A BO A BANG AWMLO A PE LET LEH VEK TURIN SAWRKAR HRIATTIR

Get real time updates directly on you device, subscribe now.

Champhai leh a chheh vela Grape chingtute chuan, Mizoram Excise & Narcotics Department-in sawrkar thu hmua Champwine an man chu, a bo a bang awm lova pe let vek turin Mizoram sawrkar an phut.
Inrinni-a Champhai Grape Growers Society Assembly chuan, Grape chingtute thar chhuah atanga siam chhuah, Champwine an man chu a bo a bang awm lova pe let leh vek turin sawrkar an phut a. Zalen taka wine zawrhchhuah chhunzawm a nih theihna tura sawrkarin inngaihhnathiamnaa a kal tir chu kal tir chhunzawm leh an duh tih sawiin, Sawrkar chu Grape thlai tharah support price pe tur leh an lungawina tawka an thlai rahte leisak turin an phut a. Mizoram SYNOD-in an wine siam chhuahte Sacramental wine-a a hmansak theihna tura hmalak ni se, an ti.
Champhai Grape Growers Society-ah hian chhungkaw 130 inziak lutin, Grape chin hi eizawnna atan an hmang mek a. Champhai Grape Growers Society hian nikum khan Grape chingtute thar chhuah Grape rah Quintal 1050.27 chu ₹ Nuai 50 chuangin an leisak a, hei hi Sacramental Wine leh Champwine siamna atan an hmang a ni.
Tunah hian Champwine Case 1356 (um 32,544), ₹ 32,54,400 man dah khawl an la nei a, hei bakah hian Grape tui sawr Wine-a la siam loh litre Nuai 1,10,000 ₹ 2,93,33,300 man an la dahkhawl mek bawk.
Inrinni zing khan Hnahlan Grape Growers and Processing Cooperative Society pawhin Assembly neiin, a tul angin Champhai Grape Growers Society nen hmalak dan tur rel ho ni se, an ti a. Hnahlan tlangdungah hian Chhungkaw 100 velin eizawnna atan Grape an ching mek a. Hnahlan Winery-ah Grape tui wine-a la siam chhuah loh litre 40,000 vel an dahkhawl mek bawk.
January ni 25 khan The Mizoram Liquor (Prohibition) Draft Rules 2020 siam tura Committee din, Mizoram Liquor Prohibition Rules Drafting Study Committee chuan, Mizorama Grape chingtute thar chhuah atanga Wine siam phal loh an rel a.
Champhai leh Hnahlana Grape chingtute chuan Wine Rules siam turin sawrkar hi nasa takin nawr mah se, March ni 25-a Council of Ministers thukhawmin MLP Rules 2022 a pawm takah Wine chungchang hi telh a nih tak loh avangin dan ding laiah chuan Wine hi siam leh hralh phal a ni ta lo a ni.
Inrinni-a Champhai Grape Growers Society Assembly hian a hnuaia mite hi hruaitu atan an thlang :-
Chairman – HS.Vanlalfakzuala
Vice Chairman – R.Thangseia
Gen. Secy – C.Zohmingliana
Asst. Secretary – R.Laltanpuia
Treasurer – C.Malsawma
Fin. Secretary – C.Thankhuma

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More