Buatsaihtute Khawthlir

Lumen tlachhia!

Kan sawi tawh, kan sawi leh ang. Mizote hian kan hnam zirang kan la nunpui leh kan la chhawm zel chu chhiat ni-a kan inpuih tawnna chauh hi a ni awm e. Mahse chu chuan hmasawn aiin tlakchhiat lam a pan niin a lang.
Lumen zan hi kan ngai pawimawh ta meuh lo ti ila kan tisual awm love. Kuminah kan vanduai a siamin kan lumen ngai kan nei ta nual a. Hetiang zanah hian kan thatna berah mi 30 vel chauh tlaivar kan awm a. Kan member zat nena kan khaikhin chuan lumen zana heti zat chauh tlaivar hi a lawmawm miah loh. Mitthi lumen tlaivar hi midang tih turah kan dah ta deuh emaw ni, tu tih tur bik mah a ni lo, YMA member kan nih phawt chuan kan mawhphurhna a ni. A bikin nula leh tlangval.
Sawi fo tawh angin khawtlanga kan mawhphurhna hi tlawmngaihna hmachhuana kan kalpui a nih chuan kan hlawhchham tual tual ang. Chumi ai chuan kan chanvo leh tih tur angin nei tawh ila kan ziaawm deuh ang. YMA thupui, “Zofate hmasawnna ngaihtuah” hlawhtlinna hi kan hruaitute leh a tlawmngai zualte kutah innghat lovin YMA huam china awm zawng zawngah a ni zawk a, midang tih tura kan dah mai a nih chuan YMA member ni tlak lo ang tluk kan ni hial ang.
Kan sawi ‘fet’ lutuk em? Lumen zana kal hma, inchhunga luh tum loh chungchang em kan sawi lova, kan la ‘fet’ chiah lo! Kan sawi chin erawh zawm ngei a ngai a ni. Kan ram leh kan hnam tluk leh din chhuahna hi kan kut a ni e.