CHAMPHAI MAMAWH THLEN TUR SAWI KHAWM
Champhai NGO Coordination Committee thukhawm chuan, Champhaiah a rang thei ang bera RTPCR khawl bun tur leh DIG Eastern Range Champhaia dah turin sawrkar an phut tih an sawi
NGO Coordination Committee thukhawm chuan RTPCR khawl UNICEF-in ICMR kaltlanga Champhaia dah tur RTPCR khawl Mizoram sawrkar a pek chu a theih dan ang anga bun ngei a tul’ an ti a, Champhai-a tlawmngai Pawl hrang hrang October ni 1-a thukhawmin thutlukna a lo siam tawh angin RTPCR Laboratory hi a hma thei ang bera chhawr theih tura hma la turin sawrkar an phut tih an sawi. NGO CC chuan DIG Eastern Range Mizoram Sawrkarin dah a tum chungchangah Champhai District chu International leh Inter State Border a nih avangin Zoram mipui himna atana DIG Eastern Range chu Champhaia dah ngei turin Mizoram sawrkar an phut tih an sawi bawk.
Heng bakah hian NGO CC Champhai chuan Mizoram buh leh bal thar chhuah kawnga kan intodelh loh zia hriain Champhai leilet zawl humhalh leh ruahman chhoh a nih mek laia mimal hlawkna um avanga Champhai leilet zawl tichereu zawnga hmalakna kal mek chu tha an tih loh thu an sawi a, Champhai District Magistrate thuchhuak anga buh tharna atan mai ni lo, thlai leh Sangha thar chhuah nana hmun tha a nih angin WRC pata pek an nih ang ngeia hman an duh thu sawiin sawrkar hmalakna duh lo zawnga hmalakna awm chu an dodal zel dawn tih an sawi bawk.
Champhai NGO CC chuan District hmasawnna ruhrel pawimawh Champhai Auditorium puitling, Keilungliah tuikhuah Project, Zokhawthar World Bank road, Champhai Greater Water Supply Scheme Phase II, Champhai Master plan leh National Hihgway No. 6 te chu hun biathliah kum 2 chhung ngeia thawk zo tur leh a nihna dan tur ang taka thawh an phut tih an sawi bawk.
Comments are closed.