ni 8.2.2017 (nilaini)

VC TE TAN INZIRTIRNA :
Nimin chawmhma dar 10:30 khan Ni 3 awh tur Champhai Block huamchhunga Village Council te tan Village Development Plan siam dan tur inzirtirna neih a ni.
Ni  3 awh tur training I&PR Auditorium, CHANEM buildinga neih hi Pu Khuangthansanga Pakhuangte, Principal, Extension Training Centre, State Institute of Rural Development, Thingsulthliah chuan a kaihruai a, Pu F. Malsawmtluanga, Account Officer, DRDA, Champhai chuan a hawng.

Sorkar laipui hnuaia Ministry of Panchayati Raj chuan Village Council te tihchakna tur scheme a duanga. A hming atana Rastriya Gram Swaraj Abhyan hming vuahin kum 2016 atanga khan a lo kalpui pawh a. He scheme hnuaiah hian Vilage Coucil te chu an thiamna leh theihna tipung tura inzirtirna chak taka kalpui tur a ni a. Ruahmanna (Plan) siam dan te, tihhlawhtlin theih dan tur (Implementation), Vilzui hna (Monitoring) leh Enletna (Evaluation) te chu thiam taka Village Council ten an tih theihna turin uluk taka training hi pek tur a ni a. Mizoram chhunga he hna thawk tur hian State Institute of Rural Development & Panchayati Raj, Mizoram, Aizawl chu ruat a ni.
He training ah hian SIRDRP Faculty te leh Local Administration Department (LAD) Officers ten zirtirna an pe ang a. Training ah hian Champhai Block huamchhunga Village Council thlan bik khaw 11 atangin Village Council President, Secretary leh Treasurer te an tel a.  TA/DA pek vek tur an niin, karleh lam hian khaw thlan bik 12 atangin an tel leh ang.

KAWNG LAIH CHUNGCHANG THLIRHO :
Nimin khan UD & PA Office-ah District Park Hringlang tlang lam hawi a Melbuk atanga kawng an laih chungchang relin District Park Committee an thukhawm. 
He meeting hi Pu Lalnunmawia chuan kaihruaiin tuna Melbuk atanga kawng an rawnlaih chu an duh loh thu tarlang in kalkhawmte chuan thusawina hun an nei a. District Park Committee chuan Hringlang tlang hi kawng khat chauh a luh theih ni awh se tia a lo rel tawh chu sawi langin, Kawng hi an laitlang a nih chuan Park hlutna a bo tur thu leh a ram chhunga thing te chu rukbo a nih mai an hlauh thu an sawi a. Committe chuan Kawng laitu Contractor hnenah lai chhunzawm tawh lo tura ngenna lehkha Committee hminga siam ni se a ti a,  tin a hmun hma enkawltu ber Mualkawi Branch YMA te leh Khawtlagng hruaitute chu kohkhawm vat nise an ti bawk a, Revenue Dept lam pawh an ramri chin teh that sak tura ngen vat ni rawh se an tih te an rel a ni.

MOTOR 69 ZIAHLUH A NI :
January thla chhung khan Champhai District Transport Office-ah Motor 69 ziah luh a ni.
January thla chhunga District Transport Office-ah lirthei ziah luh zingah hian Lirthei ke pahnih nei chi ziahluh tam ber niin 35 ziah luh a ni a, Truck in dawtin 15 ziah luh ani bawk. Heng bakah hian Auto Rickshaw 3, Car 13, Taxi 2 leh Bolero pakhat ziah luh ani bawk.
January thla chhung khan Chhiah chi hrang hrang atangin Cheng 10,01,293 hmuh ani a, Chhiah chi hrang hrang zingah Rad tax atanga hmuh tam ber niin Cheng 5,97,430 hmuh a ni a, Passenger phur chi atangin Cheng 42,975 hmuh a ni a, Bungraw phur chi atangin Cheng 1,32,033 hmuh a nih bakah MV Fees atangin Cheng 2,28,955 hmuh a ni bawk. District Transport Office a lirhtei register hnuhnung ber chu MZ-O1-A-0058 a ni.

CHAMPHAI CHHUAHSAN :
Mizorama Baskeball in elna sang ber MSL qualifying khel tur Champhai Team te chuan nimin khan Champhai an chhuah san.
Mizorama Baseketball inelna sang ber Mizram Super League (MSL) Play off/Qualifying khel tur Champhai Team te chuan vawiin khan Aizawl an pan a. Champhai hian an match hmasa ber February ni 9, tlai lam dar 6:00 ah Republic Veng nen an inkhel ang a. Dawrpui Vengthar nen February ni 10 tlai lam dar 6:00 ah an inkhel bawk ang.

KHAPNA THUPEK :
Addl DC Pu C.Lalzarliana chuan niminpiah khan Champhai District-a vawk lakluh khapna thupek a tichhuak.
Thupeka a tarlan danin nikum khan tun ang hun chhovah, Champhai District chhungah vawk natna hri, PRRS leng chuan vawk tam tak a suat a. Champhai Vawkvulh Assn chhinchhiah dan chuan kum 2016 March leh June thla chhungin vawi 2828 an thi a ni. Hei hian vawkvulh tute tan harsatna nasa tak a siamin vawkvulha eizawngte tan phei chuan an thil tawn hi a rapthlak hle a. Vawk hri leng tur laka invenna atan Section 114, CrPC 1973 in thuneihna a pek angin Ram dan, Myanmar atangin mi tumahin vawk an laltu tur a ni lova, sate dang atangin tuman vawk an lalut tur a ni lo bawk a. He thupek zawm lo tu chu IPC Sec 188 hmangin hrem an ni ang a. He thupek hian chhuah a nih atanga thla hnih chhung a huam dawn a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol    : Free Sale (Rs. 66.97/litre)
Diesel    : Coupon (Rs. 56.67/litre) 

FIRE  OFFICE : 
(03831)234026