CHAMPHAI KANAN VC TEN MIZORAM CHAMPION NIH LAWM

0

Get real time updates directly on you device, subscribe now.

LBS Suzuki Inter Village Football Tournament, 2022 neih zawh taka Champion, Champhai Kanan VC Team ten an Champion lawmna hun PD Sena Memorial Hall, Kanan Venga an buatsaih chu Law & Judicial Minister Pu T.J Lalnuntluanga, Champhai South bialtu MLA chuan khuallian niin nimin khan a hmanpui. He hunah hian DSYO Champhai Pu Lalnunfela Chawngthu chu khualzahawm a ni.
Khuallian Pu TJ. Lalnuntluanga chuan Kanan VC team-in football khelh dan mawi tak entir chunga Mizorama thiam ber an ni tih an lantir thei chu fakawm tiin, chapo lo tak leh tlawmna nun nei chunga champion rahbi thleng an kai thei chu chhuanawm a tih thu a sawi a. Player leh Coaching Staff-te inpekna leh mipuite atanga tawiawmna nasa tak a hmu chu lawmawm tiin, Pathian venna leh kaihhruaina changin kan zavaia tanrualna avanga hnehna chang thei kan ni, a ti a. Tournament chhunga Kanan VC team-te innghahna Electric Veng Branch YMA Aizawlte dawnsawnna leh tawiawmna avangin lawmthu a sawi bawk a. Kanan khawtlang tanrualna fakawm tiin, chhawmnung zel turin a chah bawk.
Law & Judicial Minister chuan infiammite chu inthununna tha chhawmnung zel tur leh ruihhlo leh a kaihhnawih laka fihlim tum zel turin a chah a. An nun dante uluk a, an hmabak ti chhe thei laka inthiar fihlim thin turin a fuih a. Hnam dangte dah chungnung bik lova, chapo na tel lo, inrintawkna leh rilru dah chungnunna nei turin a chah a. Eizawnna tha hmu thei tura inthlahdah mai lova insumtheihna nunpui turin a chah bawk a. Puih tlak leh chhawmdawl tlakte puih leh buaipui kawngah theihtawp chhuahpui a inhuam thu a sawi bawk a ni.
Hripui leng vanga infiamna hmunhma hrang hrangte siam hna duh anga kalpui theih a nih loh hnuah Sports kaltlangin infiamna hmunhma cheibawl leh tihchangtlun kawngah theihtawp chhuah a tanlak tum a nih thu a sawi a. Kanan Venga infiamna hmunhma tihchangtlun nan a tul angte bawhzui zel a nih thu sawiin, Champhaia Sports discipline hrang hrangte tihchangtlun nan Sports Department kaltlangin project siam a nih thu a sawi bawk a. District mipuite chu Sports tihchangtlun kawnga thawhhopuiah sawmin, an finchhuahna leh tawiawmna a mamawh thu a sawi bawk.
Khualzahawm Pu Lalnunfela Chawngthu, DSYO Champhai chuan team 204 lai zinga Champhai Kanan VC team-te champion an ni thei chu lawmawm tiin, District tihmingthatute chhuanawm a ti a. Champhai District chhunga football hmasawnna, hruaitute inpekna leh mipuite phurpuina chu entawntlak a tih thu a sawi a. Tunhnaia football inelna lian State Games, MFA Cup leh LBS Suzuki All Mizoram Inter Village Football Tournament Champion nihna Champhai District-in a chang chu chhuanawm tiin, chhawmnung zel tuma theihtawp chhuah a tul thu a sawi bawk.
Mizoram chhunga Sports Department hmalakna leh Champhai atanga infiammite dinhmunte tarlangin, sports chu eizawnna tlak leh a ti tak takte tana hlawhtlinn a ni a, inthununna leh hrehawmna tam tak paltlang chauhin hlawhtlinna a chan theih a ni, a ti a. An hlawhtlinnaah duh tawk mai lova theihtawp chhuah chhunzawm turin a fuih bawk a. Sports Department kaltlanga Sports infrastructure tihchangtlun nana hmalak dante sawiin, hemi hnuaia Champhai District chhunga hmalakna tur project thehluhte a sawi lang bawk.
He hun hi Pu Lalthansanga, Kanan VCP chuan a kaihruai a. Kanan/Chhungte khaw Lal thlahte, Kanan VC Team Coach leh Manager-te hnen atangin thusawi ngaihthlak a ni a. Player leh Coaching Staff-te hnenah chawimawina thilpek hlan a ni a. Pu H.Lalenkawla, Kanan VC Secretary-in lawmthu sawiin hun a khar a. Hemi hnu hian Champion lawmna ruai theh a ni.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More