Nehru Yuva Kendra (NYK), Champhai District hnuaia District Advisory Committee on Youth Programme (DACYP) chu nimin khan an Chairman, Maria CT Zuali, District Bawrhsap hoin DC Conference Hall-ah an thukhawm.
Bawrhsap Maria CT Zuali chuan India ram chu thalai tam tak awmna a nih avangin, thalaite chu chhawr tangkai thiam a tul thu leh Nehru Yuva Kendra kaltlanga thalaite chawikanna tura hmalakna hrang hrangte a taka tihhlawhtlin a nih theihna tura tanlak a tul tih a sawi a. Champhai district thalaite zinga ruihhlo leh a kaihnawih hluar lutuk tiziaawm tura theihtawp chuah a tul tih sawiin, Pawl hrang hrang hruaitute chu midangte entawn tlak ni tur leh hma hruai a, midangte zirtirtu nih tum theuh turin a chah a. Zirna kawngah tun aia tanlak nasat a tul thu leh, tui thianghlim hnianghnar zawka nei thei tura tanlak ngaih pawimawh hmasaka neih a tul tak zet tih a sawi bawk. Faina nunpui leh Covid-19 hri leng chungchanga hriattur tulte a zau thei ang bera mipui zirtirna pek a tul tih pawh sawiin, thalaite phur taka an pen chhuah theih nan hotu theuhte chu hma hruai a, fuih phurtu ni turin a chah bawk.
Dinesh Jangid, District Youth Coordinator, Member Secretary, District Advisory Committee on Youth Programme chuan NYK dinhmun leh hmalakna hrang hrangte a tarlang a. Kum 2020- 21 chhunga hmalakna tur ‘Annual Action Plan, 2020-21’ chu a
pharh nghal a; hei hi uluk taka ngaihtuah a nih hnuah pawm a ni.
Thukhawm chuan nakkum January Ni 12-a National Youth Day lawm tur chu thalaite’n tangkai zawka an hman theihna tur thlira programme duan ni se, an ti a. National Education Policy
2020 leh Fit India Movement chu thalai zingah uar zawka zirtir a, mihring tana hrisel tak Moringa thing chu Champhai district-a chin a nih theihna turin mi thiamte rawn chunga hmalak ni se, an ti bawk. He hunah hian pawl hrang hrang hmalaknate ngaihthlak a ni bawk.
Comments are closed.