ni 30.11.2016 (nilaini)

BORDER AREA CULTURAL PROGRAMME NEIH MEK A NI :
Ni hnih awh Border Area Cultural Programme chu nimin khan Kahrawt Field ah tan a ni.
Art & Culture Dept, Mizoram leh North East Zone Cultural Centre te tangkawpa buatsaih Border Area Cultural Programme hawnna inkhawm hi K. Lalruala, Dy. Director, Art & Culture Dept. chuan a kaihruaia, khuallian Vanlalngaihsaka, Champhai DC chuan thusawiin, Idnia ram hi hnam hrang hrang awmkhawmna a ni a, hnam tinin ziarang leh chindan hrang awmkhawmna ani a, hnam tinin ziaran gleh chindan hran gkan nei a, hei hi India ropuina pakhat a ni a. Kan tihdan hrang mahse hnam khat kan nih avangin inlungrualna chu thil pawimawh tak a ni, a ti a. Hnam hrang hrangte inpawh leh inthianthatna tura Border Area Cultural Prog. buatsaih a ni a, he hun pawimawh tak Champhaia nghah a ni chu lawmawm a tih thu a sawi a. State hrang hrang atanga rawn kal palaite chu Champhaia an cham chhunga hun nuam tak hmang turin a duhsakna a hlan a ni.

Inkhawm kaihhruaitu K. Lalruala pawhin thu sawiin, Champhaia Border Area Prog. nghah a nih chhan chu Chhamphai hmun hma mawi leh nawm vang a nih thu a tarlang a. State dang atanga lokalte chu an la tawn ngai loh hrang hrangte Champhaia tawng turin duhsakna a hlan a, hun hlimawm tak an hman a beisei thu a sawi a. Khuallian Champhai DC hnenah hian thilpek a hlan nghal bawk.
Border Area Prog. ah hian Assam, Manipur, Meghalay, Punjab leh Mizoram atangin hnam lam chi hrang hrang hmuhnawm tak thlirho a ni a, Mizoram aiawh hian Kahrawt Cultural Culb leh Kanan Branch YMA te an lam a ni. Border Area Development Programme hi vawiin pawh hian chhunzawm leh tur a ni a. Chhun dar 1 ah Zothanglawra District Librarian, Champhai chuan kaihruaiin, C. Lalhnunpuia, MJA President Champhai District chuan khuallian niin a hmanpui ang a, State hrang hrang atangin hnam lam entir leh a ni ang.

PAWISA  LO THLENG :
Nimin khan State Bank of India, Champhai Branch-ah pawisa note a rawn thleng.
Pawisa note rawn thleng zingah hian cheng 2000 note chu a tam ber a ni a, cheng 500 note awm tel bawkin naktuk atang hian heng pawisa rawn thleng tharte hi mipui hnena pek chhuah nghal tum a ni. Kan palai zawhna chhangin State Bank of India Champhai Branch manager chuan pawisa rawn thleng tharte hi Bank hrang hrangah an mamawh dan a zira pek chhuah nghal a nih tur thu a sawi a. Sorkar laipuiin cheng 500 leh 1000 tlang tithi mah se Bank atangin pawisa lak chhuah tur chu Champhai bikah a harsa lem lova. Hetihlai hian kar hmasa lama pawisa rawn thleng mumal lo avangin SBI ni lo bank dangte chuan pawisa pek chhuah tur an nei meuh lova, SBI atanga pawisa rawn thleng tharte hi pek chhuah a nih hunah he harsatna hi a ziaawm nghal beisei a ni.
Hetihlai hian thil lei leh hralh kawngah pawisa tlang, cheng 500 leh cheng 1000 chu hman a harsa chho mek a, cheng 500 hi la hman chhunzawm theih tura tih niin cheng 1000 hi bank-a dahluh bak loh chu a theih meuh tawh lova, bank-a dah theih a la nih avang hian hman erawh a la theih tho thung. Cheng 100 leh 50 bakah pawisa thir chu bank lamin pe chhuak nasa mah se pawisa nawi kir tur a harsat avangin pawisa tlang kawngah mipuiin harsatna tenau deuh an tawk a ni.
Puan tawh thin angin cheng 500 leh 1000 hi tun thla tirah sorkar laipui chuan a tithi a, a thlakna turin cheng 2000 leh cheng 500 note thar chu pek chhuah nghal a ni a, Champhaiah erawh chuan cheng 500 note hi hmuh tur a la awm meuh lo a ni. SBI chuan Chanem-a ATM chu cheng 2000 lak chhuah theih turin an hawng a, Apex bank pawhin Bethel kawn leh DC office bula ATM an dahte hawngin, bank dang erawh chuan pawisa dah tur a awm loh avangin ATM hi an la hawng thei lo thung a. Account pakhat atangin pawisa hi tun dinhmunah chuan mi pakhatin karkhatah cheng 24000 a la chhuak thei a ni.

RUIHHLO DO PUALIN ESSAY COMPETITION :
Champhai Police ten ruihhlo dona peng pakhat atan nimin khan Champhai Higher Secondary School-ah essay competition an buatsaih.
Essay competition-ah hian thupui atan Evil effects of drugs tih hman a ni a, zirlai 120 bawr vel an tel a ni. He essay Competition hi Champhai Police ten Drug awareness campaign an kalpui meka hmalakna pakhat a ni a. Nimin intihsiaknaah hian Chamhai District SP chuan he essay competition hi ruihhlo that lohna zir chhuahna atana hmang turin zirlaite a chah a, midangte hnena ruihhlo that lohna leh a nghawng pawi dan puang darh turin a fuih bawk a ni. He hun hi Pu Lalringliana Pachuau, SDPO chuan a hmanpui bawk.
Essay Competition hi ruahman dan chuan Govt. GM Higher Secondary School leh Govt. Champhai High School ah te buatsaih leh tur a ni.

MEETING NEI :
CDFA Ist DIV League December ni 1 khelh tur chungchangah niminpiah khan Managera meeting neih a ni.
Managers meetingah hian CDFA Ist Div League khelh dan tur ruahmannate inhrilhhriatna neih a ni a, Club hrang hrang aiawhte bakah CDFA hruaitute an kalkim hle a ni.
CDFA hnuaia Ist Div ah hian Club 6 awmin Venglai FC, Zotlang FC, Vengsang FC, Champhai United FC, Bethel FC leh Vengthlang FC te an awm mek a. Inkhel kual vekin point hmusang pahnihten Semifinal an khel dawn a ni. December ni 1 hian match thum khelh a ni ang a.  
Dar 10:30 Venglai FC leh Zotlang FC an inkhel ang a. 
Dar 12:30 VengsangFC leh Cpi Utd FC inkhelin a hnuhnung ber
Dar 2:30 Bethel FC leh  Vengthlang FC ten an khel bawk ang.

LO HMUAK :
Kerala-a 4th RSC Karate Cup, Karate & Kabudo Championship 2016 neih zawh taka Mizoram aiawh Champhai team te chuan niminpiah tlai khan Champhai an rawn thleng.
Champhai District Sports Committee bultumin karate player te hi DK Traffic Point-ah lo hmuah an ni a, he hun hi Pu C.Lallianpuia, District Sports Committee chairman chuan a kaihhruai a. Coach Pu Lenghmingthanga chuan report pein, he intihsiaknaah hian state 18 an tel a, Mizoram chu player tlem ber ni mah se chawhrualin goal medal la tam ber kan ni a, mahse player kan inngah hleih avangin pakhatna erawh kan hauh pha ta lo a ni, a ti a, naupangte tumruhna leh huaisenna chu an hlawhtlin chhan nia a hriat thu sawiin, nunphung inang lo karah chhel takin a ber nih tumin an bei a, hei vang hian medal thahnem tak kan la thei ta a ni, a ti a, Mizoram team buaipuitu zawng zawngte hnenah lawmthu a sawi a ni.
Pu Lucas Thangmangliana, Champhai District Karate Assn pawhin thu sawiin, Champhai District Karate Assn player, Mizoram aiawha fehchhuakte hlawhtlinna ropui tak an chang chu lawmawm a tih thu a sawi a, naupangte chu an kal zelna turah duhsakna a hlan a ni.
Mizoram team te hian gold medal 9, silver medal 1 leh bronze medal 3 an hawn a. Mizoram aiawha intihsiaknaah chuan tun tum hi tournament khata gold medal an lak tam ber tum a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol    : Semrual (Rs. 61.72/litre)
Diesel    : Service Tanky (Rs. 52.22/litre) 

FIRE  OFFICE : 
(03831)234026