Champhai leilet zawla In leh Kudam sa te chu thiat tur leh dan an bawhchhiat man chawi turin Champhai District Collector chuan a hriattir.
Champhai leilet zawl huam chhunga dan lova In leh Kudam sa mi 54 te chu Champhai District Collector, Maria CT Zuali chuan December ni 30, 2020 khan thiat turin a lo hriattir tawh a, April ni 7 khan tichhuak nawn lehin, hriattirna an dawn anga an thiat lo a nih chuan pass tihtawp a nih tur thu tarlan a ni bawk.
Heng bakah hian Danin rem a tih loh ang a In leh Kudam an sak avangin Square metre khatah Rs. 1,000 zel chawi tura hriattir an ni bawk a. Dan lova Kudam leh In sa hi Khankawn leh Zotlang inkar huam chhungah mi 16 awmin, New Champhai leh Zotlang inkarah mi 38 an awm bawk a. Dan phal loha In leh Kudam sakna hmun hi sq. Metre 72,455.38 a zau niin, an sum chawi tur belhkhawm hi Rs. 7,24,55,380 zet a ni. Dan bawhchhiate’n an pawisa chawi tur hi District Collector Office-ah emaw Settlement Office, Land Revenue & Settlement Office-ah emaw tun thla ral hmaa thehlut vek tura hriattir an ni.
Champhai District Collector Maria CT Zuali chuan, Dan pakhat aia tam bawhchhia an nih avangin dan kengkawhtu tan chuan en liam mai mai theih a ni lo tih sawiin, Dan angin an chungah hmalak loh theih loh a ni tih a sawi bawk.
Comments are closed.