CHAMPHAI-IN RT-PCR KHAWL NEI TA

0

Get real time updates directly on you device, subscribe now.

UNICEF in ICMR kaltlanga RT-PCR khawl a rawn pek chu District Hospital Champhaia hman turin tukin khan Law & Judicial Minister Pu T.J. Lalnuntluanga, Champhai South bialtu MLA chuan District Hospital hotute kutah a hlan.
RT-PCR inhlanna ah hian Khuallian Pu T.J. Lalnuntluanga chuan District Hospital Champhaia RT-PCR khawl dah tur thlen fela inhlan a ni ta chu District tana ni chhin chhiah tlak leh pawi mawh tak a ni tiin, RT-PCR khawl Champhaia bun a nih theihna tura Chief Minister leh Health Minister-te hmalaknaah lawmthu a sawi. Rampum anga Covid-19 hrileng beihna kawng a NGO, Kohhran leh khawtlang hruaituten sawrkar an tawiawm thinnaah lawmthu a sawi bawk.
A nihna tur ang taka khawl bunfel turin khawl mai piah lamah tul leh bawhzui turte a awm nual a, mithiamte leh khawtlang hruaitute nena inrawn chunga lungrual taka hmalak tlan zel a ngai a ni, a ti a.
Inrawnkhawmna leh sawihona tha tak neia District tana khawl chhawrnahawm leh tangkai tak tur bun a nih ngei a beisei thu sawiin RT- PCR khawl chu DMS leh CMO Champhaite kutah a hlan nghal ta a ni.
Khualzahawm Pu Ramthanmawia, East Tuipui bial MLA chuan District tana tul leh pawimawhte District MLA ten lungrual taka an buaipui thin thu sawiin, hripui leng vangin hmanraw thar leh tih dan phung tharte a awm zel a, hmasawnna peng a awm zel a ni, a ti. Khawl bunfel a nih theihna kawnga hmalakna tur leh tul ang te Pu H. Lalfakawma, Sr. E.E, H&FW Department, Doctor leh NGO hruaitute an sawipui a. Khawl bun lailawkna tur atana ruat Eye Ward building leh tuna TrueNat khawl bunna leh hnathawh mekna hmun, nakin lawka RT PCR khawl bun nghehna tura ruat hmunhmate enfiah niin, hmalak dan turte sawiho a ni a.
Mizoram sawrkar hmalakna leh mamawhnate hriain ICMR/DHR chuan UNICEF kaltlangin testing centre-te tih changtlung nan a thlawna RT-PCR rawn dah theih turin kum 2020 khan UNICEF ah rawtna a thlen a. August ni 1, 2021 khan ICMR chuan UNICEF kaltlang in Champhai District Hospital-ah RT PCR khawl an dah tur thu District Hospital Champhai a rawn hriattir a ni.
September ni 25, 2021 khan UNICEF kaltlanga dawn tur RT-PCR khawl 4 zinga 3 te chuan ZMC an rawn thleng a. A dawngtu tur inbel sa vek niin, ZMC a mi tur 2 leh Lunglei District Hospital a mi tur 1 te an ni. Champhai
District Hospital-a dah tur a tih fel vek tawh chu AIIMS, New Delhi-a an RT-PCR khawl a kan chhiat thut avangin AIIMS ah an pe ta thung a, Champhai District Hospital atan a tih vek tawh RT-PCR khawl chu remruatna dang siam thut a nih tak avangin a rawn thleng ta lo a ni.
Hetiang a nih tak avang hian District Hospital Champhaia RT- PCR khawl dah a nih theih nan District MLA te leh sawrkarin a tul angte bawhzuiin hma an la a, ZMC a dah tur zinga pakhat chu Champhaia dah turin a company Bio RAD representative-te zuk hriattir an ni a, an ni rem tihna thlapin September ni 29, 2021 khan Champhai District Bialtu MLA te
chuan ZMC atangin an la chhuak a, nimin zing khan District Hospital Champhaia phurh thlena hman tura hlan a ni ta a ni.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More