Champhai District MJA ten hripui dona kawnga hmalakna fakawm ti

Get real time updates directly on you device, subscribe now.

Inrinni khan MJA Champhai District chuan General Body meeting neiin Krismas leh Kumthar
vuakvetah chanchinbu chawlh dan tur an rel.
He hun hi Lalhlupuia, MJA Vice President chuan a kaihhruai a. Kumin Krismas leh Kumthar vuakveta chanchinbu chawlh dan tur an rel a. Kumin December ni 22 thleng chhuahin, Krismas leh kumthar inkar an awl ang a, January ni 11-ah tualchhung chanchinbute chhuah chhunzawm turin an rel a. Sorkar thu
pawimawh chhuah tur bik a awm a nih erawh chuan chumi ni bikah chuan chhuah ni se, an ti.
Kumin hian hripui leng vangin Chanchinbu buatsaihtu ten harsatna tam tak an tawh avang leh, hrileng laka mipui himna tura theihtawp chhuahin sum leh pai lamah harsatna an tawh nasat avangin kumdanga MJA hminga luanchhuahna an neih thin, kuminah an ti thei ta lo chu pawi an tih thu an tarlang bawk.
He hunah hian resolution siamin Khawvel pum huap hripui leng (Covid-19) in India leh Mizoram min chimbuai mek lai leh, mi nuai tam tak an thih laiin, Pathian venhimna ropui tak chang a, Mizoram mipui zingah hri avanga nunna chan kan la awm mumal lo chu lawmawm kan ti a. Mizoram sorkar, Dept hrang
hrang, Kohhran leh NGO te hripui dona kawnga hmalak dan hi ropui kan tiin fakawm kan ti hle, an ti a. Hetihlai hian Champhai leh Khawzawl District-a Covid-19 dona kawnga hmalatute thawhrimna a fakawmin Covid-19 hri kai awm lohna Distirct a kan awm thei thinte hi a ropui kan tiin kan lawm hle. Hripui leng hian min la chimbuai zel dawn nia a lan avangin Mizo mipui te kan lo him zel theih nan sorkar leh district thuneitute thupek zawm a, an hmalaakna thlawp a, fimkhurna vawng nung zel turin MJA Champhai District chuan mitin kan ngen, an ti.
He thutkhawmah hian MJA member thar Laldinpuii, Rihlipui Editor chu an lalut nghal bawk. MJA te hian chawhnu lamah Champhai District I&PR Staff te nen advance Christmas an hmang a, he hunah hian Lalhmingmawia Pachuau, MJA President leh Lallawmkima Thangluah, DIRPO ten thu an sawi a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More