Champhai ah National Voters Day hmang

Get real time updates directly on you device, subscribe now.

Election Commission of India din champha phak lawmna hun – National Voters’ Day(NVD) tum 11-na chu nimin khan ram chhung hmun dangte rualin Champhai-ah pawh hman a ni a. ‘Making our voters empowered, Vigilant, Safe and Informed’ tih thupui hmanga National Voters’ Day lawmna hun I&PR Auditorium-a hman chu Bawrhsap leh District Election Officer(DEO) ni bawk, Pi Maria C.T. Zuali chuan a hmanpui.
District Election Officer, Pi Maria C.T. Zuali chuan, kum 2011 atanga hman tan – National Voters’ Day pual hian district mipuite chibai a buk a. National Voters’ Day kal tlangin mipuite chu kan ai awha ro reltute thlang tura pen chhuak tura zirtir thin kan ni, a ti a. Vote nei tharte chu a lawmpui thu sawiin, mahni chhia leh tha hriatna hmanga ram hruaitu tur thlanga vote thlak thin turin a chah a; therhlo dangte beiseia mahni vote ti chingpen lo turin a fuih bawk. Hei bakah hian ECI-in a hranpaa thawktu a ngah tawk loh thu tar langin, inthlan buaipuia pui bawmtu hrang hrangte chu fakawm a tih thu sawiin, BLO-te chungah lawm thu a sawi a. Vote nei zawng zawngte duhsakna hlanin, mipui siam sawrkar tha din turin dikna leh chanvo an neihte tangkai taka hmang chhuak thiam turin a chah nghal a ni.
He hun hi Pu R.Lalnghakliana, Addl. DC Champhai chuan a kaihruai a. Pu Lalnunfela Chawngthu, Election Officer Champhai chuan Electoral Literacy Club(ELC) tih thupui hmangin khawl kal tlanga zirtirna(Powerpoint Presentation) a pe a. General Voter EPIC ID neite tan online hmanga download mai theih Digital Voter ID, e-EPIC tih chu vawiinah tlangzarh a nih thu leh mipuite zirtirna Video Clip siam tum a nih thu a sawi bawk.
Pi Esther Leihang, SDC, AERO, 24-Champhai South(ST) A/C Champhai chuan National Voters’ Day puala Chief Election Commissioner thu chah a chhiar chhuak a. Pu Obed Lalmalsawma, SDC Champhai kaihhruainain National Voters’ Day thu tiam lak a ni bawk.
He hunah hian Champhai District chhunga Assembly Constituency pathum atanga Booth Level Officer ti tha zual thlan chhuahte hnenah khual lianin chawi mawina thu ziah leh sum fai cheng 3,000 a hlan a; Vote nei tharte hnenah EPIC a sem chhuak nghal bawk a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More