Nimin khan Champhai District SP thar, Lalrinpuia Varte leh MJA Champhai District member-te chuan inhmelhriatna hun an hmang a, MJA member-te chuan Champhai District chhunga sorkar inrelbawlna kawng hrang hrang an sawipui.
MJA Champhai hian District chhunga sorkar inrelbawlna kalpui mekah dan leh hrai chak zawka kalpui a nih theih nan Hnahlana Police Station neih thuai a tul dan te, sorkar hmalakna piah lama khaw inkalpawhna kawng laihtlang tam tak awm ta chuan ramngaw a tihchhiat nasat dan te, ramri venghimtu sipai
(Assam Rifles) te chu ramri a lut leh chhuak vengtu an nih lai a; Myanmar ramri depa awm ve tho Saitual, Hnahthial, Lawngtlai leh Siaha District-ahte kalpui a nih loh laia Champhai khawpui chhunga Check Gate siam a, khualzin veivak an enfiah thin chu a uchuak deuh ni a an hriat thu an sawi a.
MJA chuan ramri depa awm khaw tam taka loneituten tangkai taka an hman mek, Manipur State a registration pawh sorkarin a phalsak ni a an hriat, ramdang siam two
wheeler (Kenbo bike) chu dan ang taka phalna pek theih ni se tha an tih thu an sawi a. Ramri depa Police indaih lohna phuhru tura Police (IR) Company khat tal Champhai District-ah dah belh a tul tak zet tih an sawi bawk.
Khawpui chhunga Police Check Gate awm chuan tangkaina tam tak a neih rualin, mipui tan a awlsam zawk nan Champhai Town Area chin, Chhungte-ah emaw sawn ni se tha an tih thu an sawi a. Dan bawhchhetute chungah dan ang taka rorel sak tur leh Dan phal loh thil, ram chhung leh pawn atanga lo lut thin mante chu bothlau awm lo va, dik taka tihral (dispose) thin ni ngei se an duh tih an sawi a. Mipui rawngbawltu an nih anga Police leh Media-te chu inhnerem taka thawhho an duh a. Ramri ah chak zawka dan leh thupek kenkawh a nih theih nan Indo-Myanmar Border Trade Point chu a nih tur ang taka tihchangtlun thuai an duh tih an tarlang bawk.
Police hotute chuan MJA Champhai District te nen thawhhona tha tak an neih thin thu leh, mipui hriat tur thil pawimawh tarlan kawngah thu inhmu takin an kal thin chu lawmawm an tih thu an sawi a. Tunah hian Champhai Police zinga mi Delhi-ah training neiin hun an hmang mek a, Border trade point-ah Passport kaltlanga Visa pek pawh tih theih thuai beisei a ni tih Champhai Police hotute chuan an sawi bawk.
Comments are closed.