Buatsaihtute Khawthlir

Mimal Zalenna
“Ka zalenna chu ka ta a ni a, tumahin an sawisel thiang lo. Ka inchei dan leh ka khawsa zia paw Emo emaw Goth pawh nise. Ka zalenna a ni a, ka thu thu!” he thu hi thangtharte thukhaw-changah chuan tunlaia a lar ber pawl a ni hial ang.
A huhova awm khawm hi kan peih ta lo emaw ni, thang leh thar kan chhuak zel a, mahni chungnung bera inngaihna kan dah lian tual tual a. Hei hian khawtlang nunah nghawng pawi tak a la nei mawlh ang. Mimal tin hian kan duhdana awm turin zalenna kan nei theuh a, chu chu kan vawnghim tur pawh a ni. Mahse kan zalenna hman danah hian mahni chiah kan inngaihtuah ta niin a lang. Hetia mahni tan chauhva kan zalenna theuh kan hmang dawn a nih chuan khawtlang nunhona hi a chhia ang a, mahni leh kan thil thlakhleh zawng chauh mamawha kan inhriat hunah phei chuan YMA hi kan la umbo ta ve ang.
Chuvang chuan kan zalenna kan hman danah kan fimkhur a tul. Kan zalenna chuan midang hnawksak a ti tur a ni lova, mahni chauh a indah chungnung tur a ni hek lo. Midangin kan zalennaah chuan hlawkna an tel ve ngei ngei tur a ni. Nunhona vaw chhe zawngin kan zalenna hi vawi khat pawh kan chelek tur a ni lo. Chu ai chuan zalenna nei lo law law angah inngai ila, keimahni nun leh midang nun pawh that lam a pan kher lo a nih paw’n chhiat lam chuan kan pantir hauh lovang. Kan sawi na mah mah em? Mahse he thil hi a thleng tan mek a nia, na taka kan sawi loh chuan a mawl zual hian “Ka nun chu ka nun, keima ta a ni.” tih ngaihdan mawlmang tak hi a nei ve hlauh dah ang tih a hlauhawm.

———————————————————–

NIKHAT CHU
BawihpuiaPa
Kum 2008 a rawn herchhuah khan ka rilru leh ka taksa Pathian hnenah hlan chungin engtinnge he hun hi ka hman anga lawmna leh lungngaihna rawn thleng tur hi ka hmachhawn ang tichungin ka ngaihtuahna chu suangtuahna khawvelah kan chenpui a. Chutia tih ber tur pawh hre loa ka awm lai chuan chanchinbu hlui ka hai na lamah Zunzam chanchinbu khawr chhe ve tawh tak mai hi ka hai chhuaka. Hetiang chanchinbu hi a lo chhuak tih reng reng ka hre lo. Editorial board kan bih vat a Editor-ah Chanchinmawia a lo inti kuau mai a. Phur zet maiin Ruantlang Pastor hlui Rev. Chanchinmawia a nih beiseiin a chhungthu chu kan bih vat vat a. Khawi lama Rev. Chanchinmawia, thu mak pui pui leh ril pui pui rem khawmin thu ngaihnawm tak tak chhawpchhuahna a lo ni reng mai a. Tu Chanchinmawia nge maw ni dawn le tichung chuan a chanchinbu Zunzam chu ngaihnawm ti takin ka chhiar chhuak ta dap a.

Nikhat chu Vengthlang khawlaia ka kal lai hian tlangval pakhat Manchester United kawr No. 14 Smith tih inziak (AIG in a sponsor tirh laia mi a nghawng leh Manchester United logo hnuaia a var a an tuam nawn leh chi) a nghawng a var tih pawh hriat tawh mang loh a uk ha, jeans kekawr pawl tak lam pang a hakna a rei ve tawh em avanga a nihna tak pawh langchhuak zo tawh lo leh Burma pheikhawk thawlhthawt dum bun, a hnungah ipte rawn ak a rawn kal thla hnak hnak hi ka hmu a. Chu tlangval chuan ngun takin min en a, a sam a bawrchhawr em avang chuan tunlai tlangval nu leh pate thawhchhuah ringa kekawr kap tifual ve satliah emaw ka ti a. Mahse chu tlangval chuan inthlahrung tak hian “Ka pu Zunleng chanchinbu hi min laksak ve ta che” a rawn ti a. Keichuan kum tir lama Zunzam ka chhiar kha ka rilruah rawn lang nghalin “Zunzam zawk i nei lo maw” ka ti a, nui sak chung chuan “Zunzam kha midangin a hming an lo hman ve tawh avangin Zunleng tiin kan thlak a” tiin min chhang a. Kei chuan remchangah lain chanchinbu hmanga thu leh hla ropui tak mai min rawn chhawpchhuah sak tu Rev. Chanchinmawia lo zawk Zunzam Editor Chanchinmawia ka hriat theihna a nih beiseiin kan zawt nghal zat a. A ni chuan ‘Keimah hi ka nia Chanchinmawia chu’ a rawn ti ta reuh a. Kan awmna vengte kan in hrilh hnuah chuan kan in thlah fel ta a.

In kan thleng a ka mi hmuh chuan ka rilru a luah reng ta mai a. A hmel han en chuan naupangte tunlai mi ve tak anga lang siin thu leh hla ril leh ropui tak a rawn chhamchhuak thei kha mak ka tiin ka mumang emaw ka ti hial a. Tichuan, ka rilru siam felin naupangte pawhin thu leh hla ropui tak an ziah theih chuan Vengthlang Branch YMA huam chhunga lehkha thiam tak tak te hian kan ram leh khawtlang hmasawnna an vei ang te hi chanchinbu hmang hian han ziak ta se kan van sawtpui dawn em tih hi nikhat chu ka ngaihtuah ve mai mai a.