Champhai leh Khawbungah Republic Day ropui taka hman a ni

Get real time updates directly on you device, subscribe now.

India Republic Day vawi 72-na lawmna chu ram chhung hmun dangte rualin nimin khan Champhai Dist.-ah pawh hman niin, Champhai district chhunga a lawmna pui ber chu nimin zing dar 8 khan DC Bungalow, Jericho Garden, Keifangtlang-ah hman a ni a. Champhai District Bawrhsap, Pi Maria C.T. Zuali chu khuallian niin, hnam puan zar a pawt pharh.
Bawrhsap, Pi Maria C.T. Zuali chuan, India ramin ram dang awpna hnuai atanga zalenna a hmuh hnua danpui neia mahni-a ro inrel hran ram anih lawmna Republic Day pualin District mipuite, Covid-19 hripui beih letna kawnga thawktute leh ram venhim hna thawktute chibai a buk a. Champhai District chhunga Sawrkar hnathawkte chu India Danpui Article 36-51 hnuaia Directive Principles of the State Policy hre thar leh tura chahin, theih tawpa mipuite tana hna thawka tan la thar turin a sawm a. India ram ropui tak – hnam leh tawng hrang hrang awmnaa mipui rorelna hlawhtling taka kalpui ani thei leh Constitution of India vawiin thlenga nung taka kalpui ani chu thil ropui leh chhinchhiahtlak tak a ni, tiin, mipuite chu inpumkhatna leh inthurualna ngai pawimawh tur leh sual do kawnga tangrual thiam turin a chah a. Champhai District chu leilung mawina leh hlutna ngah tak a nih avangin a hlutna chu haichhuah thiam a pawimawh tur thu sawiin, Champhai District mawina leh pipute hmun hluite chu neitu thinlung pua humhalhna chang hriat a tul thu a sawi a. Intodelhna tham Leilet leh Phaizawl thahnem takte chu tangkai zawka hman anih theihna tura tanlak a tul thu pawh sawiin, mipuite chu State dang leh ram dangte kuta innghat mai lo tur leh eizawnna nghet leh rintlak, Sawrkar pawmpui ngei nei tura taimakna leh tumruhna nunpui tlat turin a chah bawk.
Bawrhsap chuan Republic Day-ah hian Champhai District atanga chhuak sipaite hriat reng an nih thu sawiin, ram leh hnam tana mi huaisen chawimawina semchhuah tak zinga Subedar K.Laldingliana, Kahrawt Veng-a tel ve leh India sipai chawimawina sang – Sena Medal a dawng chu chhuanawm a tih thu a sawi a. Kum kal ta chhungin Champhai District-in lirnghing tum engemawzah a tuar thu leh vanduaina avangin in leh lo chhia tam tak a awm thu sawiin, Lirnghing natna hmun Zone 5-a awm Mizorama Lir a nghing fo chuan insak dan kawngah leh insakna hmun tur ram thlan kawngahte fimkhur a tulzia min hriat thar tir se, nakin zela kan him tlan nan a tangkai thei dawn a ni, a ti bawk.
Nimina Republic Day lawmna hunah hian Champhai khawpui chhunga fai inelna – Swachh Survekshan 2020 kalpui zawh taka a ti tha thlan chhuah hrang hrangte hnenah Bawrhsapin chawimawina thuziak leh pawisa fai a hlan nghal bawk a.
Veng fai inelna huangah Kahrawt veng chu pakhatna niin, Kanan-in dawtin, Zote chu pathumna an ni a. Sikul fai berah Govt. R. Hranga High School, Kanan veng chu thlan niin, Presbyterian English School, Zotlang leh Govt Primary SchooI-I, Kahrawt-te’n an dawt ve leh a. Sawrkar Office fai berah Superintendent of Police Office, Champhai chu thlan a ni a, Deputy Commissioner Office, Champhai chu pahnihna niin, Sub-Divisional Officer, Champhai Power Sub-Division Office chuan pathumna an hauh a.
District Hospital Champhai chu damdawi in fai berah thlan niin, Hotel fai berah Hotel Chawngthu, Vengthlang thlan a ni a. Restaurant fai inelnaah Gilgal Restaurant, Venglai chuan pakhatna hauhin, Bazar fai ber thlannaah Bazarpui, Rahsi veng chu thlan a ni bawk.
Nimin zing vek khan Khawbungah pawh BDO Pisa tualah Republic Day lawmna hun hman a ni.
Khawbunga Republic Day lawmna hunah hian Khuallian – Pu Benjamin Zalawma Ralte, Khawbung BDO chuan hnam puanzar a pawt pharh a, Khawbung BDO chuan thu sawiin, Khawbung bial chhunga Department hrang hrang kaltlanga Sawrkar hmalaknate tarlangin, hmasawnna duhawm tam tak thleng mek chu mipui tan a nih angin mipuiin chhawr tangkai zel se a duh tih a sawi a. Khawbung RD Block-in hmasawnna hrang hrang a hmuhte chu kan ramin zalenna a hmuh vang a ni tiin, heng hmasawnna hrang hrangte hi ngawih bopui mai lo a, nasa lehzuala hmasawnna hmu thei turin mitinte chu Sawrkar Department hrang hrangte tichaktu ni theuh turin a sawm bawk.
Republic Day hmannaah hian Khawbung-a Department hrang hrang hotu lute an tel a. Dungtlang Police Station atangin OC hoin an telpui bawk a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More