA-te’n hnatlangpui kovin vawiin khan an siam tha a ni.

Hnatlangah hian mimal JCB 2, Tripper 3, Pick-up 2 leh lirthei dang engemaw zat an an thawk chhuak a. Mihring 100 chuang zet an hnatlang bawk a ni. Bialtu MLA Pu T Sangkunga’n hnatlang chet lakna hrang hranga hman tur Rs 10000/- a pe a. Hnatlang thingpui lumna atan

Er Lalrinkima, EE, Power Construction Division, Tlawva Hydel Project, Er Vanlaldika EE, PWD, Champhai Circle, Pu Lalbiakfela BDO, Khawbung RD Block leh mimal thahnemngai engemaw zatin sumfai an thawh bawk a ni.

Khawbung Branch YMA President Pu H.Lalniliana chuan, “Sawrkar emaw, Department emaw demna avanga hnatlang an ni loh thu sawiin, khualzin tam takte nuamsa zawk leh him zawka an zin theih nan leh lirthei

neitute tan kawngchhiain lirthei a zawh chhiat mai lohna atan mipui hmangaia he ruahmanna hi siam an nih thu a sawi.

FAINA KAWNGZAWH:

India ram pum huapa khawpui fai inelna, Swachh Survekshan 2018 neih tur atana inbuatsaihna kal mekah Khawzawl Sanitation Task Force bultumin Khawzawlah Faina kawngzawh, Walkathon neih a ni.

Nimin dar 6:30 khan Taidawnkawnah Walkathon neih hma hian inkhawm tawi buatsaih a ni a, hetah hian BDO Pu Lalremruata Sailo, Khawzawl Sanitation Task Force Chairman ni bawkin Swachh Survekshan 2018 neih tur atana Khawzawl khawpui inpuahchah dan sawiin mipuiten fai duh tak takna thinlung an put theihna tura infuihnan kawngzawh hi buatsaih a ni tih a sawi a. Taidawnkawn atang hian kawngzawh tanin Chhumliamkawn thleng an zawh a. Chhumliamkawnah hian hun tawp a ni a, Brand Ambassador Pu B. Lalzethanga’n fuihna thu sawiin Pu C. Lalhumhima, Member Secretary, Sanitation Task Force in lawmthu sawina a nei a ni.

Swachh Survekshan 2018 hmachhawn tura Khawzawl a inbuatsaihna kal mekah tunhnai khan veng, zirna in, pisa leh Hotel/Restaurant fai thlanna neih a lo ni tawh a, Result hi Thawhtanni kalta khan puangin hemi rual hian Khawzawl Field No. 1 leh Taidawnkawn inkar chu bawlhhlawh paih phal lohna hmun-ah puan a ni a. Hei bakah hian Khawzawl khawchhung hmun hrang hrangah Sawrkar Department hrang hrangte tangrualin an siamtir, Bawlhhlawh bawm 20 dah niin veng tam takah VC ten bawlhhlawh bawm an dah bawk a, mumal zawk a bawlhhlawh paih dan pawh kalpui chhovin vantlang inthiarna hmun te chei that a ni bawk a. Khawzawl Vengthar Bazar leh Zaingen Bazar te pawh bawlhhlawh leh hnawmhnawk awm lohna hmuna siam tumin hmalak mek a ni.

KHAR TA:

Nimin khan Champhai District Badminton Association Coaching Staff te buatsaih Junior & Sub Junior Badminton Tournament 2017 chu kharna hun hman niin Final khelh a ni.
Kharna inkhawm hi Pu Paul Zakhuma, Coaching Staff chuan kaihruaiin Tv Jerry Zodinthara Coach, CDBA Academy chuan report a pe bawk.
Pu Lalnunmawia, President CDBA chuan thusawiin hetianga Champhai tleirawl leh rawlthar te tana ngaihtuahna senga, hma an sawn theihna tura tournament buatsaih nachang hria Coaching Staff kan nei hi a lawmawm hle a ni a ti. Pu Lalnunmawia chuan Badminton khelh hi zirlai te tan a thabik em em a, kan ngaihtuahna kan tihfimna ha tak a ni a ti a, lehkha kan zirna kawngah ngaihtuahna fim tak min neih tir thin a ni a ti. Badminton ah hlawhtlinna nei tur chuan a hmasa berah Pathian thu awih a ngai a ni a ti a, vaihlo kaihhnawih tih ruk ching chu a chau hma em em thin a, hlawhtlinna sang tak an nei thei ngai lo a ni a ti a, vaihlo leh a kaihhnawih, ruihhlo lam chi reng reng atanga inthiar fihlim tlat turin a chah a, Pathian thusawih tlat a, ruihhlo lakah kan fihlim reng chuan Badminton leh kan zirna kawngah hian chawimawi tlakin hlawhtlinna san tak kan nei dawn a ni a ti.
Pu Lalnunmawia hian Coaching kal te hnenah certificate a hlan nghal a, Coaching a kal naupang nu leh pa kal te leh Pu H. Rothangliana, Sr. Vice President, CDBA te hnen atangin thusawi ngaihthlak a ni bawk.
Kharna inkhawm tawi neih zawh ah Under 11 Girls, Under 11 Boys, Under 15 Boys  leh Under 19 Boys Single ah te Final khelh chhunzawm a ni a, Under 11 Girls ah JK Vanlalmalsawmi leh Zoramthani te an intum a, Zoramthani chuan 15-13, 9-15, 15_10 in a chak a. 11 Boys ah hian F. Vanlalrohlua leh Rochanpuia te inkhel in F. Vanlalthanhlua chuan 15-5, 15-3 in hnehna a chang a. Under 15 Girls ah F. Zoramsangi leh Rodinsangi te inkhelin F. Zoramsangi chuan 21-17, 21-19 in hnehna a chang bawk. Under 15 Boys ah Zothansanga leh Saihmingmawia Sailo te inkhelin Zothansanga chuan hnehna changin a Champion a, Under 19 Boys ah JH Roluahpuia leh Rotluangapuia te an inkhel a, JH Roluahpuia chuan hnehna changin a Champion ve bawk.
Final match khelh zawh ah Exibition Match neih chhunzawm a ni a, CS Lalronguraz Asst. Coach, CDBA Academy leh Lalrinchhana, Student, Assam Badminton Association Academy, Guwahati te chu an inkhel a, tlai ah chawhlui an kilho nghal a ni.

RUANG DAHNA CHEI THA:

Champhai District Hospital tuala mitthi ruang dahlawkna Bukte chu Vengsang Branch YMA Neuva Section-ten cheitha-in niminpiah khan an hnatlang.
Mitthi ruang dahlakna Bukte hi a rawp deuh tawh avangin a chung leh a bang chak thenkhat an thlak a, Bukte chung leh a bang Rangva thenkhat pawh an thlak nghal a. Neuva Section YMA member engemawzat thawk chhuakin,  nimin khan tih tur angte an zofel nghal a. Mitthi ruang dahlawkna Bukte cheithat nan hian Cheng sangnga chuang an sen thu Section YMA hruaitute hnen atangin dawn a ni.
District Hospital a Mitthi ruang dahlawkna bukt hi damlo kantute leh enkawltute chawlh nan tangkai taka hman anih bawk vangin, Bengvar chhuah a Vengsang Branch YMA Neuva Section te remhriatna leh inpekna-ah District Hospital a thawktute an lawm hle.

VENGLAI BRANCH ZANINAH VAR DAWN :

Venglai Branch Kristian Thalai Pawlte chuan mi harsa te pualin THINGTHLAVAR ZAN an hmang dawn.
Venglai Branch Kristian Thalai Pawl te chuan Krismas lo thleng tur hi chhungkaw thenkhat chuan huphurh takin an lo hmuak thin a, chu chu tihboa a awm theihna atan zanin zan Dar 7 ah Live Concert neiin THINGTHLAVAR ZAN an hmang dawn a, he hunah hian Mizoram zaithiam lar Zoramchhani leh Vengthlang Branch Diamond Jubilee Beat Contest a pathumna Former Glory te an inlan dawn bakah Champhai zaimite engemaw zat te chu mi harsa zawkte tan an zai dawn a, fak lam en tur a awm dawn bawk a ni.

THINGTHLAVAR ZAN hi Venglai Venglai Secondary School chhakah zanin Dar 7 hian neih tur niin Organising Committee chuan Champhai mipuite he hunah hian kal theuh tur leh Mi harsa zawkte tana malsawmna ni theuh turin an sawm a, a hmunah hian mi harsa te pualin bawm dawh a ni ang.

Kahrawt Branch KṬP te chuan zanin hian Dawrkaikawnah Concert an nei bawk dawn a.

He hun hmang tur hian sawm vek kan ni e. 

ZONE 3 ṬHIAT :

Nimin tlai khan Champhai District Football Association chuan meeting neiin Zone 3 an ṭhiat.
He meeting Pu C Hualrikhuma CDFA President kaihhruaiah hian CDFA Genenral body meeting in executive a rel tura a dah angin CDFA hnuaia zone function lo Khawbung Zone, Farkawn Zone leh Ngopa Zone te chu thiah an ni. Heng bakah hian kum 2017 chhunga CDFA hmalakna hrang hrang thlir let anih bakah kum 2018 a CDFA hmalak dan turte ruahman a ni bawk.

Meeting zawhah hian CDFA academy leh Grassroot training  kharna hun ñeih ni bawk CDFA Academy ah hian Kum 15-18 naupang 50 an training a, Grassroot ah hian naupang 60 an training mek bawk.

ṬANPUINA HLAN DAWN :

Vawiin hian Champhai District MJA te chuan a hrahpa a Advance Krismas hmangloin an senso te chu Home hrang hrang bakah District Hospital Poor Fund ah pek nise an tih ang hun an hmang dawn. 

Tanpuina an hlan turte chu : District Hospital, Methakhen, Genesaret, TNT, Grace Receiver leh Emmanuel After Care