ni 15.11.2017 (nilaini)

DC HOVIN THLIRLETNA HUN HMANG:

Nimin khan Champhai DC Conference Hall Keifangtlangah Champhai District Consultative Committee chu Chairman Champhai DC charge la mektu Pu Pachhunga, Sub-Divisional Officer (Sadar) kaihhruaina hnuaiah neih a ni. He hunah hian NABARD buatsaih Potential Linked Credit Plan (2018-19) Champhai District tih chu tlangzarh nghal a ni.

He Meeting ah hian Pu SP Sarmah, Chief Manager, SBI Lead Bank Office Champhai chuan kalkhawm te lawmna thu a sawi a. Bank Manager te hnen atangin Digital Payment chungchanga an hmalakna leh thawh dan hrang hrangte report ngaihthlak a ni a. Champhai District huam chhunga Bank hrang hrangte September Quarter tawp thlenga an hnathawh  dan (Performance review) thlir hona neih a ni a. Meeting chuan September ni 30 thlenga Champhai District a Bank hrang hrangte Credit Deposit (CD) ratio chu za zela 57.52 a nih thu  tarlangin hei hian CD Ratio bituk za zela  60 chu a phak lo  a ni. Hemi bakah hian Priority Sector tana loan pekchhuah chu za zela 68.96 niin hei hian bituk za zela  40 chu  a khum a ni. Agricultural Segment hnuaia loan pekchhuah zat chu za zela 19.84 a ni a, hei hian bituk zat za zela 18 chu a khum a ni. Thingtlang/Zokhaw mite tana bank hman dan  inzirtirna tum 15 neih niin hemi hmang hian mi 1,192 te chu zirtirna pek an ni a. Second quarter tawp September thlenga ACP achievement chu za zela 33 a ni bawk a. Education Loan engmah pekchhuah a nilo a, Housing loan 58 pekchhuah a ni a. Pradhan Mantri Mudra Yojana (PMMY) hnuaiah loan mi 533 hnenah cheng nuai 707.61 hu pekchhuah a ni a. Stand up India Scheme kaltlangin mi 29 te hnenah tanpuina loan cheng nuai 378.88 pek chhuah a ni tawh bawk a ni. Social Security Scheme hnuaiah hamthatna bank kaltlanga pek niin Pradhan Mantri Suraksha Bima Yojana (PMSBY) hnuaiah mi 6,737; Pradhan Mantri Jeevan Jyoti Bima Yojana (PMJJBY) hnuaiah mi 3,636 leh Atal Pension Yojana ( APY) hnuaiah mi 57 te  pek an ni. Heng bakah hian Bank Security chungchangte pawh sawiho a ni bawk a. Tun dinhmunah Champhai District-ah Bank hrang hrang branch 22 a awm mek a, hei hi mi 5,715 in Branch 1 intawm ang vel a ni (Mizoram pum ah chuan mi 5486 in Branch 1 intawm ang an ni). Hemi bakah hian ATM 10 a awm bawk a ni.

Meeting chuan thingtlang leh hmun kilkhawr zawka mi tena Bank kalphung, loan lak leh sum peipun dan chungchang a hriatzau leh zirtirna pek a pawimawh thu a sawi bawk a. Bank ho ina Sawrkar Scheme hrang hrang heng PMEGP, DAY_NULM (SEP), MzSRLM te an kalpui dan chu thlirletna neih a ni bawka, MGNREGS beneficiary te tan Aadhaar leh Bank Account thlunzawm pawimawh thu te pawh sawiho a ni.

Meeting-ah hian line dapartment hrang hrang aiawhte, AMFU aiawh leh Champhai District huam chhunga Bank hrang hranga hnuaia Branch Manager-te leh thawktute an tel tha hle a ni. Meeting zawh hian chawhnu lamah NABARD buatsaihin Self Help Group (SHG) din leh kal dan phunga thawktute zirtirna leh inhrilhhriatna hun hman nghal a ni bawk a ni.

 NAUPANGTE NI HMANG :

Nimin khan India ram hmun dang rualin Champhai-ah pawh National Children’s Day chu Venglai Community Hall ah hman a ni a. Addl. District & Session Judge R. Vanlalena Ichuan Khuallian niin a hmanpui. Thu sawiin Khuallian chuan Isuan “Naupang te te ka hnenah han kal tir ula, hnar suh u. Pathian ram chu hetiang mite ta a ni si a,” a tih angin naupangte chu vanram neitu an ni, a ti a. Naupangte hi Isuan a hmangaih a, a aiawh turin nu leh pa min pe a, lsua kan hmangaih let ve theihna tura kan tih tur chu nu leh pa ‘ bakah kan zirtirtute thuawih a ni, a ti bawk. Nu leh pa nei lo te pawh kan awm maithei a, kan nu leh pate aiawh turin District Child welfare Committee min pe  a ni, a ti a. Naupang venhim ngai an venghim a, naupang sual awm tha duh lo te pawh an man thin a ni, a ti. CWC, DCPU, JJB awmziate a sawifiah bawk. Tunlai khawvelah naupangte an him tawh loh avangin fimkhur a ngai hle a ni, a ti a. Hmelhriat lohin thil lei sak an tumin duh lo turin a chah a, hre tura enchhin lo tur leh zui lo turin a chah bawk.
He hun kaihhruaitu R.Lalrinchhani, DCPO pawhin thu sawiin National Children’s Day hman a nih dan a tarlang . a. India ramah hian kumtin Children’s Day hi hman thin a ni a, India in zalenna a hmuh hnua Prime Minister hmasa ber Pandit Jawahar Lal Nehru piancham puala hman thin a ni, a ti a. Nehru a hi naupang ngaina leh naupangte pawhin an ngainat em em a ni a, India ramin zirna kan neih pawimawh ber berte hi a hmalaknaa kan neih a ni, a ti bawk. Nehru-a hian naupangte a ngaipawimawh a ni tih lantir nan a kawr hmaah Rose sen a dah reng thin a, Naupangte hi huana pangpar kuhmum reng angin a sawi thin a. Tuna naupang kan enkawl thatin nakina kan society a siam tha thei a ni tih hria-in naupangte a ngaipawimawh em em thin a, ama duh ang ngeiin a pianchamah naupangte pualin hun hman thin a ni, ati.

He hunah hian District Child Protection Unit in talent a buatsaih result puan leh lawmman sem a ni a. Pakhatna theuhte hian State Level-ah Champhai District ai an awh leh dawn a ni. National Children’s Day hmannaah hian naupangte hnen atangin special item hmuhnawm tak tak thlir a ni bawk.

RUANG ZAWN CHAWLHSAN TA:

Lalvulmawia, km 32, a pa nau Pu Awikima, N Vanlaiphai hnena khawsa chu N. Vanlaiphai leh a chheh vel khuaten ni 7 an zawn hnuah niminpiah khan mipui nawlpui anga zawn hun chu tihtawp a ni.  Lalvulmawia hi niminpiah kha mipui nawipuiin ni 7 an zawnna a ni a. Khaw thenawm leh Lungchhuan atangin mi thahnem takin an zawnpuia. Leng khuain Zuva Iuidung an zawng bawk a. Thawhtanni tlai dar 5:00 khan mipui nawlpuiin an zawn hna chu tihtawp niin he kharna hun tawite an hmanah hian N.Vanlaiphai VC aiawhin Lalngaihzuala’n lawmthu a sawi a, Tuichangral ‘S’ Group YMA President R.Lalremkunga Biate chuan thu sawiin, Tunah thlahliam angin Iang mah ila, mit leh beng chhi zui rengin kan ngaihven zui reng ang. Khaw ṭhenawma YMA member-te midang ṭanpui turin kan inpeih reng a. A ṭul chuan zanlaiah pawh nise che chhuak nghal thei tura inpeih reng kan nih avangin a thlamuanthlak a, tuna mibo zawngtute pawh hian min mamawhtute mamawhna i  hre reng ang u, a ti. Tuichangral S group hmingin Joint YMA N.Vanlaiphai hnenah hnatlang senso atan Rs 2000 an hlan a, mimal ṭhahnemngai eng emaw zahin thingpui lumna tur an pe bawk a ni.