CHAMPHAI-AH HRI IN ZIAAWM LAM PAN THEILO

0

Get real time updates directly on you device, subscribe now.

Champhaiah ni hnih chhungin Covid-19 hri kai 80 chuang hmuhchhuah belh leh a ni.
Inrinni khan Rapid Antigen Test hmangin hri kai mi 31 hmuhchhuah belh leh a ni a. Zion Vengah mi 7, Venglai leh Bethel Vengah 6 ve ve, Electric Vengah 4, Vengtharah 3, Zotlangah 2 leh Hmunhmeltha, Vengsang leh New Champhai-ah pakhat theuh hmuhchhuah a ni a. Zirtawp zan khan TrueNat hmangin hri kai mi 9 hmuhchhuah an ni a.
Vengthlangah mi 4, Bethel-ah 3 leh Venglai leh Vengtharah pakhat ve ve hmuhchhuah an ni bawk. Nimin lamah hri kai hi 54 hmuh belh leh a ni bawk.
Heti hian Champhai District chhunga hri kai hmuh chhuah chu mi 1,957 an tling tawh a. Inrinni khan mi 57 leh nimin khan 76 te’n enkawlna hmun chhuahsanin enkawl dam hi 1,363 an awm tawh a. Hri kai hmuh chhuah zat atanga chhutin enkawl dam zat hi za zelah 69.64 a ni a, hri kai enkawl lai hi 593 an la awm mek.
Tun hnai thla 3 chhungin Champhaiah hri kai hmuh chhuah an pung nasa hle a. July thla khan hri kai hi 233 hmuhchhuah niin, thla hmasa August khan 882 hmuh chhuah an ni a, tun thla ni 12 chhung lek hian hri kai 583 hmuhchhuah an ni tawh a, tun thla chhung bikah chawhrualin ni tin hri kai hi 51 hmuhchhuah ziah ang a la ni.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More