Champhai District naupang chunga hlei len tamna

Get real time updates directly on you device, subscribe now.

Nimin khan District Child Protection Unit (DCPU) Champhai District leh Women & Child Development, Govt. of Mizoram tangkawp bul tumin naupang humhimna kawnga inzirtirna leh infuih tharna hun – Meeting With Block Level Child Protection Committee chu BDO Conference Hall, Ruantlang-ah Champhai RD Block huam chhunga khawtlang hruaitute nen hman a ni.
Nimina hun hman hi R. Lalnunkimi, BDO Champhai chuan a kaihruai a. BDO chuan VC-te chu naupang venhim kawngah mawhphurhna sang tak an neih thu sawiin, a rang lamin an bial chhung theuhah Child Protection Committee din turin a chah a. Zirna lamah tan lak nasat a ngaih thu leh, faina ngaih pawimawh zual deuh deuh a tul thu a sawi bawk.
Lalsiammawii, LPO DCPO, Champhai chuan kal khawmte chu Integrated Child Protection Scheme leh Juvenile Justice (Care and Protection of Children) Act, 2015 chungchang a zirtir a. Hmun dang aiin Champhai District-ah naupang chunga hlei lenna a thlen tam thu leh, naupang thil ti sual case a tam zual tih a sawi a.
Khawtlang hruaitu kal khawmte chu an bial chhung mipui hnenah naupang thil tisual leh hur sualna thila a tuartu naupang nihna hriat theih tura an veng emaw an nu leh pate hming emaw, social media-a tarlang lo leh sawi darh lo tura zirtir tam turin a chah bawk.
R. Vanlalsawmi, Social Worker, DCPU, Champhai chuan POCSO Act, 2012 sawi fiahin zirtirna a pe a. Vanlalhruaii, PO (NIC) DCPU, Champhai chuan Community Based Organizations (CBO) hnathawh leh mawhphurhnate a sawifiah bawk.
He hunah hian naupang venhim kawnga thawktu te, Champhai RD Block hnuaia VCP leh Secretary-te an kal tha hle.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More