AI RUAH SUR VANGIN LONEITU TEN HARSATNA TAWK NASA

Get real time updates directly on you device, subscribe now.

Champhai Zawla loneitute bungseng vanglai a thlen chhoh mek laiin Zirtawpni zan atanga ruah surin buh seng a ti khaihlak a. Hruaikawn ram chhung Kurung zauah chhungkaw 2 te leilet buh la zai loh chu tuiin a chim vek bawk. Zirtawpni kalta zan atanga ruahsur avang hian Khawchhak Tuipui kuang a khat a, tui hian Phai bialte a chim nasa hle a, hmun thenkhatah chuan Buh phalte tuiin a chim laiin hmun thenkhatah erawh chuan tuiin a chim pil hmain a tuihul lamah an seng hman hlawm a ni. Buh phal ruahin a nan te hi vaw leh tur chuan nisa-ah pho leh hmasak te te a ngai tawh thin a, loneitute buh phal letin an buai thei hle a ni. Buh phal leh zawng hian buh fang a tilh nasat thin avang leh a til lo te pawh buh kem a tam thin avangin, a hun taka buh seng aiin buh an thar hlawk lo thin tih loneitute chuan an sawi.
Hetih rual hian buh la zai hman lo, zai hun tawh te pawhin ruahsur avang hian an zai ngam meuh tawh rih lo va, khua tuihul hmaa an buh a ngui hman a nih chuan an beisei ang buh an thar pha lo fo a ni.
Hetih lai hian Champhai District-a Hruaikawn leh Mualkawi khuaa chhungkaw 4 te phai leilet buh seng lai mek chu ruahsur nasa avanga Kurung lui tuilianin a chim a, buhphal te a lenbo bakah buh la zai lohte tuilian hian nasa takin a chim chhia a. Tuilianin Leilet a tihchhiat thenkhat chu buh seng mek te an ni hlawm a. Thu dawn danin tunah hian tui hi a la lian mek zel a, an buh pawh hmuh theih loh khawpin thenkhat chu tuiin a chim a. A neitute leh a hmutu ten buh seng tur pakhatmah a neih loh tur thu an sawi niin PC Lalbiaktluanga, Hruaikawn khua VC Secretary chuan a sawi.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More