CHAMPHAI-AH SOLAR ROOF TOP UAR TURIN DUH

0

Get real time updates directly on you device, subscribe now.

India ramin zalenna a hmuh kum 75-na tlin hriatrengna leh lawmna kûtpui, Azadi Ka Amrit Mahotsav (AKAM) hnuaia Ministry of Power, New and Renewable Energy hmalakna kaltlangin nimin chawhnu dar 2:00 khan Champhai DC Conference Hall-ah Kawlphetha Kûtpui – India Eng, Hmalam Hun Eng, Ujjwal Bharat – Ujjwal Bhavishya Power @ 2047 lawmna hun hman a ni. He hun hi Health & Family Welfare Board Vice Chairman Dr. ZR Thiamsanga, MLA chuan khuallian niin a hmanpui a. He hunah hian India ramin zalenna a hmuh hnua State leh Central Sawrkar tangkawp kaltlanga power sector hnuaia hmalakna hrang hrangte tarlana inzirtirna neih a ni.
Khuallian Dr. ZR Thiamsanga chuan ram hmasawn leh changkang zelah power supply tel lovin hnathawh a harsat thu leh nitin khawsak kawngah nghawng nasa tak a neih thu a sawi a. Power sector hnuaia hmalakna leh inzirtirna neih a ni chu lawmawm tiin bengvar thlak a tih thu a sawi a, hmasawnna a thlen ngei a beisei a. Champhai District-a power supply mumal leh tha a awm theih nana P&E Department-te hmalakna fakawm tiin, an hmalakna leh thurawnte tha taka thlawp a tul a ni, a ti a. Electric power renchem thiam a tul thu sawiin, tul lo leh hun lova hman bansan a tul thu pawh a sawi a. Electric power supply tha leh hnianghnar kan neih theih nana thawktute inpekna fakawm tiin, a bik takin vanduaina tawka nunna chantate hriatreng an nih tawh tur thu a sawi bawk.
District Bawrhsap Pu James Lalrinchhana chuan India ramah power sector hmasawnna chak taka kalpui mek zel a nih thu sawiin, India ram kum 100 tlinna tur 2047 ah power hnianghnar zawka neih a nih theih nan tanlak zel a ni, a ti a. Kawlphetha Kûtpui chu India ram zalenna kum 75 tlin lawmna pualin power sector-a hmalakna hrang hrang inzirtirna leh inhrilhhriatna atana duan a nih thu sawiin, hun hlawkthlak tak hman a nih a beisei thu a sawi a. Mipuite chu an tana sawrkar hmalakna leh chanvo neihte chhawr tangkai thiam tur leh, an tih ve tur mawhphurhnate rinawm taka hlenchhuah tum turin a sawm a ni.
Thusawitu dang Pu Lalchhanhima, SE, P&E Champhai chuan Champhai District electric power dinhmun sawifiahin, Champhai District chhung khua 58 ah electric connection mai bakah in tinah service connection pek a ni, a ti a. Champhai District-ah 132 KV Sub-Station 1, 33 KV Sub-Sation 5 bakah khaw tina power lakluh nan 11 KV Sub-Station bun a nih thu a sawi a. Champhaia power lakluh lo dawngsawngtu tur 12.5 MVA Power Transformer tihchangtlun nan 12.5 MVA Power Transformer dang kumin September thla zawh hmaa bunfel tum a ni a, zawhfel a nih chuan kum 10 dang daih min chawmzo thei dawn a ni, a ti a. District chhungah Distribution Transformer 178 a awm thu a sawi bawk a. Solar Roof top uar angaih thu sawiin, tun dinhmunah Champhaiah Solar Roof top siam mi 11 chauh an awm thu a tarlang a. East Lungdar to South Khawbung 33 KV line siamna tur buaipui mek a nih thu leh, tuna electric power lakluhna line mai bakah lakluhna tur line dang pawh buaipui zel a nih thu a sawi bawk.
He hun hi Addl. DC Pu Henry C. Lalrawnkima chuan a kaihruai a. District Nodal Officer Pu AK Baruah, Chief Manager, Powergrid-in program neih chhante a sawifiah hnuah Powergrid buatsaih ram puma in tin tih en, khaw tin tih en, electric current semdarh dan, Capacity Addition (NTPC), One Nation Grid (PGCIL), Renewable Energy (SECI) leh Consumer Rights (PRC) chungchanga hmalakna film tawi siamte thlirho a ni a. A thlawna electric current pawhsakte hnen atangin an thil tawn leh lawmthu sawinate ngaihthlak a ni a. Pu John L. Khiangte, SDO, P&E Champhai chuan Champhai Power Division hnuaia Centrally Sponsored Scheme kalpui mekte a sawifiah a. Saubhagya Scheme kaltlangin Champhai District-ah electric current a thlawna pawhsak in 1006 a awm thu a tarlang a. LAD Office Staff ten inzirtirna lam hawi lemchan tawi Nukkad Natak an entir a. Cultural performance-te neih niin Pi Esther Leihang, DLAO Champhai chuan lawmthu sawiin hun a khar a ni.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More