ni 10.4.2017 (thawhtanni)

GREATER KHAWZAWL WATER SUPPLY SCHEME M.J.A.IN AN TLAWH :
        Ni 8.4.2017 (Inrinni) khan Champhai Dist.MJA Member ten Greater Khawzawl Water Supply Scheme hna kal mek a hmunah kalin PHE Dept.he hna vil mek tuten MJA member te hi an kaihruai.
       Greater Khawzawl Water supply scheme hi kum 2013 March thla atang a thawh tan a niin kum in March thla a zawh tura ruahman a nih laiin hna hi an zo hman dawn lova. Thla 6 chhung hnathawh hun pawhsei leh dil mek a ni.He project thawh nana estimate pumpui chu Rs.Vaibelchhe 24.97 a ni a.Hemi atang hian power supply hna thawhna turin Cheng nuai 174 vel pek tura ruahman a niin Khawzawl atangin tui pump na tur power supply pekna tur ruahman mek a ni a.Power supply hi pek a nih veleh Tui pump chhuak  tur in  P&E dept. in  ruahmanna thui tak an kalpui tawh tih hnathawktuten an sawi.

         He water supply scheme hi Gangwal Engineer Construction Company, pvt.Ltd.Silchar in thawkin an ni hian an hna thawh tur za a  90 an zo tawh a ni.
       Fund an hmuh chak tawk loh vang leh bungraw thiarna kalkawng ah harsatna an tawh vangin an duh angin hna an thawk chak theilo niin PHE dept.hotu ten an sawi a ni.
       He water supply scheme hi kum 2011 population mil a Khawzawl   mipui 10400 vel kum 30 thleng a lo pung chho tur, mi sing thum leh sang ruk chuang te chawm zo tura ruahman a ni a.Mi pakhatin nitin tui litre 70 dawng thei tura ruahman a ni. Tunah hian project pumpui atangin hna pumpui za zelah  65  thawh zawh tawh nia chhut  a ni.Tui pump chhuah dah khawlna tur reservoir siamna tur sum ruahman a awm loh avangin tun hma lama tui dahkhawlna  tui litre nuai 4.5 awmsa bak Tui litre nuai 8 vel dahna tur reservoir siam tuma ruahman mek a ni bawk.
        He project kal mekah hian compensation beisei vanga harsatna lian lutuk a awm rih lova.Intake hmunah mi pakhat ram khawih chhiat vanga harsatna chu sutkian thuai beisei a nih thu thu dawnna chuan a sawi.
        MJA member te hi Pu Lalrammawia, SE(PHE), Pu Lalnunthara, EE, leh Lalnunfela SDO ten hnathawh kal mek an enpui a ni.

BAWNG VULHTU TEN DVO LA DANG ZUI ZEL :
Champhai Vengsang leh Tlangsam bawnglian Vulhtute chuan DVO Pisa kai tur an dan chhunzawm zel.
Inrinni pawh khan Office chawlh ni mahse Vengsang leh Tlangsam Bawnglian vulhtute chu DVO Office kawtah an pungkhawm a, Bawngvulhtute chuan an bawnghnute bill Cheng nuai 25 sing 6 sang 4 leh 83, Lalchungnunga Pudaite, Managing Director, DVO ni bawkin a bat sak chu pek an nih ngei theih nan hmalak chhunzawm zel an tum a, an hmalak zel dan tur erawh an sawi theih loh thu an sawi.
An thil phut chungchangah hian sawrkar leh AH&Vety Dept. te chu an dem loh thu an sawi bakah an harsatna te hriatthiampui a, hah taka an thawhchhuah rah chu sawrkar leh AH&Vety Dept. hian a rang thei ang bera pe tura an ngen thu an tarlang tel bawk. DVO Lalchungnunga Pudaite hi biak tumin a Office mai bakah a chenna in lam thlenga kal thin ni mahse DVO Lalchungnunga hi hmuh tur a awm ngai loh thu an sawi bawk.

MZP FEDERAL COUNCIL :
MZP Headquarters Champhai chuan tunkara Federal Council Sitting, Champhai a neih tura inbuatsaihna kal zelah leh Hospital chungchang kalpui zel dan tur relin OB Meeting an nei.
He hunah hian Federal Council Agenda tur an thlir a, thehluh tura an tihte chu : Mizoram Quata-a MBBS zirte hian an zir zawh hnuah thingtlang kilkhawr thleng phaka hna an thawh theih nan sawrkarin dan khauh tak a siam theih nan hmalak ni rawh se tih te; ITI, Polytechnic leh Nursing College te hi a rang lama sawrkarin function tir theih nan hmalak ni rawh se tih te; MZP hian hnam nun leh zia rang inzirtir tharna ni, Ram puma zirlaite tan a ruala an hman turin Programme siam ni rawh se tih te; Ram leh hnam hmangaihna leh humhalhna (nationalism) chungchangah inzirtirna zau zawk atan MZP hian Kohhran leh NGO hrang hrangte kal tlangin zirtirna neih ni rawh se tih te; Mizo zirlaiten hnam lam kan lo thiam leh zual theihna turin MZP in hma la rawh se. Kuthnathawh uar leh chawisan a nih theih nan hmalak ni rawh se tih te;  Mizraom chung chauh nilo Mizo hnahthlak awmna zawng zawngah MZP a inzarpharh zel theih nan hmalak ni rawh se. Zirlai harsatna tawk ten an pan, biakpawhna tr leh tanpui turin MZP General Office hian Helpline Branch bik a hranin siam rawh se. Mizoram sawrkarin a enkawl zawh leh tur chuan loh Infrastructure lian tak tak a lak thin hi a tawp theih nan hmalak ni rawh se. Mizo zirlaite Civil Service leh Technical Line atam zawk an tlin theihna turin hmalak ni rawh se tih leh Mizoram sawrkarin College zirtirtu post ruak hnawh khah nana parttime lecturer hun rei tak a chhawr tawhte hi dahgheh a nih thuai theih nan MZP in hma la rawh se tih te a ni.

CM LOKAL DAWN :
Chief Minister Lalthanhawla chu naktuk hian Teikhang Re-Union hmanpui turin a rawn kal dawn a, Helicopter hmanga lokalin Mimbungah a tum ang a. Champhai DC ten Teikhang a panna turin lirthei an lo buaipui sak dawn a; CM hi Helicopter hmag bawkin a kir thla leh dawn a. CM lo dawngsawng tur hian Champha DC CC Lalchhuangkima leh Champhai SP BK Yadav te chu Mimbung lam panin an liam thla ang.

AN THLAH DAWN :
Vawiin chawhnu dar 2 hian SE, PHED Champhai WATSAN Circle Office, New Champhai ah hmun danga insawn tur Champhai leh Khawzawl EE PHED thlahna hun an hmang dawn.

ZOKHAWTHAR TLAWH DAWN :
Vawiin hian Myanmar rama India Palai Vikram Misri chuan Indo-Myanmar Border Trade Point Zokhawthar a tlawh dawn.
Vikram Misri hian helai hmun a ram pahnihte insumdawn tawnna kalpui mek dan leh India ramin helai hmun a cheibawl dante enfiah a tum bakah Land Custom Station a hmasawnna ruhrel bun tawhte a tlawh dawn a. Helicopter hmanga Zokhawthar hi kal tura ruahmanna duan a nih avangin sawrkar mi pawimawhte chu vawiin hian Zokhawthar a Land Custom Station ah mawihnai taka amah lo dawn sawng turin kar kalta Zirtawpni a DC hova meeting chuan a rela ni.
Land Custom Station Conference Hall ah inkawmhona neih tura tih niin, India Palai Vikram Misri a hian helai insumdawn tawnna kaihhnawih a hriat duh a neihte hrilhhre thei turin Land Custom leh Custom Preventive Force hotute, Trade & Commerce hotute, Dan leh tupek kengkawhtute leh Zokhawthar khawtlang hruaitute chu lo in peihsa turin tih a ni a. Myanmar ram a India Palai Vikram Misri a lo kal tur hi tih chian a nih ve leh Champhai District thuneitute chu thutkhawm chawpchilh nei leh turin Zirtawpni a thukhawm chuan thu delhkilh a siam bawk.
Teikhang lama Chief Minister a awm bawk avangin Champhai DC leh Champhai SP chuan India palai hi an lo dawngsawng thei dawn lo va. DC aiawhin Remlalliana Hnamte, ADC leh Rebecca Laldinmawii Hrahsel, ADC te an kal ang a. Champhai SP aiawhin Dy SP Vanlalzawni a kal thung dawn a ni. Aizawl atangin Trade & Commerce Jt. Director Lalrintluanga a lo kal bawk a ni.

BORAL :
Ni 8. 4. 17 tlai lam 2:00 bawr vel khan Champhai Vengsang Presbyterian Kohhran Senior Department naupang Tumkau la tura kal Remsangzuala (16) s/o Lalmalsawma, Champhai Vengsang leh a thiante pahnih chu Khawzawl leh Chawngtlai inkarah Car in kawng thlangah an tlanliam.
Motor khalhtu Remsangzuala (Remrema) hi a awmna a tih deuh avangin Khawzawl Damdawi In panpui nghal a ni a, Aizawl-ah refer nghal a ni a. Greenwood Hospital-ah enkawl nghal niin a hliam tuarlo in ni 9.4.2017 (Pathianni) zing dar 3:10 khan a boral.
A ruang hi nizan khan tlaivarpui niin vawiinah Vengsang thlanmualah vuiliam a ni ang. Remrema hi Govt. GM High School a Pawl 9 zirlai a ni.

TUIALHTHEI DINHMUN :
MIZOFED POL
Petrol : Free Sale (63.09)
Diesel : Semrual (53.61)