Champhai ah Covid-19 Vaccine

Get real time updates directly on you device, subscribe now.

Covid-19 hri laka invenna tur vaccine pek beihpui thlak thawhkhatna chu nimin chawhma khan CMO Champhai huamchhungah kalpui tan a ni a. Nimin khan Mizoram hmun hrang hrangah hri danna hi 1029 pek niin, nimin thleng khan Mizoram pumah hri danna hi mi 2537 hnenah pek a ni tawh.
Sawrkar laipuiin Covid-19 vaccine a pek chhuah atanga a ni 6-na, nimin khan Champhai District Hospital-ah Covid-19 vaccine hi a dawng hmasa tura sawrkar laipuiin a thlan, Covid-19 beih letna kawnga ral hma tawng – Health Care Worker-te hnenah pek tan a ni a, District Bawrhsap, Maria CT Zuali chuan khual lian niin, vaccine pek tur hi a hawng a ni.
Khual lian chuan, Natna dang thenkhat chu a venna leh a damdawi hmuh chhuah nan pawh kum tam tak
a ngaih laiin, Covid-19 vaccine erawh chu a natna kan hmelhriat atanga a kum khatnaa siam chhuah nghal a ni thei chu a vanneihthlak hle a ni, a ti a. India ram hmun kilkhawr ber pawl – Champhai district-ah Covid-19 vaccine pek chhuah mai theih tura buatsaih a ni ta chu district tana mel lung pawimawh tak a nih thu sawiin, vaccine pek chhuah tur chu mithiamte’n zir chianna leh enchhinna vawi duai lo hmanga a him a ni tih an finfiah hnua pek chhuah a nih avangin a hlauhawm loh a ni, a ti a. Covid-19 chuan chhiatna tam tak thlen mah se, engkim a ti chhe vek bik lo a. Inkharkhip vang khan kawng tam takah intuaitharna hun kan neih theih phah a ni, a ti bawk.
Hawnna hun kaihruaitu – Dr. R. Lianmawia, CMO chuan, Champhai District chhungah Covid-19 kai mi 94
hmuh chhuah niin enkawl dam kim vek tawh an ni tih a sawi a. CMO Champhai Bial chhungah vaccine pekna tura ruat Session site 16 zinga 4-ahte nimin khan vaccine pek bul tan a nih thu a sawi a. A hawn ni-ah hian District Hospital Champhai-ah mi 100, Mimbung PHC-ah mi 43, Ngopa CHC-ah mi 34 leh NE Khawdungsei PHC-ah mi 44, an vaiin mi 221-te vaccine pek hmasak tum a ni a, a ti. Second dose ni 28 hnuah pek leh tur a nih thu sawiin, chumi hnu ni 14 atangin Covid-19 laka taksa ral vengtu a insiam chhoh tan tur thu a sawi bawk.
District Immunization Officer Dr PB Zodingliana chuan, Covid vaccine pek
hmasak turte chu hriselna lama thawktute an nih thu sawiin, CMO Champhai huamchhung atangin Health Care Worker mi 1292 te ziahluh an ni tawh tih a sawi a. Vaccine pek tur chu Antigen base a nih thu leh 0.5 ml tihrawla pek tur a ni, a ti a.
Champhai khawpui chhungah vaccine pekna tur atan Session site 2, District Hospital Champhai leh Roseland School, Champhai Vengthlang-te buatsaih a ni tih a tarlang bawk.
Champhai District-a Covid-19 vaccine la hmasa ber ni turin nimin khan Dr Zatluanga, District Medical Superintendent, District Hospital Champhai hnenah vaccine hi pek a ni a. Hemi hnu hian thawktu dangte pek zui niin, CMO Champhai huam chhungah a thawhkhatna kaltlang hian vaccine dose 750 pek chhuah tura ruahman a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More