Intodelh
Neuva Section huam chhunga Signboard pakhatah chuan ‘Intodelh la, i zahawm sawt ang’ tih a intar kuau mai. He thu ziak hi kan chhiar vek tawh anga, a awmzia leh a pawimawhna, keimahni tan a ni tih erawh kan hre kher lo mai thei. Intodelh hi zahawmna a ni tak tak a nih ngai chuan mi zahawmlo kan va tam awm em ! YMA member, hunawl ngah tak tak, chaw heh fu, nalh tak taka inchei thei reng maite hi kan zahawmlo tihna a kawk deuh ber mai awm e.
Tunlaiin hna a vang tih kan sawi uar hle a, a thawk peih leh taima tan erawh chuan hna hi a vang hlawl lo niin a lang tlat thung si. Intodelh tur hian hna thawh duh bik, awm awl leh zawmthaw taka thawh theih chunga sum hailuh teuh teuh theihna kan zawn ngar ngar vang hian hna a vang kan ti a ni mai zawkin a lang tlat. Chutichungchuan, kan thawh peih der loh leh a nachang kan hriat loh atanga miin hlawhtlinna an hmuhin kan thik leh roh thin bawk vei nen. Intodelh tur hian hunawl a neih theih lohva, nawmchenna leh nuamtawl chungin a intodelh theih hek loh.
Chuvangchuan, YMA member, thalai fing zawk leh chak zawkte hian zahawmna kan neih dawn chuan kan intodelh a ngai tih hria ila, zing thawh bak thawh sawi tur nei lote hian mahni puala sum kan hailuh theihna tur hna i zawng ang u. Thawh peih nei mang der si lova, kan ram chhiat tawh thu kan la sawifo a nih phei chuan mahni mawng kan hlim tihna a nih hmel viau leh nghal. Intodelh lo kan tam lutuk hi ram eichhetu leh ram thanmawh bawk dik tak chu a ni – tho la ding ta che.
Comments are closed.