ni 6.9.2017 (nilaini)

PIANCHAM LAWM DAN THA A LAWM TUM TUR :

Nimin khan Champhai khaw chhunga zirna in hrang hrangte chuan Zirtitute NI, Teachers Day lawmna hun an hmang, Zirtirtute Ni denchhen hian Champhai Bawrhsap Vanlalngaihsaka chu Govt. GM Higher Secondary School leh BC English Academy-ah khuallian niin he hun hi a hmanpui a Khuallian chuan thu sawiin September mi 5 Teachers’ Day a hman a nih chhan chu pa ropui leh pa ting Dr. Sarvepalli Radhakrishnan vang a nih thu sawi in India ram President a nih laia a thawhpui ten a pianchampha chu ropui taka lawm an sawi laiin Dr. S. Radhakrishnan chuan a pianchampha chu Zirtirtute hriatreng nan leh chawimawi nan hman a duh zawk thu a sawi a. Hemi denchhen hian September ni 5, 1962 atangin Teachers’ Day atan hian hman zui a ni ta tih a sawi a. Khuallian chuan Dr S.Radhakrishnan atangin pianchampha lawm dan te pawh kan zir thar a tul tih a sawi a, midang tana malsawmna ni turin mahni pianchampha a thisen pek, damlo tanpui leh mahni aia harsa te tanpui chu pianchampha lawm dan tha tak a ni, a ti. 

Zirlaite chu mahni zirtirtute thu awiha an zilh hauhna te leh zirtirna te chu zawm tha turin a fuih a, Mobile Phone leh Internet te pawh mahni zirlai atana tangkaipui tlaka chhawr turin a chah a. Mizote chu hnam tlemte kan nih avangin hnam dangte laka kan himna tur chu zirna hi a ni, a ti a. Hnam lian zawkte laka ro kan rel ve theihna turin All India Services chu tum tak takna nena nih tum theuh turin a chah bawk a ni. Mahni Nu léh Pa leh Zirtirtute thu awih chu nunkawng dika min kaihruaitu leh mi puitlinga min chher chhuaktu a ni tih a sawi bawk.

He hunah hian Dr S Radhakrishnan chanchin ngaithlak a nih bakah cultural item leh intihhlimna chi hrang hrang nena hun hman niin, zirtirtu thawktha State Awardee Lalthantluanga, GMHSS hnenah Champhai District Education Committee aiawhin Chairman, Vanlalngaihsaka chuan chawimawina thuziak a hlan ani. 

KHAWFAI BER NIH TUMIN HMALA MEK :

Champhai khawpui chhunga veng hrang hrangah faina lama beihpui thlak chhoh mek zel niin, VC huaihawtin tunlai hian veng chhung thenfai hnatlang neiin nasa taka hma lak chhoh mek zel ani. 

DAN BAWHCHHIA :

Champhai Traffic Police te chuan August thla chhung khan lirthei dan bawhchhia 131 an man. Champhai Traffic Police te lirthei dan bawhchhia mante zingah hian ke pali nei tam berin  dan bawhchhia 68 man niin, an pawisa chawi tlingkhawm hi Cheng 19,300 a ni a. Ke 2 neiin dawtin dan bawhchhia 50 an man a, an pawisa chawi tlingkhawm hi Cheng 7100 niin, Lirthei ke 3 nei 13 manin an pawisa chawi tlingkhawm hi Cheng 2900 a ni bawk. Champhai Traffic Police te’n lirthei dan bawhchhia an man zawng zawngte pawisa chawi tlingkhawm hi a vaiin Cheng 29,300 a ni.