ni 8.3.2017 (nilaini)

VC TE HNENAH COMPUTER HMAN DAN ZIRTIR :
Nimin khan State Institute of Rural Development and Panchayati Raj, SIRD&PR Mizoram buatsaihin Champhai District chhunga VC thlanbik mi 90 te tan Office Information ah Desktop Publishing Training neih tan a ni.
He training hi Hnamte Institute of Technology, Champhai Venglai ah neih a ni a, nimin a hawnna inkhawm hi V. Lalmuanpuii, DLAO Champhai chuan a hmanpui a. Thusawiin DLAO chuan hnathawhna hrang hrangah Computer hriatna tel lo chuan tunlai khawvelah thil tih hleihtheih a ni tawh lova. Awlsam zawk leh tha zawka hna kan thawh a, kan document pawimawh te tha zawk akan chinfel theihna turin Computer kan hman tangkai a tul a ni, tiin, VC te chu thahnem ngai taka an zirlai te zir turin a chah a. Khawtlang tan kan tha leh tui sengin kan inpe a, khawtlang in hma a sawn ngei theih nan tunlai thiamna sang zela hmasawn ve zel tura in zir thar zel tur a ni, tih sawiin he training hi a hawng a ni.

He training hi RGSA Schome hnuaia neih niin ni 11 March 2017 thleng a awh dawn a ni. He training ah hian Theory leh Practical hmangin zirtirna pek thin a ni ang.

ZIRLAI NAUPANG TEN DIET TLAWH :
Nimin khan RMSA Champhai huaihawtin Students Excursion Trip Visiting Higher Institute chu neih a ni.
He hunah hian Champhai District-a School naupang thlan bik te kalkhawmin, Dy. SPC, RMSA C. Hualrikhuma chuan zirlai kalkhawmte duihna hun a hmang a. He Excursion hi a tangkai thei ang bera hmang turin a duih a, zirna in an tlawh te chu an tana chona tha tak a nih tur thu a sawi tel bawk.
Excursion ah hian School tin atangin mi pahnih zel an kal a, School 14 atangin zirlai naupang 28 vel an kal thei a ni. Excursion hi District dangah pawh an remchan dan a zir zela kalpui ve mek a ni bawk.

CSBBA IN BASKETBALL ZIRNA HAWNG :
Nimin khan Vanlallawma Indoor Stadium ah Champhai District Basketball  Association chuan basketball Academy a thawhhnihna a hawng.
Basketball Academy hawnna hun hi lalramdinthara, Champhai District Basketball Association Academy Board Vice Chairman chuan kaihruaiin TC Lalchhuanawma chuan Pathian hnena inhlanna hun neiin hemi hnu hian PC Ramnunsiama, Academy Secretary chuan report a pe a. Academy Coaching Staff te hmel hriattirna leh Academy Course kalpui dan turte a sawi bawk. he basketball Academu ah hian Syllabus atan Foreign Edition Coaching Kit Basketball Basic for Kids by Baby Kaplan hman ani dawn tih a sawi a. Tunah hian Academy zirlai hi eng emaw zat an awm mek a, registration ti duh tan pawh tih theih zel ani, a ti.
C. Vanlalnghaka, CDBBA President chuan Academy naupangte lawmna thusawiin basketball emaw infiamna dang pawh nise a bul berah chuan ruihtheih thila an fihlim a tul a, hlawhtling tur chuan kna zirna tibuai lo a kan thawhrim a tul a ni, a ti. Champhai District Basketball Association chu Mizoram basketball Association atangin inhnukdawk mah ila, National Federation lian zawk emaw Institution dang pawh Academy kal zelna tur atan kan zawm ang, a ti. Hemi hnu hian zirlai naupangte chuan training hi an nei zui nghal a ni.

DAN BAWHCHHIA :
Champhai Traffic Police te chuan February thla chhung khan lirthei dan bawhchhia 116 an man.
Lirthei dan bawhchhia an man zingah hian two wheeler tam berin 63 an man a, Auto rickshaw 11, LMV 30 leh MMV 12 an man tel bawk. Heng lirthei dan bawhchhia an man atanga pawisa an chawitir tlingkhawm chu Rs. 30,100 a ni a. Two Wheeler atang hian Rs. 13,400, Three wheeler atangin Rs. 2500; LMV atangin Rs. 8400 leh MMV atangin Rs. 5800 te an hmu. Rui chunga lirthei khalh 1, phal chin aia chaka tlan avanga man 1, Traffic dan ngai pawimawh lova lirthei khalh thubuai 4 leh mobile phone hmang chunga lirthei khalh 1 te chu February thla chhung dan bawhchhiat an mante an ni.

EXCISE REPORT :
February thla khan Champhai District Excise & Narcotics Dept chuan ND&PS Act hnuaia thubuai 10 ziaklutin MLPC Act dan hmangin thubuai 13 an ziaklut. ND&PS Act hnuaiah hian thubuai 10 an ziahluh bakah hemi kaihhnawihah hian mi 13 an man a. Heroin gram 71,500 an man tel bawk. MLPC Act hnuaia thubuai 13 atangin mi 7 an man a, he dan hnuaiah hian rakzu litre 851 leh zu bilh lai tin 240 an man a, zu chhuanna bel 20 an man tel bawk.

VAWIIN DINHMUN :
MIZOFED POL  (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol    : Coupon (Rs. 66.97/litre)
Diesel    : Semrual (Rs. 56.67/litre) 

FIRE  OFFICE : 
(03831)234026