CEMENT MISTIRI MIZO NGEI NEIH BELH NUAL

Get real time updates directly on you device, subscribe now.

Mizoram Youth Commission (MYC), State Institute for Rural Development and Panchayati Raj (SIRD & PR) Mizoram leh District Skill Committee, Chanmphai District tangkawp buatsaih Cement Mistiri Training, September ni 23, 2021 atanga neih chu nimin chawhnu khan Circuit House Conference Hall Champhaiah khar a ni. He hun hi Addl. DC Champhai Pu Henry C.Lalrawnkima chuan khuallian niin a hmanpui a, Mistiri training chhuakte hnenah Certificate leh Mistiri bungruate a hlan a ni.
Khuallian Pu Henry C.Lalrawnkima chuan MYC, SIRD&PR leh District Skill Committee tangkawpin Gosen Home a awmte tana thiamthil zirna hun remchang tak an buatsaih chu lawmawm a tih thu sawiin, Champhai tan thiamna kawnga inzirtirna thil chhinchhiah tlak tak a nih thu a sawi a. Mihringin kan tangkaina hmun apiang nuam kan tih thin avangin thiamna neih a hlu a, sum leh pai harsa tak chunga sawrkarin Mistiri training buaipuia a huaihawt chu hlu a tih thu a sawi a. A taka a hlawhtlinna leh hlawkna lanna tur tak tak zawk chu training paltlangtute an nih thu sawiin, training chhuak satliah mai nih tum lova sawrkar puihna leh ruahmannate tihlawhtlingtu nih tum theuh turin a fuih a. Hna an thawhna kawngah uluk leh rilru pe taka thawk tura fuihin, miten an kuthnu an faka chhawrzui zel an chak theih nan midangte aia uluk leh ngaihtuahna seng tam zawk turin a chah bawk.
Addl. DC Champhai chuan chhawrtlak, rinngam leh kalbosan pawh ngam khawpa rinawm leh taima nih tum theuh tura training chhuakte chu fuihin, midangte hnuchhui leh enfiahpui ngai reng nih tum lo tur leh, thurawn leh zilhna dawnsawn hrehlo tura hrilhin, chu chu indanglamna tur a ni, a ti a. Kut themthiamna mai bakah thluak themthiamna neih tel a pawimawh thu pawh sawiin, hun awl neih chang pawhin hnathawhna kawnga hmasawnna awm theite ngaihtuah bang chuang lo turin a chah a. Gosen Home atanga Mistiri training chhuakte chu thuawihna, mahni inthununna leh tumruhna nei tura fuihin, midangte hnenah kut themthiamna tangkai taka hman theih tur leh eizawnna tlak nei an ni tih hmuhtir thei tura tanla sauh sauh turin a chah a. Home atanga an chhuah hunah pawh an thiamnate tangkai taka hmang a, insamthat leh intundin nana hmang theuh thei turin duhsakna a hlan a ni.
He hun hi Pu Obed Lalmalsawma, SDC chuan kaihruaiin kalkhawmte lawmna thu a sawi a. Er.Malsawmsanga, Local Instructor, Studio Hamlet, Champhaiin training report a pe a. Pu Lalmuanpuia, Chairman, Gosen Home, Champhai Zote hnen atangin lawmthu sawina ngaihthlak a ni bawk.
Mizoram Youth Commission (MYC), State Institute for Rural Development and Panchayati Raj (SIRD & PR) Mizoram leh District Skill Committee, Chanmphai District tangkawp buatsaih Cement Mistiri Training hi September ni 23, 2021 atang khan Gosen Home, Champhai Zote-ah neih tan a ni a, training-ah hian Gosen Home-a awm mi 40 thlanchhuahte an tel a. Training chhung hian SIRD &PR Mizoram leh local partner Studio Hamlet, Champhai ten eizawnna tlak Cement Mistiri ni thei tura pawimawh hrang hrangte theory leh practical class neihpuiin an zirtir thin a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More