A HUN TAKA HNA ZAWH A NIH THEIH NAN HARSATNA ENFIAH NISE TI

Get real time updates directly on you device, subscribe now.

Champhai District chhunga National Bank for Agriculture and Rural Development (NABARD) kaltlanga hmalakna hrang hrangte enfiaha viltu tur August ni 2, 2022 a District Bawrhsap-in a din, District Level Review & Monitoring Committee (DLRMC) chu a vawikhat nan an Chairman Pu James Lalrinchhana, District Bawrhsap hovin nimin chawhnu khan dar 1 khan DC Conference Hall-ah an thukhawm.
Pu James Lalrinchhana chuan Champhai District-a District Level Review & Monitoring Committee a ding ta chu hmasawnna ropui tak a ni tiin, a hlawhtlin theih nana NABARD leh stakeholder line department hotute thawhhona fakawm a ti a. NABARD hnuaia project-te loan pung tlem zawk rula thawh thin a nih thu tarlangin, NABARD duhdan inkaihhruainate zawm chungin hmasawnna ruhrel rotling siam tura hun bituk chhunga hna tan leh zawh fel hman a tul thu a sawi a. Line department hotute chu NABARD nena inrawntlang chung zela an department kaltlanga hmalakna leh hmachhawpte zirchiang thin turin a chah bawk.
Member Secretary Pi H.Lalhmachhuani, DDM, NABARD Champhai chuan Mizorama hetiang thutkhawm hmasa ber Champhai District-a neih a ni thei chu lawmawm a tih thu a sawi a. Champhai District chhunga NABARD project Rural Infrastructure Development Fund (RIDF) leh Warehouse Infrastructure Fund (WIF) kaltlanga hmalakna kalpui mekte a sawifiah bawk.
He hunah hian NABARD project RIDF leh WIF hlutna leh tangkai taka hman a nih theih nana hmalak tulte sawiho a ni a. Line department-te chu an hnuaia NABARD project kalpui mekte zirchianga hemi project hnuaia hmalak theihnate pawh department hotute nena inrawn chunga lo inruahman lawk tura tih an ni a. NABARD project kalpui mekte a hun taka zawhfel a nih theih nante, harsatna awmte enfiaha thuneitu sang zawka thlen a nih theih nan a hmunah tlawha zirchian thin ni se tih a ni bawk.
Tun dinhmunah hian Champhai District hmun hrang hrangah stakeholder line department 12 te kaltlangin RIDF project 45 leh WIF project 8 kalpui mek a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More