CHAMPHAI DISTRICT HIGH SCHOOL SPORTS-AH GOVT GM HIGH SCHOOL PAKHATNA

Get real time updates directly on you device, subscribe now.

Champhai District High School Sports – 2022, a vawi 19-na October ni 4 atanga neih kharna hun chu chu vawiin chhun dar 12:30 khan Chhangphut Field-ah neih a ni a. He hun hi District Bawrhsap Pu James Lalrinchhana, Chairman, District Education Committee chuan khuallian niin a hmanpui.

Khuallian Pu James Lalrinchhana chuan Champhai District chhunga District Level High School Sports tluang taka zawh fel a ni thei chu lawmawm a tih thu a sawi a. Infiamna huangah chak zawk leh chak lo zawk an awm thin avangin chaklo zawkte pawh tuar dan thiam a, intihsiakna neih leh hun atan champion tura tha zawka inpuahchahna kalpui turte leh taksa sawizawi leh ruihhlo laka fihlim tum turtein a fuih a. Zirtirtute chu zirlaiten humsual an dai loh nana theihtawp chhuah tur leh, mahni school theuhah helam kawnga zirtirna pe tam turin a chah bawk a. Zirlaite chu zirna mai bakah sports hmanga eizawng tlak ni tura tulte hrilhin, ei leh in uluk a, exercise la tha tur leh ruihhlo laka fihlim tum turin zirlai kalkhawmte chu a chah a ni.

Champhai District chhung High School 29 telna, District Level High School Sports kharna hun hi Pu Zirmawia Ralte, Vice Chairman Organising Committee chuan a kaihruai a. A pumpuiah Govt. GM High Sçhool chuan Gold medal 5, Silver 2 leh Bronze 1, avaiin medal 8 la in an champion a. Vangchhia High School chuan Gold 3 leh Silver 2, avaiin medal 5 la in pahnihna an ni a. PES Zotlang chuan Gold 2, Silver 4 leh Bronze 1, avaiin medal 7 la in pathumna an ni. Champhai District High School Sports-ah hian Best Athlete atan mipaah ZD Lalhunruata, Govt. GM High School chu thlan niin, hmeichhiaah Lalngaihdami, Vangchhia High School chu Best Athlete atan thlan a ni.

Champhai District High School Sports- 2022 hi intihsiakna chi hrang hrang – Football (boys), Volleyball (girls), Athletics (boys & girls) leh Badminton (boys & girls) hmangtein neih a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More