Buatsaihtute Khawthlir

Thu ziak ve teh
Thu lamah harsatna kan tawk chho tlat, thuziak chhuah tur kan nei mang der tawh lo! Kan huam zim te atangin mi pahnih bawr velin ngawrh takin an ziak a, tunah pawh a nih leh tho hi! ziaktu ngai thuziah chhiar reng ai chuan mi dang hnuhma hmuh ve te pawh a chakawm ta alawm.
Duhdan takah chuan YMA phek hnunglam hi chu article hian luah kar tin thei sela, chhiar a manhla lehzual ang. Mahse Champhaia mihring tamna ber atang hian thuziak hi kuminah pahnih-thum vel bak a rawn la lut miah lo va, a zialo lam deuh chu a ni. Nge, vei nei lem lovin kan nung mawl ve tawp? Kan thil vei zawng hi a common lutuk vangin ziah kan tum lo em ni zawk?
Tumah hi thuziak thiam sa-in an piang lo, a ti mi riau chu an awm ve. Mahse thuziak hi ti mi nih vang ngawta tih chi a ni hauh chuang lo, hrat chhuaha leh sual chhuah chi zawk a ni. Chuvang chuan thuziak rawn ziak ringawt mai rawh!
Thenkhatin khawtlang nun an rawn vei tlur tlur laiin a thenin Science leh Bible hi a inkalh lo reng reng tih emaw, emo emaw vel kan buaipui bawk ang a, nuam danglam tak tur asin. Kan sawi fo tawh angin YMA Palai hlawhtlinna leh hlawhchhamna hi a enkawltute kut aiin vengchhung mite kutah a innghat thui zawk a. Tunah thu kan tlachham a, Mizotawng remkhawm thiam tawh phawt chu thu ziak turin kan insawm nawn leh a ni. In rawn tihlawhtling lo a nih vaih chuan a thinin kan inthing ang! Tak tak a, thil tha deuh ziah tum kher pawh a ngai lo, ‘chulam hawi chu kan chhiar khat alawm’ kan tih apiang rawn ziah chawt kha a ni mai. Thu i ziak ang aw!

—————————————————

Thuziak

Theihna leh Duhthlanna
~Chvarte
Kan hmun awl neih hi chu a zim lu deuh a ni. Heti hrim hi chuan keini thu pehhle ching chuan thu kan ziak mum hleithei lo chu a ni e. A phek zauh te hi ngaihtuah chian vak loh chuan a nawr a chakawm leh tut tut thin!
Pathianin mihringte hi he khawvela chengte chunga thunei turin min siam tih kan hre theuh a, hetianga thilsiam chungnung hi chuan theihna chu kan nei sang tur a ni phawt mai.
Mihringte hian theihna nasa tak kan nei a, kan theih zawng pawh a inanglo tih chiang takin kan hria. Tam tak chu lehkha lam ti thei bik riau tura piang an awm a, thil dang zawng aia infiamnaa chungnung an awm bawk a. Thuziak, lemziak, ek paih thlengiin, a ti mi riau kan awm. Thuziak sawi takah chuan tul lo i belh zeuh teh ang. Thuziak mawl ve tawp chi kan awm a, entirnan, keimah. Thu khal leh ngeiawm ziak mi an awm bawk. Entirnan, Uncle^Shabby! Hetiang hian ‘dawn’ inang lo takin he khawvel hi kan luahlum a ni.
Mahse kan theihna hi thil pawimawh ber a ni lo va, hetah hian kan innghat tur a ni lo.Mihringin theihna kan neih zinga kan chungnun berna hi mi tichhetu a ni duh chawk. Lehkha thiam thei lutuk, lehkha zir tur ni awm hrima piang zingah hian hlawhtling an awm mang lo nia. A hlawhtling hi chu lehkha thiam thei lo, a peiha peih ve hrim hrim hi an ni zawk. Chuvang chu kan theihna hi kan hman thiam loh phawt chuan kan tan hmelma a ni. Mahni theihna chhuang pawl kan la awm ta zel a, kan theihna kan chhuan a, kan theihna zawna tha ber anga kan inngaih chiah hian tlak chhiat lam kan pan duh fo. ‘Ka tha ber lo deuh’ tih hian tha ber nihna min hauhtir thin. Tha ber chungchang hi chu ni danga sawiah khek ang.
Kan theihna aia pawimawh leh a hmasa zawk hi a awm a, chu chu kan duhthlanna a ni. Kan theihna lama ke pen zel tura duh kan thlang a nih chuan mihringin a chim theih sang ber kan chim hial thei a ni. Mahse duhthlanna chuan kan theihna aiin kan duhna leh kan tuina a ngai pawimawh zawk a, kan theihna aiin kan tuina leh kan duh lam kan thlan hian kan tifuh zawk fo bawk. Kan theihna aiin kan duh zawng leh kan tuina hian min tichak zawk a, mahse a hautak lai ber chu midang zawng aia thawhrim a ngai thung a ni. Thil dang zawng aia infiamna ti mi zawkin zirna lam a thlan tlat chuan midang aia a zir nasat a ngai a, thil dangah pawh chutiang zelin. Duhthlannaah hian mi dang duh dan leh kan ngaihdan ni lo zawng kan seng lut tur a ni lo. Kan seng luh vaih chuan kan tui lohna leh kan duhzawng ni miah lovah kan inbat hnawk thei. I theihna aiin i duhthlanna i ngai pawimawh fo tur a ni. Kan theihna kan hman danah pawh duhthlanna chu a pawiawh ta zel bawk Theihna aiin duthlanna hi a pawimawh zawk bawk a, duh i thlang dawn a nih chuan i ngaihtuahna fim tak nen ngaihtuah la, chumi hnuah fim takin ngaihtuah nawn leh rawh. Vawikhat duh i thlan sual hian i kawng a tichhe vek thei.
Kan dam chhunga kan nun hman khaikhawmna hi chu thil ho te a ni: I duh thlang fel la, hnunglam hawilet tawh suh tih mai hi.