ni 18.5.2017 (ningani)

DAMLO INENTIR THAHNEM THEI :
Champhai District Hospital Paediatrics OPD ah in entir an thahnem thei hle.
Kar hmasa Thawhlehni atanga Champhaia Naupang Specialist Doctor palite an in Duty chhawk mekah District Hospital OPD-a naupang inentir an thahnem thei hle a. kar hmasa khan Dr. Rochhuaga chu Thawhlehni atanga Zirtawpni thleng OPD ah hian thuin, tunkar Thawhtanni khan Dr. Doris Lalnunmawii Sailo chuan Champhai a lo thleng a, niminpiah atang khan OPD ah a thu tan ve leh nghal a. Natna nei naupangte bakah naupang check up duhte chuan a inchhawka naupang Specialist rawn Duty te hi an inentir nasa hle a, tunkar leh kar hmasa lamah Paediatrics OPD hi a lun hle a ni. Champhaia Duty mek Dr. Doris Lalnunmawii Sailo hi tunkar Zirtawpni thleng hian a Duty ang a, karlehah Dr. Biakthansangi chuan a rawn thlak ve leh dawn a ni.
Champhai District Hospital a Paediatrician rawn Duty tir a nih atanga nimin chawhma lam thleng khan naupang 268 an inentir tawh a, Champhai mipuiten an chhawr tangkai hle nia hriat a ni.



KHAWBUNG MINI SPORTS COMPLEX :
Central Pool of Resources for Development of North East hnuai atanga sum hmahruai, 1st Installment Rs. nuai 133.16 leh Mizoram State in a tum ve tur Rs. nuai 14.9 hmangin Khawbung Mini Sports Complex hmun tur lei laih chu zaa 70 aia tam thawh tawh a ni.
Khawbung Mini Sports Complex hi NLCPR hmanga Rs. nuai 368.89 senga siam tura pawm niin, kumin kum tir atang khan hna thawh tan a ni a. Inrinni khan Rural Department a Engineer te chuan GTS khawl hmangin uluk takin na enfiah a. A ram leilung a tangkai thei ang bera hman a nih theih nan ruahmanna siam mek a ni a. Leivung hnawhkhah chunga Volleyball Court leh Basketball Court siam chu tha tawk lova ngaiin a chhim lam ram awl, lei ruh tha lai chu laih belh tura ruahmanna kalpui leh a ni bawk.

ZIRLAI PASS THARTE LAWMPUINA HUN HMANG :
Nizan hmasa khan Khawzawl Zuchhip Veng Branch YMA chuan MBSE in HSSLC leh HSSLC Examination 2017 result a tih chhuah taka an Branch huam chhung atanga pass thar mi 31 te lawmpuina hun Zuchhip Veng Branch YMA Hall ah an hmang.
He hun H. Vanhlira, Treasurer, Branch YMA kaihhruaiah hian PC Vanrammawia, Branch President in lawmpuina thu a sawi a. PC Rosiama, President Khawzawl Gr. YMA in fuihna thu a sawi bawk. An Branch YMA chhunga HSLC leh HSSLC Pass tharte hnenah hian ‘Rahbi thar’ lehkhabu an pe vek bawk.

BAWNG RU MAN :
Champhai Police te chuan niminpiah zing dar 7 vel khan Champhai Vengthara JH Lalthanga s/o Sawilaia bawng rutu Samuel Laldinthara (38) s/o R. Ralliana, Aizawl Venglaia khawsa nia in sawi leh a bawng ruk an man a. Samuel Laldinthara hi chenna mumal pawh nei lo, rukruk thubuaia lo man tawh niin a bawng ruk hi a neitute hnenah hlan let leh a ni a. Samuel Laldinthara hi thubuai siamsak niin Champhai District Jail-ah dah luh a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol    : Free Sale (Rs. 62.50/litre)
Diesel    : Free Sale (Rs. 53.23/litre)