Champhai

champhai tualchhung chanchinthar

ZOTLANGAH CHENNA IN 5 KANG RAL :

Nimin chawhma dar 10:30 vel khan Champhai Zotlangah In 5 chu bungrua engmah chuh hman lohin a kang ral vek.
Kangmei hi Pu C. Lallianpuia te innluah lai atanga chhuak nia hriat a ni a, kangmei chhuahchhan erawh hriat a ni lo. Vanneihthlak takin inhliam emaw, thi emaw an awm lo hlauh. In kangte hi Assam Type vek a ni a. In pa 4 te hi Pu C. Vanlalhmuaka, LCN Zokhawpui neiu In niin Pu C. Lallianpuia te chhungkaw luah lai In 2, Pu Lalrinfela te luah lai, Pi Vanlalruati te chhungkaw luah lai leh Pu Seldinga (fam) In Pi Lalsiamkim te chhungkaw luah lai chu bungrua engmah chuh hman lohin a kang ral vek a. Pu Seldinga (fam) te luahlai erawh a kan nasat hmain an thelh mih hman a ni.
Kangmei a chhuak a ni tih hriat a nih veleh hian Zotlang khawtlang mipui pungkhawmin Fire Dept. te hriattir nghal an ni a. Kangmei hi a nasat tawh em avangin thelh mih theih a ni ta lo va, Pu Seldinga te chhungkaw luah lai RCC Building erawh chu a kan nasat hmain thelh mih hman a ni a, bungrua chuh hman mahse, In chhung ceiling leh inchhung cheina bungrua eng emaw zat a kang chhe hman bawk. Zotlang Branch YMA hruaitute chuan Fire Dept. te thleng tlai nise chuan Pu Seldinga (fam) te chhungkaw luahlai pawh chhan hman ani dawn lo va, in tam zawk a kan ngei tur thu an sawi.
Nimin khan ZOtlang khawtlang chuan in kang bungrua te senghawiin hnatlang an nei nghal a, hnatlangte thingpui inna tur Rs. 4000 leh a tula hman tur Silpauline 4, DC Office atangin pek a ni a, Khawzawl VC te chuan Rs. 500 pe in, SYMA President hlui C. Lalbiakzauva’n Rs. 1000 a pe bawk. Kangmei tuartetanpuina pe tur te chuan R. Lalhmingliani, Zotlang VC Member hnenah a hlawma pek tur a ni ang. Nizan khan NGO hrang hrang leh VC te chuan hma an lak zel dan tur rel hoin an thukhawm bawk.

KANGMEI VEN HAPTA :
District Level Committee on Fire Presention Champhai District lo rel tawh angin Champhaia Kangmei Ven Hapta hawnna hun chu karleh Thawhtanni chawhma dar 10:30  khian DFO Office tualah neih a ni ang.

JUBILEE LAWM :
Nimin khan Champhai Bethel Pastor Bial chuan Silver Jubilee an lawm. Silver Jubilee lawmna inkhawm hi Bial Chairman Upa PC Lalhmingliana’n kaihruaiin, Bial Secretary Upa Lalbiaksiama hnen atangin Bial Report ngaihthlak a ni a, Upa B. Hranghliran Souvenir tlangzarhin Upa K. Vanlalhmuaka hnen atangin Pathian thuchah ngaihthlak a ni bawk. Pathian Biak Inkhawm zawh hian Silver Jubilee lungphun chu Bialtu Pastor Rev. F. Lalrinnungan hawngin thingpui ruai nen Jubilee hi an lawm zui a ni.
Champhai Bethel Pastor Bial hi kum 1994 khan Champhai Vengthlang Pastor Bial atangin an indang tan a, tunah hian Kohhran 6 – Bethel, Tlangsam, Vengthar, Zion Veng, New Champhai leh TLangsam North te an awm mek a. Kohhran Upa 38, Tualchhung Upa 15 leh Pem Upa 5 an awm mek a, Kohhran chhungkua 1012 awmin member 4918 an awm mek a; Dan zawhkim 3362 an awm mek bawk.

LIRTHEI CHESUAL :
Nimin zing dar 6:30 vel khan Zokhawthar to Aizawl Maxi Cab Service MZ04 A- 0985, Rosangzuala khalh  Aizawl atanga Zokhawthar pan mek chu Khankawn Police Check Gate thlangah a chesual a, vanneihthlak takin thi leh hliam na lutuk an awm lo nia thu dawn a ni.

MIZORAM AIAWH :
5th RSC National Karate Championship tun thla ni 16-17 chhunga Kerela State a neih turah Mizoram aiawhin Champhai atangin Karate zirlai ankal dawn a. Vawiin chawhnu dar 2:30 hian Tourish Lodge ah anmahni thlahna leh fuihna hun chu Champhai District Karate Assn. chuan an buatsaih dawn.

KAWNG KAWHHMUHNA TUR TAR DAWN  :
UD&PA Department chuan Champhai khawpui chhungah kawng kawhhmuhna tur Road Signage tarna tur an buaipui mek.
Mipui veivak ten kalna kawng awlsam zawka an hriat theihna tur Road Signage siamna tur hikawngpui hrulah laih mek a ni a. Ruahman dan chuan Champhai District Hospital  kawnga DC Office pengah tar a ni dawn a, Vengsang Biak In bul, TT Road peng, Dawrkaikawn, Upa Darthangvung Point leh DK Traffic Point, Bethel kawn, New Champhai kawn leh New Champhai  a Tlangsam leh Zote kawng infinnaah te, Zotlang kawng, Jail Veng, Petrol Pump leh Khankawnah tar a ni dawn bawk.
Hetihlai hian UD&PA  Dept. hnuaia Swachh Bharat Urban chuan CHamphai khawpui chhung faina atan hma an la mek bawk a. Nimin zing khan lirthei hrang hrangah bawlhhlawh a bawma paih thin tur te leh faina lam inzirtirna thuziak an tar a. Vantlang inthiarna tihfai te, khawchhung phiah  fai bakah faina lam hawiin naupang tana Recitation intihsiakna te buatsaih an tum bawk.

SELAM KHUAAH DAM TAKIN HAW :
Selam khua atanga nikum April thlaa chin hriat lohva bo Sawngsawmlala s/o Thangzahata chu an khuaah ni 5.2.2019 (Thawhlehni) khan dam takin a kir leh.
Sawngsawmlala hi a  awmna chin hriat loh avangin thla hmasa khan Selam Branch YMA te chuan Media kaltlangin a zawn hna an thawk a. Thawhlehni khan Selam khuaah hian a kir leh niin an thuchhuah chuan a tarlang.
Sawngsawmlala hi Myanmar ah kalin hna a han thawk a, an hnathawh hi a laklawh avangin a kir leh hun tura a tiamah hian a kir thei ta lova, a hnathawhna hmunah hian inbiakpawhna tha awm loh avangin a chanchin hi a chhungte a hrilh thei ta lo a ni tih an thuchhuah chuan a tarlang.

VAWK LAKLUH KHAP :
Champhai District Magistrate Liansangzuala Chhakchhuak chuan Mizorama PRRS leng avangin ramdang (Myanmar etc.) atanga Vawk, Vawksa leh vawksa atanga siam eng thil mah lalut lo tura khapna thupek chu Thawhtanni atanga thla hnih chhung atan Champhai District chhunga hman turin a chhuah a ni.

TUIALHTHEI DINHMUN :
Mizofed
Pretrol : Free Sale
Diesel : Nil
RC Filling Station :
Petrol : Service Tanky
Diesel : Service Tanky
RD Filling Station :
Petrol : Service Tanky
Diesel : Service Tanky