Champhaia Petrol Pump panga-na ni turin nimin khan Tiroma Filling Station, Kanan venga mi chu H.Zakima’n a hawng.
Tiroma Filling Station hawnna hun hi R.Lalmuanawma kaihhruainaa hman niin, Filling Station neitu H. Vanlalpeka’n Filling Station din tura hma an lak dan tlangpui a sawi a.
H.Zakima chuan Tiroma Filling Station hi a hawng a ni. Kum 2018 December-ah IOC in Advertisement a chhuah bawhzuiin, kum 2019 January thlaah dilna thehluh a ni a, February thlaah a dilte chu Silchar-ah koh khawm niin, a dawng tur thum vawr a ni a, Aizawl nu thlan a nih hnuah harsatna awm avangin July thlaah Guwahati ah thum vawr tha lehin, diltu tam tak zingah H.Vanlalpeka te hian an dawng ta a. Kum 2021 January atangin a hmun hma hi laih tan a ni a, kum 2022 February atangin a hmun tur sak hna an thawk tan a, September khan thawk zovin nimin khan hawn a ni ta a ni.
Tiroma Filling Station atanga mipui hnena Petrol leh Diesel hralhchhuah a nih hma in District Legal Metrology Department chuan tehna hrang hrang hmangin an endik nghal a. Mipui hnena hralh chhuah theiha an ngaih hnuah nimin vek khan Oil te hi an pechhuak nghal a, Petrol litre 1 Cheng 97.59 leh Diesel litre 1 Cheng 83.76 a hralhchhuah a ni.
Comments are closed.