CHAMPHAI A SAWRKAR HMUN THAR TUR MINISTER IN EN

Get real time updates directly on you device, subscribe now.

Law & Judicial Minister TJ Lalnuntluanga chuan, Champhai-a District Court Complex sakna tur leh Conservator of Forests (CF) Office leh chenna sakna tur hmunhmate Inrinni khan a tlawh a; hemi hnu hian Khelthliah lui tuilakna tur a tlawh bawk a. Official-te leh khawtlang hruaitute nen inrawnkhawmna leh hmalak dan turte an sawiho.
Champhai Vengsang Mualbawk rama YMA Field hmun leh a chheh vel, District Court hmun tura ruahman a enfiahnaah Law Minister chuan, tunlai thiamna leh model thar ber hmanga District Court Complex Champhai siam tum a nih thu leh, Mizorama a hmasa ber, zahawm leh model ni thei tura ruahmanna siam a ni, a ti a.
Senso leh hmalak dan turte tha taka duangin Sawrkar laipuiah thlen tum a nih thu leh, ruahmanna siam kawngah zirchian nan Judicial Officer leh Architect-te nen Delhi District Court, Saket a mi an tlawh thu a sawi bawk.
Environment Forest & Climate Change Department changtu Minister ni bawk chuan Divisional Forest Officer (DFO) chung, Conservator of Forests (CF) Eastern Circle Champhaia dahfel tura ruahmanna siam fel a ni tawh tih a sawi a. CF Office leh Quarters sakna tur sum dahfel a ni a, tul angte buaipui fel a nih veleh hna tan thuai tum a ni, a ti a. Office sak chhunga luah lailawk tur atan RO Quarters chei tum a nih thu a sawi.
Champhaia tui harsa chho mek zel tihziaawm a nih theih nan theihtawp chhuah mek zel a nih thu sawiin, Dilkawn leh Zokhawtharah tui connection pek tan niin, Melbuk leh Zotlangah kalpui chhoh mek a ni, a ti a. Ruantlang leh Mualvengah tui mamawh duh anga neih a nih loh avangin Saisihlui atanga lak dan tur kum 2019 ah en a ni a. Duhthusam a nih loh avangin Khelthliah lui nen a infin hnu tui tam zawkna chu nizung chakna hmang tangkaia lak tum a ni, a ti a. PHE Dept-in zirchianna an neih atangin project an siam ang a, chak taka bawhzui tum a ni, a ti.
Minister TJ Lalnuntluanga hi District Bawrhsap James Lalrinchhana bakah Law & Judicial, Forest, PWD, Revenue leh PHE Department hotu ten an tawiawm a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More