Champhai Grape Growers Society leh Hnahlan Grape Grower & Processing Co-operative Society Ltd. chuan, an Winery a sawr turin Grape rah hmin tha an la khawm zel a. Zirtawpni thleng khan Champhai leh Hnahlan ah hian grape leikhawl quintal sang hnih dawn a awm tawh a ni.
Hnahlan a Grape chingtute tharchhuah quintal 1439.49 chu leikhawl tawhin Hnahlan Grape Grower & Processing Co-operative Society Ltd. chuan Grape rah an lakkhawm te hi an sawr chhunzawm nghal zel a, kum kalta a mi Litre sing thum zet hralhchhuah loh an la kawl mek bawk. Hnahlan khuaah hian Grape thar tam zual te chu Pu C.Lalrampara qtl 199.35, Pu C.Vanlalhriata qtl 108.22 leh Pu V.Lalthlamuana qtl 106.96 te an ni a, an la lak chhunzawm zel a ni. Champhai Grape Growers Society pawhin kartin Nilaini apiangin Grape rah hi an leikhawl thin a, tun dinhmunah tum 4 leikhawl tawhin, Quintal 467.49 an leikhawl tawh a. Hengte hi Winery khawlah sawr chhunzawm nghal zel a ni a, tunkar Nilaini khian Grape rah hi an lei
chhunzawm leh dawn a ni.
Champhai ah hian tun hun thlenga Grape thar tam zual te chu Quintal 34.76 thartu Pu C.Zohmingliana Champhai Vengsang, Quintal 30.76 thartu Pu JH.Lalropuia Mualkawi leh quintal 26.02 thartu Pu Lalrotluanga, Champhai Vengsang te an ni a. Tarlan tawh angin Champhai Winery ah hian bottle a dahsa leh Grape tui sawr sa Litre thahnem tak hralhchhuah loh a awm mek bawk.
Comments are closed.