ni 17.8.2017 (nilaini)

INDIA ZALENNA CHAMPHA LAWMNA :

Champhai :

Thawhlehni khan India Independence Day vawi 71-na lawmna chu Chhangphut Field ah Social Welfare Minister PC Lalthanliana hoin ropui taka hman a ni.

He lawmna inkhawmah hian Khuallian chuan hnam puanzar pawt parhin parade contingents 25 te hnam puanzar chibai buk a chhangleta Khuallian chuan Independence Day Vawi 71-na lawm tura kal te chu chibai bukin, Ram pum huapa zalenna kan hman chu ram tan inpekna thuk zawk nei tura inhlan thar nan leh zalenna kan lawmna chu min fuihtu a tan leh hmasawnna kawnga thui zawk pen nan hmang theuh turin kalkhawm mipuite chu a sawm ani. He ni pawimawh takah hian India ram zalenna atana nunna hlu tak hlan tum Martar-te zahna chibai bukin, India zalenna a tana hma hruaitu ropui Mahatma Gandhi, Netaj Subash Chandra Bose leh hruaitu dangte hre reng turin kalkhawmte chu a chah a. Zalenna sualtute chu hun eng pan thei tum min fuihtu leh kan kawng lo tiengtu an ni tih a tarlang a. Zalenna sualtuten kan ram tan thuitak thlira an lo thawh tawhna zawng zawng chu tithlawn mai lovin ataka chantirtu nia lungrual taka kan thawh ho chuan harsatna pawh kan hmachhawn theih thu a tarlang bawk a ni. Khuallian chuan Mizoram Sawrkar hmalakna hrang inang te a tarlan zingah Seling-Champhai kawng chungchang sawiin kum 2014 a National Highway a puantawh chu kumin March 31,2017a Mizoram PWD kuta hlan chauh a nih avangin thawm that lohin hun eng emaw chen a awm a. Chutihlai chuan Seling – Keifang leh Kawlkulh – Khawzawl inkar thuam thatna tur Central atangin sanction hmuh tawh anih thu tarlang in, heng karkawng 2 thawktu tur contractor pawh thlanfel an nih tawh thu a sawi a. Hemi bakah hian kum kallai a Road Transport & Highway Ministry sanction turin Keifang -Kawlkulh leh Khawzawl – Champhai kawng thuam thatna tur Estimate chu thawnfel tawh a nih tih a tarlang a, Seling – Champhai kawng chu Double lane a sial zau turin DPR chu Highway Ministry ah thehluh a ni tawh tih tarlangin, Land Acquisition a ti felin Sanction Order a chhuah chuan Tender koh nghal vat anih tur thu a sawi bawk. Minister chuan tlawmngai pawl hrang hrang te, kohhran te, mipui leh media ten Sawrkar chunga rinna nghata Sorkar hmalakna te an tawiawmna ah lawmthu a sawi a, lndependence Day a parade Contingent te, zirlai te, Sawrkar Official te leh mipui kalkhawm zawng zawng chungah lawmthu a sawi bawk a ni. Independence Day lawmna ah hian Champhai Bawrhsap Vanlalngaihsaka, IAS Champhai SP BK Yadav, IPS; Sorkar hnathawk hrang hrang, NGO, MJA Champhai, Zirlaite leh mipui thahnem tak an tel a ni.

Khawzawl : 

Khawzawl-ah pawh MuaIvawm Field-ah niminpiah khan lndependence lawmna ropui taka neih a ni.

He hunah hian Khuallian Lalawmpuii Chawngthu, MLA chuan Hnam Puanzar pawt pharhin Parade chibai buk a chhanglet a. Hemi hnu hian thu sawiin zalenna ni kan hman hian ram tana inpekna thuk zawk min neih tir se, kan ramin dinhmun sang zawk a thlen theih nan theihtawp chhuah tura inhlan thar lehna ni atan i hmang ang u, tiin mipui a sawm a ni.

Khawbung:

Khawbung ah niminpiah khan Independence Celebration Committee te ruahman angin India Independence Day lawmna chu Khawbung khelmual I naah neih a ni.

Khawbung khelmual 1 naa Zalenna Ni lawmnaah hian Khawbung BDO Lalbiakfela, MCS chu khuallian niin hnam puanzar a pawt pharh a, Primary School atanga Higher Secondary School naupang March Past contingent 10 ten hnam puanzar chibai an buk a. Sorkar hmalakna hrang hrang a tarlang bawk. 

ZALENNA PUAL BASKETBALL :

Nizan hmasa khan 1-Day Senior Basketball Tournament chu VANIS-ah Final khela zawhfél a ni.

Final hi Kahrawtians BC leh Minikins BC ten an khel a, lst Quarter ah Kahrawtians BC chuan 19-17 in hma an hruai a, 2nd Quarter ah Minikins BC te chuan an rawn umphak hnuah hma hruaitu anin nih chhawk a, half time-ah 32-32 in an inhneh tawk a ni. 3rd Quarter ah 57-49 in Minikins BC te chuan hma hruai a, 4th Quarter ah pawh Minikins BC chuan fal taka hma hruai chhunzawmin 78-69 in hnehna an Chang a, an Champion ta a ni. Nizan hmasa vek khan lawmman sem zui nghal a ni a, Vanlalngaihsaka, Champhai DC chuan khuallian niin final hi a telpui a ni.

NLUM RALLY HMANG :

NULM Beneficiaries te tana Champhai City Mission Management Unit, UD&PA Department in a buatsaih Day NULM Rally Cum-Mobilisation Programme Chanem Bulding-ah nimin khan hman a ni.

He hun hi K. Lalhmuakliana DUDO, Champhai chuan a kaihruai a, thu sawiin Day NULM chu khawpuia cheng mirethei leh harsa te chawikanna tura Ministry of Housing & Poverty alleviation sorkar laipuiin flagship programme pawimawh ber pakhat a ni, a ti a. He Mission hi September ni 24, 2013 atanga lndia ramah bul tan niin Mizoramah pawh UD&PA Department in a kalpui a ni, a ti bawk. National Urban Livelihoods Mission inngahna bul thut chu miretheite’n mahnia bul an tan theihna turin theihna an nei a, an retheihna atanga an kaichuah na tura kawng zawnpui a kawhhmuh ani a ti a. Loan rul tha duh lote avangin loan puk ten zel tura ten harsatna an siam thin a, kan tu Ieh fa leh thangtharte’n loan puk kawnga harsatna an tawh lohna turin loan kan rulh that a ngaia ni, a ti bawk.
He hunah hian NULM hnuaia Champhai khawpui chhunga hmalak tawhna hrang te, mipui tana NULM tangkaina leh mirethei chawikanna atana ruahman a nih thu Ieh hmalak zel dan turte tarlan a ni bawk. NULM Rally ah hian NULM Poster Ieh banner hrang hrangte tar chhuah a ni a, Faina thutiam leh New India Movement 2017-2022 thutiam chu NULM Beneficiaries te hian an tiam nghal bawk a ni.

Vanrammawii, Manager S&ME leh Mimi Lalrinngheti, Manager SD&I hnen atangin thusawi ngaihthlak niin, F Lalhriatpuia, JE chuan he hun hi a khar a ni.

ZALENNA CHAMPHA PUAL INENTIRNA:

I-DAY lawmna chi khat atan Myanmar ramri, Zokhawthar a awm 10th Assam Rifles chuan niminpiah khan a thlawna damlo inentirna hun an buatsaih. Zokhawthar Branch YMA President sawi danin, damlo entirnaah hian Zokhawthar leh Tiau luiral, Myanmar ram chhung Khawmawia dam lo 300 chuang hriselna an enfiahsak a. Assam Rifle doctor 4 Ieh Myanmar doctor 2 ten damlote an en a, damdawi a thlawna an sem bakah Zokhawthar leh Khawmawia mi harsa zual chhungkhaw 1,200 te chu rikrum thila hman tur Emergency Solar Light an pe bawk.

HMEITHAI TANPUI:

Niminpiah khan Champhai Buffalo te chuan kumdang a anlo tih thin angin I-Day pualin charity ride neiin, Ngur khuaah hmeithai 3 leh parawl pakhat hnenah tanpuina an hlan tih thu kan dawng.