ni 2.9.2017 (inrinni)

MIZORAM AH KHAW FAI BER NIH TUM:

Biate-in Mizoram khaw fai ber nih tum
Champhai District a khaw fai bera thlan Biate khua chuan Mizoram a khaw fai ber nih tuma hma an lak mekna kal zelah nimin zing khan a khawnawtin faina kawngzawh an huaihawt.
Biate Town Faina Committee leh Biate Educational Staff Association (BESA) tangkawpin an huaihawt Faina Kawngzawh-ah hian zirlaite leh khaw chhunga tlawmngai pawl hrang hrang te an tel a, kawng tluanin faina lam hawi inzirtirna thu an auchhuah-pui a ni. Kawngzawh ah hian VC member H. Lalchhuanawma leh BESA President Malsawmthanga ten faina thuchah an sawi a ni.

Mizoram khawpui Town area bik tana buatsaih khawpui fai inelna-ah hian Biate chuan lawmman pakhatna lak ngei tumin khawtlang huap leh veng huap hnatlang te an koh thin bakah, veng tinah pangpar huan te siamin, khaw chhung cheimawi lamah pawh nasa takin hma an la a ni.

ZIRLAI THARTE LAWMNA HUN HMANG:

Nimin khan DIET Champhai chuan Freshers’ Social cum Annual Sports kharna hun an hmang.

He hun, Lalhmingthara, Trainees Union Vice President  kaihhruaiah hian Lalthianghlima, Principal chuan thu sawiin, DIET bul tan a nih lai leh tuna kan dinhmun khaikhin chuan hmasawnna tam tak hmuhtur a awm a, kan suangtuahna ram thin kha tunah chuan a takram kan thleng ta hi thil lawmawm tak a ni a. Thawktute thahnem ngaihna azarah Mizorama DIET zinga a tha berte zingah hial kan tel thei hi a lawmawm hle a ni, a ti a. Mo fel tak nei tur chuan moneitu leh mo an pawimawh ang chiahin Lecturer te thahnem ngaihna chauh a tawk lo va, zirlaite thanemngaihna a tel ve a ngai a ni, a ti a. Trainnee te chu training-naa an awm chhungin hrehawm leh harsatna an tawh hunah pawh inhneh tir lo va, hmalam pan zel tura fuihin DIET Champhai-in result tha tak a neih chhunzawm zel theihna tura theihtawp chhuah zel turin a ngen bawk.

Lalfakawma Khiangte III Semester hnen atangin thusawi ngaihthlak niin, hmingchhiatnaah kan thikthu chhia se la, he zirna in hi hminghliauna thlentu ni lo va tihmingtha tu nih kan tum tur a ni, a ti a. Vawiina kan nun hi kan naktuk siamtu a ni tih hria-in fimkhur taka kan nun a ngai a, he zirna inah hian ruihhlo leh nunchhia a tlang nel tur a ni lo va, zirtirtu fel tak takte zarah thiamna pawchhuaka zirna chhia siamthatu tur kan ni tih kan hriatreng a ngai a ni, a ti bawk. Freshers aiawhin K.Lalremruata hnen atangin thusawi ngaihthlak a ni bawk. DIET Champhai te hian August ni 28, 2017 atang khan Annual Sports an nei tan a, indoor, outdoor leh cultural items hmangin inelna hi an nei a, nimin khan an inelna hrang hrang result puan a ni a, lawmman sem a ni bawk.
DIET Champhai-ah hian tunah hian Pre-Service Trainees 81 an awm mek a. Ist Semester ah 40 leh 2nd Semester ah trainees 41 an awm mek bawk. Mizoram Board of School MBSE in DIET 8-te Pre Service leh In-service training result a tihchhuah takah khan DIET Champhai hi an ti tha hle a, Middle School Inservice teacher trainees 55 neiin trainees zawng zawngte an pass vek a, Prymary section bikah trainees 17 neiin an pass kim vek bawk a ni. Pre-service 2nd Semester result ah candidate 41 neiin an pass vek bawk. DIET Champhai hi Mizoram DIET 8 zingah pre-service leh Inservice-a fail awm miah lohna awm chhun an ni bawk.
Kum 2014-2016 Batch ah DIET Cham-phaiah hian zirlai 105 pass tawhin IGNOU Study Centre a nih angin IGNOU hnuaiah D.El.Ed course hi 2014 Batch ah mi 95 in an pass chhuak tawh a; DIET Champhai atang hian mi 272 ten an lo pass chhuak tawh a ni.

BEIHRUAL TAN :

Mizorama Kohhran lian ber Presbyterian Kohhran chuan nizan atang khan Beihrual thupui an zir tan ta. Beihrual hi September thla chhung hman a ni dawn a, Rev Dr. Vanlalnghaka Ralte lehkhabu ziah ‘Lal Isua zirtirnate’ tih an zir ho dawn a, thupui hawngtu ruat bik te hnen atangin thupui hi ngaihthlak thin a ni ang. September ni  24, Pathianni hian Kristian chhungkaw ni an hmang bawk ang. Kohhran tam zawk chuan Beihrual chhunga inkhawm kimte tan lawmman an siam sak leh dawn a ni.

INDIA RAM A SCHOOL FAI TAMNA CHAMPHAI DISTRICT:

Sorkar laipui Ministry of Human Resources and Development bul tuma India ram pumpui School fai inelna Swachh Vidyalaya Purashkar 2016-2017 ah Champhai District chu India ram District 700 chuang a school fai tamna ber a ni.
School fai thlan chhuah 11 zingah Champhai District a zirna in chu telin, heng zingah hian Elementary School 8 leh Secondary school 1 an lang phak a. District level a school fai thlanchhuah lang tamte hi Sorkar laipui MHRD chuan nimin khan Certificate of Recognition an hlan a. Lawmman hi Cham-phai DC Vanlalngaih-saka leh amah tawiawmtu Champhai District Project Coordinator (SSA Mission) K. Lalsiamliani leh District Deputy Coordinator (RMSA) C. Hualri-khuma te’n New Delhi ah an dawng a ni.

IN SIPEL SIAK :

Nizan hmasa khan Spelling Bee Middle Category a Semi Final inhlang kai mi 20 te chuan intihsiakna an nei leh a, mi 10, C. Lal-muanthara, St. Joseph English Medium School, Jonathan C. Lalhriat-zuala, Lallawmkima, Lalnunhlimi, King Solomon’s School; Lalruathlui, C. Lalduh-zuali, Lalremruati, Lal-rinsanga, BC English Academy; Vanlalruati, Govt. Comprehensive Middle School Venglai leh Vanlalrinnunga, Govt Roseland School te chuan Final an inhlang kai a ni.

MI THAR LAWMLUT TAM HNENAH LAWMMAN :
MNF Champhai North Block-I meeting
Nimin khan MNF Champhai North Block-I Executive Committee chu YMA Sub-Hqrs Hall Tlangrawt-ah an thukhawm.

Meeting hi PC Zohlira, President chuan a kaihruai a, Joint Block Conference chungchang an sawi ho a, Champhai North Constituency hnuai a Block pahnih te chuan kumin November thla ah Joint Block Conference Champhai ah neih ni se tih an rel a; Conference hi ruai nen ropui taka hman an tum a ni. Hemi niah hian Unit hrang hrang a mi thar lawmlut tam hnenah lawmman pek a ni ang. Conf. neihna hmun tur leh ni chu Party President Zoramthanga berawn chungin Elected OB ten an ruat ang. Sept. ni 20, Martar Ni chu Champhai North Block pawhin hman ni se, hmanpui turin Gen. Hqrs hruaitu sawm ni se, an ti bawk.

Petrol : Service tanky  (66.31)

Diesel : Sem rual  (55.46)