ni 27.10.2016 (ningani)

CHAMPHAI AH HIV/AIDS CHUNGCHANG ZIRHO :
Nimin khan I&PR Conference Hall CHANEM ah Champhai District Level Consultation with Law Enforcement Agencies & Prison Officials tih thupui hmangin MSACS leh FHI360 ten Workshop an buatsaih.

Dr. C. Zirliana CMO hnen atangin inlawmna leh thuhma ngaih thlak a nih hnuah Dr.Lalmalsawmi Project Director Chuan HIV/AIDS lama Champhai dinhmun tlangpui tar lanna neih pahin HIV/AIDS dona hi Department pakhat chauh a hneh chi a nih loh thu leh mitin ten kan mawhphurhna theuh a la a, hma la turin kalkhawmte chu a sawm bawk a ni.
He hunah hian Betty Lalthantluangi Joint Director (TI) hnen atangin HIV laka invenna pawimawh zia leh a invenna kawng hrang hrangte a rawn tarlang a. Police, Excise leh Jail lam atangin thusawi tha tak tak ngaihthlak a niin hmalak ho zel dan tur an sawiho a ni.
He hunah hian HIV/AIDS lama line department leh YMA Sub Headquarters lam hruaitu te leh HIV dona kawng a hmalakna a thawktu hrang hrangte an tel tha hle a ni.
He Consultation Workshop hi Robert Lalrempuia Khiangte State Co-ordinator FHI360 in a kaihruai a ni.

DAWR TE SIAM CHUNGCHANG SAWIHO :
Champhai khawpui chhung veng hrang hrang kawngpui kama dawr te siam chungchang ngaihtuahin nimin khan Champhai DC Conference hall-ah thutkhawm a ni.
He hun hi DC Vanlalngaihsaka`n kaihruaiin, khawpui  chhung kawngpui kamah khawlai a mipui veivak/kalna dal si lova, sawrkar hriatpuina hnuaia mumal taka dawr te siamna hmun tur UD&PA in hmun 68 a lo ruahman chu thlirho a ni. Hetianga dawr te siamna tur hmun thlan chhuah bikah hian dawr te nghaktuten hun bituk chhung atan mumal taka dawr te an nghah theih nan leh sawrkar ah chhiah mumal tak an chhunluh dan tur chungchang ngaihtuah tel a nih bakah mipu iveivakte sahimna chu ngaihpawimawh ber a nih thu sawilan a ni bawk.
Dawr te siamna tur 68 nghak duh tur UD&PA hnena dilan lut tawh zat chu mi 110 vel a nih thu he thutkhawmah hian tarlan a ni a. Dilna lut tawhsa atanga thlanfel mai theih turin UD&PA chu ruahmanna siam tura tih a nih bakah dawr te siamna hmun tur duan lawk pawh lo enfiah nawn tura tih a ni bawk. Kawngpui kama Sawrkar hriatpui leh hmun hma ruat bik nilo hmun dangah chuan nepnawi zuar a inpho leh dawr te siam khapna hi khauh taka kenkawh a ni tawh dawn tih he thutkhawmah hian sawilan a ni bawk.

CHAMPHAI EXCISE TEN RUIHHLO AN MAN :
Champhai Excise & Narcotics Staff Duty te chuan niminpiah tlai khan Mualkawi daiah Myanmar atanga lakluh Heroin (hawng 4) Gram 63.2 an man.
Ruihhlo neitu a puh mi 3 an mante chu nimin khan District Court a hruai an nih hnuah Champhai District Jail ah dahluh an ni. Excise & Narcotics Duty te hian Zokhawthar atanga lo kal Maxi Cab (Sumo) an enfiahna lamah heng ruihhlote hi man a ni a. Heroin Gram 55.4 neitu a puh Lalchungnunga kum 27 s/o Nochungnunga, Haimual, Myanmar nia inchhal leh Lalkohthari kum 26 d/o Khualthanga, Haimual, Myanmar ni a inchalte chu man an ni a. Heroin gram 7.8 neitu a puh Lalrintluanga kum 20 s/o Thanghluilova, Bethlehem Vengthlang, Aizawl ni a inchhal pawh niminpiah tlai hian man tel a ni bawk. Heroin an man hlut zawng hi Rs. nuai 2 man hu vel a ni.

CHAMPHAI AH GAS LEH OIL LO THLENG :
Mizofed LPG ah nimin khan Gas trip khat consumer cylinder bur 270 leh commercial cylinder 24 a rawn thleng a. Heng zinga a tam zawk chu nimin khan Tlangsamah sem nghal a ni. Mizofed LPG atanga thudawn danin Gas hi Champhai lama rawn kal leh tur a awm a, vawiin emaw Zirtawpn ihian a rawn thlen beisei a ni a, hei pawh hi Tlangsam lama sem leh tum a ni.
Gas rawn thleng zawng zawng hi quota leh double-na tur dah hran bakah tunlai aGas nghei an tam avangin sem chhuah vek theih a ni lova. Fas diltute hnenah pawh a hmunah engemaw zat pek chhuah nghal a ni bawk. Nimina Gas rawn thleng leh Mizofed Petrol Pump a tuialhthei rawn thlengte chu Metrology Dept in an endik a, Gas hi buktling a ni tih leh tuialhthei hi phal chinah a awm tih nemnghetin hlan thlaktir an ni.

INCHUNG ATANGIN TLA :
Nimin zing dar 9:30 vel khan Upa JH Lallarthanga, Zokhawthar chu an inchung atanga tla in a boral.
Upa Lallarthanga te In hi nizan hmasa ruahsur han a far nasat avangin nimin khan inchung an thawm tha a, an thawm tha zo phiatfai tura a lawn leh chu chesualin in chung atang hian a tla a, Rihkhawdar damdawi In panpui nghal niin hetah hian a hliam tuar lo in a boral ta a ni. A ruang hi nizan khan tlaivarpui in, vawiinah vuiliam a ni ang. Upa Lallarthanga hi Presbyterian Kohhran Upa niin Champhai South Moderator Upa C. Thangvuka`n  avui ang.

OFFICE SAWN :
Champhai DSYO Office chu CHANEM Building atangin Vanlallawma Indoor Stadium ah an insawm a. Vawiin chawhma dar 11 hian Office thar hi pathian hnenah hlanna hun an hmang dawn.

VAWNBAWIHA MEMORIAL FOOTBALL TOURNAMENT :
Vanbawiha Memorial Second Division Football Tournament khelh mek nimin result :
Vengthlang N 2-1 Tlangsam
N. Champhai 1-1 Zotlang
Electric FC 1-1 Dinthar FC
Vengthlang 1-0 Vengthar
Vawiin inkhel tur :
Tlangsam Vs Kahrawt
Police FC Vs Kanan FC
Dinthar FC Vs Ruantlang FC
Vengthar FC Vs Zotlang FC

VAWIIN DINHMUN :
MIZOFED POL  (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol    : Semrual (Rs. 62.26/litre)
Diesel    : Semrual (Rs. 52.88/litre) 
*Load neih rih loh avanga semrual a ni e.

FIRE  OFFICE : 
(03831)234026