CHAMPHAI-A KUHVA RAH TANGKANG MEK CHUNGCHANGAH SAWRKAR HMALA TURIN DUH

Nimin zing dar 6:00 atang khan CDLIP chuan Myanmar atanga dan lova bungraw lut tur leh Champhai atanga chhuak tur an dang tan a; Champhai Kudam hrang hranga Kuhva chhekkhawl sa te, Vairengte thleng zalen taka a kal theihna turin sorkarin hma la se an duh tih an sawi.
Champhai Lirthei Inzawmkhawm Pawl General Assembly-in a lo rel tawh angin, Myanmar atanga dan lova bungraw lut leh Champhai atanga phurh chhuah turte chu nimin atang khan dan tan a ni a. CPLIP chuan Ramri kana insumdawn tawnna chu dan hnuaiah zalen takin kal se an duh ber tih sawiin, mumal zawka bungrua lak luh a nih theihna tura hma la an nih thu an sawi a. Dan lova bungraw lut zingah International Border trade awi nungtu, Kuhva chauh mal mana tihtawp tum a ni chu inthlei bikna, Champhai District mipui inrep char tumna leh itisikna vang nia an ngaih thu an sawi
bawk.
CDLIP chuan an hmalakna chu dan lova bungrua leh ruihhlo lakluh dan kawngah Police tha tichakah an inngaih thu sawiin, Ruihhlo hluar zel tur venna leh khualzin te zalen taka an kal theihna tura Mizoram Police Duty post an rin tawk thu sawiin, Assam Rifles-CDLIP ten Dan lova bungraw lut leh chhuak an dang tan in an duhna hmun hmuna duty post an siam chu mipui zalenna rahbehna, nekchepna leh palzutnaah an ngai tih sawiin, an duty-na hmun chu Sorkarin sawnsak se an duh tih an sawi bawk.
CDLIP hnuaia Association hrang hrangte chuan an huam chhung theuhah Myanmar atanga bungraw lut tur leh Champhai atanga chhuak tur hi dangin, Champhai Police Chekgate leh Dungtlang Police Checkgate bulah te an duty bawk a. Hetih lai hian Indo-Myanmar border trade centre Zokhawthar-a lirthei inzawmkhawm pawl erawh chu CDLIP-ah hian an tel ve loh avangin bungraw lut tur hi dan a ni lo va. Zokhawthar atanga bungraw kal tur hi Melbuk leh Mualkawiah dan a ni thung.
CDLIP President Liantluanga chuan zawhna chhangin, Bungraw lut tur leh chhuak tur chu tiam chin awm lova dan a nih tur thu sawiin, Myanmar atangin kuhva leh sumdawng bungraw dangte zalen takin lakluh ni thei se an duh a. Champhai Kudam hrang hranga Kuhva chhekkhawl sa te, Vairengte
thlenga zalen taka a kal theihna turin sorkarin hma la se an duh ber tih a sawi bawk.