ni 6.10.2016 (ningani)

RTI WEEK HAWNG :
Nimin chawhnu dar 2 khan RTI Week hawnna Govt. Champhai College Auditorium-ah neih a ni a, Champhai District Addl. DC Pu C. Lalzarliana’n kaihruaiin District Office hrang hranga SPIO leh SAPIO te leh khawpui chhung VC te bakah tlawmngaipawl hrang hrang aiawh te chuan Right to Information Act 2005 hnuaia mipuite hnena sawrkar information pek chhuah dan an zir nghal.

RTI Week hawnna inkhawm kaihruaitu Pu C. Lalzarliana, Addl. DC chuan mipuite chu sawrkar ber an nih thu sawiin sawrkar thil tih leh hmalakna reng reng hriat ve zel hi an dikna chanvo a ni a. Mipui chhiahhlawh, sawrkar hnathawk zinga mipui ngaipawimawhlo an awm thin chu pawi a tih thu a sawi bawk.
RTI Week 2016 atan Keynote Address pe in Pu Neng Thianlala, Champhai District Information & Public Relations Officer chuan mipuiten RTI dan hmanga information an dil kher ngai lova information pek chhuah kawnga ke pen turin SPIO leh SAPIO kalkhawmte a sawm a. Sawrkar thu leh hla puanzar kawnga I&PR Department hmalakna hman tangkai thiam atul thu leh thuthar thehdarhtute zara sawrkar information ten hmun kilkhawr ber pawh a thlen theih avangin thuthar thehdarhtute nen thawhhona tha tak vawng nung zel turin officer kalkhawmte a chah bawk.
Resource Person, Pu K. Hrangdawla chuan SPIO leh SAPIO te mawhphurhna a zirtir a, Pu Lalthantluanga chuan mipui information diltute hriattur leh information dil dan kalhmang a zirtir thung.
Nimin a RTI Week hawnna a telte tan Resource Person-te hian RTI chungchangah quiz hlimawm tak an buatsaih a, kalkhawmte’n an hlawkpui hle.

CHAMPHAI DISTRICT I&PR OFFICE STAFF-TE LEH MJA TEN DIPRO THLAH :
Nimin chawhnu khan Champhai District I&PR Office Staff-te leh MJA Champhai member-te chuan MCS appointment hmuh avanga Champhai DIPRO hna chhuahsana Serchhipa SDC hna zawm thar tur, Pu Neng Thianlala thlahna hun an hmang.
Inthlahna thu sawiin MJA Champhai District President Pu C. Lalhnunpuia chuan I&PR leh MJA ten thawhhona tha tak an neih avanga lawmthu sawiin DIPRO kalchhuak tur Pu Neng Thianlala chu duhsakna a hlan a. General Secretary C. Lalrinsanga chuan MJA Champhai hmingin lawmpuina citation a hlan bawk. Pu Neng Thianlala pawhin MJA ten Champhai DIPRO hna a chelh chhunga an tawiawmnaah MJA Champhai chungah lawmthu a sawi.

YMA SUB-HQRS. CHAMPHAI EXECUTIVE THUKHAWM :
Nimin khan SYMA Executive Committee te chu SYMA Conference hall, Tlangrawtah an thukhawm.
He Meeting C. Lalbiakzauva, SYMA President kaihhruaiah hian CYMA Rorel Inkhawmpui ah Group leh Branch te kal thei zat bituk theuh kal ngei turin ngen leh beisei an ni a. kalna tur chungchang ah harsatna bik nei ten SYMA ah inhriattir nise, tih an rel a. Nov. 1-30 chhung Cement Training SYMA in a buatsaih turah Group tin atangin mi 5 theuh leh thuthmun Branch 28 atangin mi 2 theuh ruat tura tih a ni a. Meeting chuan CYMA atanga ruihhlo do hmalakna atana pawisa SYMA in a dawn atangin Group hmalak hautak deuh Khawzawl leh Tuiphal Group hnenah Rs. 10,000 ve ve a pek nise, an ti a. Disaster Manangement training Nov. thla a CTI Sesawnga neih turha SYMA aiawh mi paruk intirh nise, an ti bawk.

HNAHLAN BLOCK MHIP CONFERENCE :
Nimin khan Hnahlan Block MHIP Conference, Hnahlan khuaa neih chu Pi Vanlalawmpuii Chawngthu, MLA & Chairperson, Mizoram State Commission for Women chuan a hmanpui a. Eirukna ‘Corruption’ lakah kan pasalte an fihlim theih nan Mizo hmeichhiate kan pawimawh hle a ni a ti.
Hmeichhiaten duh leh mamawh an ngah lutuk chuan pasalte sual kawng dai tura nawrtuah tan palh theih anih thu leh  sum lakluh milin Nu ber te khawsak thiam a pawimawh  thu sawiin  khuallian Pi Vanlalawmpuii chuan Khawtlang nun siamthat chu inchhungkhur atangin hmeichhiaten bul tan theih a niin  hmeichhiate dinhmun chu chawikan mek zel a nih thu leh, a bik takin Mizo hmeichhiate chu khawvel huap pawha dinhmun tha pawl tak a nih thu leh Mizoram ah Sorkar hmalakpui na in Mizo hmeichhiate dinhmun a tha tawh takzet a, dikna leh chanvo humhalhna dan chi hrang hrang kan ram  rorelna in sang ber Assembly House hialah pawh passed  ani tawh chu  lawmawm a tih thu  a sawi a. Chumai ni lovin khawtlang rorelna Local Council leh Village Council ah te seat reserved sak leh zel  a lo ni ta hi hmeichhiate tan khawvel thar niin a lawmawm takzet ani a ti bawk.
Women Commission Chairperson Awmpuii chuan Nu pawimawhna sawiin, Nu awmlohna chhungkua chu a ruak a, Nu-in hmangaihnaa chhungkua a enkawl chuan chhungkaw nuam a ni thin. Nu chu lehkha zir sang lo pawh nise dawhtheihna leh tumruhna nena a pasal leh fanaute a enkawl chuan chhungkaw hlawhtling a ni thei thin a ni, a ti ni. Khawvel huap pawha mi hlawhtling leh mi ropui te zingah hmeichhia mi thahnem tak an lo chhuak tawh a, Mother Teresa te, Benazir Bhuto, Ausung Suu ky te leh tuna Common Wealth Games a an hotu Chairperson pawh hmeichhia niin, hmasawnna kan ngah tawh hle a ni, a ti bawk.
MHIP Hnahlan Block hi 19th October, 2010 khan din a ni a, an huamchhungah ah hian Branch 10 an awm mek a. Block Conference hi nimin khan tan a ni tawh a, an block huamchhunga inkaihhruaina tur an rel zingah an member boral an awmin MHIP member zawng zawngten a vuinaah puandum sin vek nise, khawhar lenpui chungchangah YMA hminga khawhar lenpui zawh zan 4-na chu MHIP hmingin lenkhawmpui thin nise tihte, mitthi puana tuam chunngchangah an chhungkhat lainate chauhin puanin tuam se, a bak zawng chuan sum faia pek nise tihte bakah Inneihnaah mo leh mo thianin puanchei an sin anih chuan midangte chuan puanchei sin ve loh nise tihte an passed a ni.

MPL KHEL DAWN :
Vawiina Chhangphut Field a MPL Season 5 ROund 7 khelh tan tur rawn telpui turin healh Minister leh MFA President ni bawk Lalthanzata chu Champhai a rawn kal tura beisei a ni.

ZANINAH MPL CELEBRATION NEI DAWN :
Zanin dar 8 hian Govt. Champhai College Multipurpose Hall ah MPL Celebration neih a ni dawn a. Thusawi hrang hrang bakah lam en tur leh zaithiam zai ngaihthlak tur a awm bawk ang. He prog. hi Zonet Zawlbuk ah LIVE a pekchhuah a ni ang.

VAWIIN DINHMUN :
MIZOFED POL  (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol    : Free Sale (Rs. 60.63/litre)
Diesel    : Free Sale (Rs. 50.22/litre)