Champhai Keilungliah khuahna tur sum 2nd Installment Rs. Vbc. 11 chuang hmu

Get real time updates directly on you device, subscribe now.

Keilungliah khuah kal mek chu vawiin khan Champhai District NGO Co-ordination Committee chuan tlawhin, hna thawh dan a hmunah kalin an en fiah a. MJA Champhai District-te’n an tawiawm.

Keilungliah tui khuah hi Kum 2018 October thla khan lungphum phum niin, Kum 2020 March thlaa zawh hman tura duan ni mah se, Kum 2021 January-ah pawh thawh zawh a la ni lo a. Hna thawh zawh hun tura ruahman anga thawh zawh a nih loh avangin, kumin March thlaa thawh zawh turin hna thawh hun chhung hi pawh sei belh leh a ni.

NGO Co-ordination Committee, Champhai-te chuan, hna thawh zawh hun tura ruahman a zawh hnu – thla 9 hnu thlenga hna thawh dan te en fiahin, Keilungliah tui khuah hi a puitling lo ang tih hlauhthawnna a lian hle tih an sawi a. Sum lak chhuah tawh zat ni-a sawi leh hna thawh dan chu in mil lo ni-a an hriat avanga a hmun ngeia tlawh an nih thu an sawi bawk.

Contractor lam chuan, Covid 19 avanga duh anga hna thawh a sawt theih loh thu leh hna thawk tur indaih lohna avanga an tum anga hna thawh chak theih a nih loh thu an sawi a. Ni khatah Nuai 20 chauh Treasury lamah a kal tlang theih avang leh Cheque dam hun chhung rei lo bawk si chu an harsatna tawh pakhat a nih thu hna thawktu lam chuan an sawi bawk. Thu dawnnain a sawi danin – a tira SS Construction hminga contract chhangtute’n hna hi an thawh chhunzawm theih loh avangin, SS Construction-te hian Kum 2019 December thla khan la let lehin tui khuah hna hi an thawh chhunzawm leh a ni.

Tui khuah hna thawktute hi chak zawka hna thawk tura hriattirna pek an nih hnuah, tun thla ni 14 khan ni 15 chhunga insawi fiah turin Show Cause Notice pek an ni tawh a. Kumin March thla thlenga hna thawh zawh hun tur pawhsei sak an nih chhunga an thawh zawh loh chuan hna thawhna tur sum pek tur atanga za zela 1.5 chu hrensak tura vaukhan an ni tawh bawk. Tun din hmunah chuan hna hi tluang taka thawh chhunzawm theih tawh beisei a ni a; NLCPR Scheme Estimate Amount Nuai 1,988 atangin Nodal Dept., PHED Dept. chuan Nuai 700 la chhuak tawhin, tunah hian Cheng Nuai 180 an la hrensak mek a, a bak zawng hi hna thawktute hnenah pek chhuah tawh niin, tunah hian hna thawhna tur sum, 2nd installment Vbc. 11 chu dawn a ni leh tawh bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More