Nimina CDLIP thukhawm chuan dan lova Myanmar atanga bungraw lo lut chu la dan chhunzawm zel an rel.
Champhai District Lirthei Inzawmkhawm Pawl chu nimin khan an kal leh zel dan tur relin an thukhawm a. Dan lova bungraw lak luh leh Champhai atanga chhuak turte la dan chhunzawm zel ni se, tiin an rel a. Zawhna chhangin an pawl president Liantluanga chuan, sorkar phal loh thil hrim hrim ruihhlo leh ralthuam a ni emaw eitur leh thawmhnaw pawh ni se, sorkar hian ang khat vekin en se tih hi kan duh ber a ni, a ti a. Kawngpui an dan loh bakah tih luihnain lirthei an endik lo tih sawiin, dan lova bungraw lut leh chhuak an dang mai niin a sawi bawk.
CDLIP te hian tun thla, July ni 16 atang khan Myanmar atanga dan lova bungraw lut leh Champhai atanga chhuak tur hi an dang tan a. Tun dinhmunah harsatna lian tham thleng a la awm lo a. Chawhmeh chu Mizoram hmun dang atanga lakluh niin, Myanmar atanga lakluh aiin Mizoram chhunga a phurh kualna man a san zawk avangin thlai man hi a to vat rin a ni a. Eichawp leh thawmhnaw erawh chu bungraw dan hma hian an lo inlakhawl tawh thung niin thu dawn a ni.
CDLIP hian ramria insumdawn tawnna dan ang taka zalen taka a kal theihna tur leh, Champhai Kudama Kuhva rah chhek khawlsa te Vairengte thlenga zalen taka phurh ngiatin bungraw lut leh chhuak tur hi an dang a ni.
Comments are closed.