ni 29.9.2016 (ningani)

KHAW 4 TEN LONEIH AN BANSAN CHHO MEK :
Interated Watershed Management Programme (IWDP) kaltlangin Champhai District a khaw 4 ten an thawhrimna leh rinawmna avangin malsawmna an dawng chho mek zel a. IWDP hnuaia hmalakna hmasa Champhai I Project huamchhunga Kawlkulh, Dulte, Chhawrtui leh Puilo khuate chuan tlangram loneih an bansan chho mek.

Dulte khua hian nikum atang khan lo neihna turin Lo atan ram thar an thet tawh lova, kuminah pawh chhunzawm zelin tlangram loneih chu IWDP hmang hian huan kumhlun zawk siamna atan an hmang ani. Kawlkulh ah pawh chhungkaw 33 in lo neih pangngai hi an bansan tawh a, Chhawrtui khuaah chhungkaw 18 te chuan Lo neih pangngai bansanin IWMP hmang hian huan nghelnghet zawk neiin hlawhtlinna an hmu mek a ni. IWMP hnuaia NRM hmangin heng tlangram loneihnaah hian terrace laiin huan nghelnghet zawk siam a ni a, hei bakah tui dahkhawlna leh Green House bakah loneihna tura thil pawimawh hrang hrangte siam ani a, Champhai I ah hian IWMP hian ram hectare 4421 a tuam a, sum hi Rs. nuai 633.27 an dawng tawh a ni.
Niminpiah khan MJA Champhai District Member te chuan an President C. Lalhnunpuia hovin he hmalakna kalpui mek hi an tlawh a. Champhai DRDA Project Director CC Lalchhuangkima`n MJA Member te hi tawiawmin Champhai I hnuaia IWMP enkawltu Project Implementation Agency Champhai District, Soil & Water Conservation Department District Officer Lalrinzama`n a lo dawng sawng a, Watershed Committee hruaitute nen an hmalak dan leh hnathawh dan te hi an enho a ni.
MJA Champhai District Member te hian Kawlkulh Chhimluang a Conference Hall sak te, Balhla leh Thingfanghma chinna hmunte, Dulte khuaa Bazar Shed sak bakah Terrace laih te,  Chhawrtui a Vawk vulhna hmun leh huan siamtea hmunah kalin an tlawh a. Champhai I IWMP Project hi kum 2009-10 atanga thawh tan tura ruahman ni mahse hmalak bultan tur a kutthlak tan chu kum 2010-11 atangin ani a, tun Sawrkar kumah hian a Project hi a tawp tawh dawn a. He Project hnuaia hnathawhte hi Mizoram hmun hrang hrang atang leh MCS Training neiten tum 17 tlawh tawhin Mizoram pawn, State dang atangin tum 4 lai an rawn tlawh tawh bawk.
He Project hi kumin Sawrkar kum tawp rualin Sawrkarin bul a tansakna leh a chhawmdawlna chu a tawp dawn a, he Project hnuaia khaw 4 a hmalakna te enkawl chhunzawmtu tur thlanna – Watershed Committee leh Village Council atangin neih leh a la ni ang a. Hruaitu thlan chhuahte hnenah hian an inenkawl dan tur chungchang inzirtirna Withdrawal & Consolidation Training buatsaih a ni dawn a ni. He Project hnuaia hmalakna hmang leh chhawr tangkaitu ten kumin APrilthla thleng a IWMP zarzo va an sum lakluh chu Rs. 2,19,01,000 lai a tling tawh a.
Dulte khuaah chuan hmalaknan IWMP sum Rs. 65,06,953.5 sen ral a nih laiin, Rs. 42,35,000 an lalut tawh a; Kawlkulhah Rs. 1,45,71,323.5 sen a nih laiin Rs. 56,80,000 an lalut tawh a. Chhawrtui khuaah Rs. 1,81,18,829 sen a nih laiin an lak luh zat chu Rs. 88,16,000 a tling tawh a. Puilo khuaa hmalakna atan hian senso zat Rs. 63,93,870 a nih laiin IWMP kaltlang a mipui te sum hai luh chu Rs. 31,70,000 a tling thung a. Tun atanga kum 2/3 ah chuan sawrkar tanpuina sum an hmuh zat hi an lakluh theih beisei a ni.
IWMP Champhai I Project hian heng khaw 4 huamchhungah hian ram 4421 Hectare a zau a tuam a, Project pumpui a sum hmuh atangin Rs. 3,33,22,071 chu Land Development atan hman niin, Rs. 57,69,570chu Livelihood ah, Production System & Micro Enterprise ah Rs. 64,99,335 sen ral a ni bawk.
MJA Champhai District Member te chuan Champhai I hnuaia IWMP Project hmanga hnathawhte chuan an mit a tlungin heng khaw 4 a Watershed Committee member ten an hmalaknate enpui an phur leh an cho lutukte chuan hnathawh thatzia a ti lang tih an sawi a, hnathawh leh hmalakna te a zavaia a hmunah kala an tlawh hman lo chu pawi an tih thu an tarlang.
MJA Champhai District President C. Lalhnunpuia chuan Champhai I Project hnuaia khaw hrang hrang hmalakna chu fakawm a tih thusawiin, IWMP hmalaknaah chuan Mizorama enber niin, Sawrkarina puihna a tawp hnuah pawh hlawhtling zui zel turin duhsakna a hlan a, Champhai District mawina chu heng khaw hrang hrang kutah hian thui tak a innghah thu a sawi.
CC Lalchhuangkima, Project Director, DRDA chuan MJA ten an hmalakna an enpui avangin lawmthu a sawi a, IWMP hlawhtlinna chu PIA te bakah thawktu tak tak, Watershed Committee leh User te kutah a innghat a. Champhai I Project hlawhtlinna leh hmasawnna pawh hi an khaw thahnem ngaih vang te, loneitute tanlakna vang liau liau a nih thusawiin, hetihlai hian hmasawnna tur leh thahnemngaihna tur tam tak a la awm tih a sawi a. Theihtawp chhuah zui zel a tul thu a sawi a ni.

VENGSANGAH IN A KANGRAL VEK :
Nimin tlai dar 3:15 vel khan Champhai Vengsangah chhunkaw 2 luah laiiin bungrua engmah chhuh hman loin akang ral vek.
In kang hi Pu C. Pakunga (L) In niin a fate pahnihin na luah mek a. A chung zawkah hian Pu C. Pakunga fapa Vanlalpeka te chhungkua mi 5 an khawsa a. In hnuai zawkah hian Pu Pakunga te makpa Pu Lalramthara te chhungkua awmin mi 5 an cheng bawk. In kan lai hian Pu C. Pakunga fanu Lalruatzeli te insuih that lai niin In ah hian tumah an awm lova, In kan chhan hi hriat ala ni loh bakah bungraw kang ral zat pawh hriat theih a la ni lo bawk. In a kang a ni tih hriat a nih rual hian Champhai Police leh hmun hrang hrang atangin mipui an pungkhawm nghal a. Fire Dept. pawhin a hmun hi pan mahse In hi a lo kan nasat tawh avangin thelh hman a ni ta lo a ni. Nimin tlai khan Vengsang VC leh NGO te chuan hmalak dan tur ngaihtuahin an thukhawm nghal a ni.

CHAMPHAI NORTH MLA IN NLUP SEM :
Nimin khan Champhai Venglai YMA Hall-ah Champhai North, Champhai South leh Tuichang huam chhunga Agriculture Department hnuaia NLUP 3rd leh 4th Phase tanpuina, beneficiary 664 te hnenah cheng nuai 132.40 chu Parliamentary Secretary Pu TT Zothansanga’n a sem.
NLUP semna inkhawmah hian khuallian Parliamentary Secretary Pu TT Zothansanga chuan thusawiin NLUP chu Congress party mi leh sa tan chauh ni lo, ram pum huapa a mamawhtu apiangte tan a ni a ti a. Mizoram khawchhak lam chu loneih lama Mizoram hmahruaitu nia a hriat thu sawiin loneitute chu Society hmang tangkai tur leh Society tluang taka kalpui a nih theih nan ziaka thil vawn that uar turin a chah bawk. NLUP hlawhtlin thu pawh sawiin khuallian chuan NLUP dawngtute chu a pawisa tam leh tam loh lama teh lova, an tanpuina dawnin a hnathawh theih en zawk turin a chah bawk.
Parliamentary Secretary chuan eirawngbawlna gas-a mipuite harsatna tawh chungchanga hmalakna pawh sawilangin Contractor in gas phurhna truck a ngah tawkloh vang a ni tih hriat a nih hnuah a hma anga supply a kal tluan leh theihna tura hmalak a nih tawh thu a sawi a. Sawrkarin mipuite tana tha tur hria a Mizofed buhfai a supply tir pawh court lamin a dikzia a nemngheh sak tawh thu leh Tourisim lama Champhai District tana hmalakna awm tak taka hmalak tan a nih loh chhan chu Central sawrkarin a kalphung a thlak vang a nih thu a sawi a bawk. Pu TT Zothansanga chuan hmasawnna hnathawh nan sawrkar laipuiin compensation ngailo, a thlawna ram neih theih a zawn thin avangin Champhai District mipuite chu hmasawnna hnathawhna tura ram pek uar turin a ngen bawk.
Nimin a Champhai Venglai YMA Hall-a NLUP sem inkhawm hi Champhai District DAO Pu R.K. Nithanga’n a kaihruai a. DAO chuan NLUP leh NEDP hmanga Mizoram sawrkarin loneih hmanga mipuite khaichhuah a tum dan hrang hrang tarlangin kumin buhseng zawhah zau 15 ah kalpui tum a nih thu a sawi a. Pu B. Lalhmuchhuaka, Champhai SDAO in lawmthu sawiin hun a khar a ni.
NLUP sem ni 3rd leh 4th Phase hnuaia WRC-I & II leh Fu chin thlangtute hnenah a ni a. WRC-I a chhungkaw 401 leh WRC-II hnuaia chhungkaw 253 hnenah Rs. 20,000/- theuha sem niin Fun chin thlangtu chhungkaw 10 hnenah Rs. 16,000/- theuah sem a ni bawk.
NLUP tanpuina semchhuah zawng zawng hi a vaiin Rs. 1,32,40,000/- a ni.

RUIHHLO DOTU CHAMPHAI :
Nimin chawhnu dar 1:30 khan Champhai Mizoram Police, Champhai Sub-Headquarters YMA leh MZP te tangrual buatsaih ruihhlo do beihpui, ‘Ruihhlo Dotu Champhai’ tih bul tanna chu Govt. Champhai College Auditorium-ah neih a ni a. Champhai Superintendent of Police Pu Brijendra Kumar Yadav, IPS chuan zirlai kalkhawmte chu ruitheihthilin taksa leh hriatna thazam a tihchhiat dan Powerpoint Presentation hmangin a entir.
Champhai SP Pu Brijendra Kumar Yadav, IPS chuan zirlai kalkhawmte chu ruihloin mihring taksa leh hriatna thazam a tihchhiat theih dan chipchiar takin a lem nen a entir a. Thalai hmalam hun eng tak nei, ruihlo avanga nun hrehawm taka hmang leh thihna hial tawkte hmangin zirlai kalkhawmte chu ruihlo thatloh zia a zirtir a ni.
‘Ruihhlo Dotu Champhai’ bul tanna ah hian Govt. Champhai College Principal Pu Lalnunmawia, Grace Receiver Home Director Pu Hmingthanzauva leh Sub-Headquarters YMA Vice President Pu F. Lalrinmuana ten thuchah an sawi a. Additional SP Pu V.L. Lura Hauzel, MPS in lawmthu sawiin hun a khar a ni.

FAINA THUCHAH :
Faina hapta 2016 denchhen in Faina lam thuchah/auhla SMS Competition siam a ni a. Champhai District chhunga awm te tan he no 8132830440 ah hian ni 5.10.2016 ral hma in thawn theih a ni a, lawmman tha tak siam a ni dawn a ni.
Hetih lai hian vawiin chawhnu dar 2 ah PHED leh Tourism Dept chuan Swachh Bharat kalpui mekah Champhai Tourist Lodge leh a chhehvel tifaiin an hnatlang dawn.

KAWNGPUI THA LO :
Tunlai hian Aizawl leh Champhai inkar kawng chu a chhia/khuar lai a tam tawh hle a, hei vang hian lirthei lian kawnga tlu leh kawng dangping hmuh tur a awm fo thin. Thuneitu lam ten hmalak a duhawm hle tih thu dawn a ni.
Niminpiah a Champhai District MJA ten Mizoram puma IWMP hnuia hmalakna tha leh hlawhtlng ber Champhai I huamchhunga zirchiang a kal pawh kawng thalo laia lirthei tangin a dan avangin tlaivar deuh tho in Khawzawl thlangah an tang a. DRDA Project Director leh kan Police lam hotute hmalakna avangin Khawzawl IR hotu ten Recovery Van tirin nimin zing lam khan hlai hmuna lirthei tangkhan thahnem tham tak, nunau nawi leh damlo te chu an kaltlang thei hlauh a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol    : Tanky Full (Rs. 60.17/litre)
Diesel    : Tanky Full (Rs. 50.20/litre) 
* Load a lo thlen chuan Free Sale ve ve tur a ni.