Buatsaihtute Hmathlir

Faina bawk hi
Mizoram hi a leilung a nghet lo, tlangram awiha awm kan nih avanga kan ram min fo thin hi kan ram balhchhanah tam tak chuan kan puh fo thin. A chhan pakhat chu a ni ngei anga, mahse thil dangah a chhan lian ber nia lang chu kan taima tawk lo hi a ni.
Faina kawngah hian inzirtir thar reng a ngaia, ram neitu mipuite kan pawimawh. Mahni in bul leh a vel, vawnfai kawngah hian tanlak hmasak a ngai hmasa ber pakhat niin a lang. Sipai leh sawrkar hmun fai deuh kan hmuh chuan nuam kan tiin kan ngaina nghal maia, chutiang chuan kan ti ve thei tihlam kan ngaihtuah zui ngai chuang lo. V.C leh YMA ten mahni in leh a vel vawngfaia, hma lo la turin kan inchah fo thin, a sawt mawh khawp mai. Kan khua hi a fai theihna tur chuan chhungtinte mahni in leh a vel vawnfai kawngah tan la hmasa ila, chu chuan naupang thlengin nghawng a nei thui khawp ang.
Khawlai bal leh tawp, khu leh diak hi faina kawngah min tihmelchhetu ber pakhat a ni leh. A bik takin kawng dunga dawr neite hian mahni dawr huam chin tal hi phiatfaiin thianfai thin ila, rei tih ngai lovin kan fai chhunzawm mai te pawn a rinawm. Engpawhnise, khawlaia kan veivahna hrim hrimah hian bawlhhlawh kan paih fimkhur a pawimawh thin khawp mai. TV leh lehkhabu atang tein mi ram fai bikzia kan hmu foa, hetiang kan hmuh fo hi midang chan tur leh neih tur bik a ni ngawt lo. Kan thawha, kan peih phawt chuan kan ramah ngei pawh hian ram fai, nuam leh hrisel hi kan la nei thei dawn a ni. Faina kawngah tan ila thar ang u, Fai hi Pathian anna a ni si a.