ni 31.1.2017 (thawhlehni)

BEKANG EISUAL :
Karhmasa ningani tlai khan Electric Venga chhungkaw 5 te chuan Bekang um eisualin niminpiah khan Med Aim Damdawi In, Zotlangah Admit an ni.
Bekang um eisual te hi a then chu an pum a na a, a then an kua a tha lo va, a then an luak nia thudawn ani a. Niminpiah khan in entirin mi 12 te chu damdawi inah hian admit niin 2 chu admit ngai lovin an awm a, an natna hi a serious lutuk lem lo nia hriat  ani. An eisual chhan hi hriat chian a ni lo va, sa chhumna belin bekang hi  an chhum niin an ring tih thudawnna chuan a sawi. Bengkang umtute hi Champhai Civil Hospital ah an awm mek bawk.


KHAWBUNGAH TRAINING BUATSAIH :
Champhai District RMSA huaihawtin nimin chawhnu khan 2 Days Community Training & Environmental Building Programme (IEDSS) chu Khawbung Zawlbukah neih a ni.
Training ah hian Khawbung Block huamchhunga School Management Development Committee Member te koh khawm niin zirlai naupang taksa leh rilru lama harsatna chi hrang hrang enkawl dan leh zawn chhuah dan chungchang chu Lalrengpuii, IEDSS Coordinator in zirtirna a pe a. C. Hualrikhuma, Dy. DPC chuan RMSA kalphung leh hna hmachhawp tarlang in, Champhai District ah High School 86 awmin Higher SS Govt. 1, Aided 3, Lumpsum 2 leh Private 11 a awm mek a ni.
Deputy DPC chuan RMSA hnuaia School sak tharte hnenah Science Equipment Rs. nuai 1 man hu theuh an pek tawh chu hmang tangkai turin a chah a. District Level Science Exhibition ah te pawh School thuam that tawhte chu tel ngei tur a beisei an nih thu a hrilh a. RMSA hmalakna anga School kalpui ngei turin a chah bawk a ni. School inenkawlna dan, sum dawn leh hmanna te chu SMDC Member te pawhin hriatpui thin turin a ngen a. Nungcha leh ramngaw humhalh te, tuihnar humhalhte chu zirlai naupang bakah khawtlang mipui ngawrh zawka inzirtir turin a chah bawk.

RUIHHLO AN MAN :
Nimin chhun dar 12:45 vel khan Champhai Police te chuan Khankawn Police Check Gate ah Wagon R MZ01-B- 2934 atangin Heroin No 4 hawng 10 (Gram 13) leh a neitu nia rin Jakir Hussain s/o Fatirun Nechha kum 25 leh midang pakhat, Tripura mi ve ve te chu an man a. Heng Heroin No. 4 an man te hi tualchhung rate in Rs. nuai 5 man hu vel a ni a, a neitu mi pahnih te hi NDPS Act hnuaiah thubuai siamsak nghal an ni. Nimin vek khan Champhai Police te chuan Khankawn Police Check Gate ah hian Foreign Cigarette Case 3 an man bawk.

GSM TAHAH AH :
Gospel Singers Mnistry te chu Tedim Synod Inkhawmpui Tahan a neihah sawm an nih angin an hmanpui a, mi 22 an kal thei a ni. Tedim Synod hian Mizoram atanga kal GSM te hi thusawina hun an pek bakah rorel palaiah an pawm a, vote pawh rorelnaah hian an neihtir. Hei bakah hian Myanmar Mizo Music Ministry OB ten thingpui lo in puiin GSM Tahan kalte hi an lo kawm a, thawhhona tha tak neih an duh thu an hrilh a. GSM te hi nimin khan Champhai lam panin an rawn kir a ni.

KHAPNA THUPEK :
Champhai District Magistrate Vanlalngaihsaka chuan khapna thupek a tichhuak.
Thupek a atarlan danin, tunlai hian mi thenkhatin thingzai khawl ramhnuaiah pawh awlsam taka ken mai theih, Chainsaw hmangin thing kih a zai an ching a. Hei vang hian ramngaw a chereu zel a, ramsa leh savaten ei tur an hmuh loh avangin an bo duak duak a. Kan ramngaw a lo chereu zel loh nan leh ramsa leh savaten kan ram min tin san mai loh nan, Bialtu DFO emaw Range Officer-in emaw ziaka phalna a pe a nih loh chuan hetiang khawl Chainsaw hmanga thing kih leh zai hi, District Magistrate, Champhai District, Champhai chuan tun atanga thla hnih chung atan khapna thupek a chhuah a ni. He thupek zawm lova tilui chu hram an ni ang.

VAWIIN DINHMUN :
MIZOFED POL  (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol    : Free Sale (Rs. 66.97/litre)
Diesel    : Service Tanky (Rs. 56.67/litre) 

RD PUMP
Petrol    : Khawlchhia
Diesel    : Nil

FIRE  OFFICE : 
(03831)234026