CHAMPHAI MASTERPLAN 2041 CHUNGCHANG SAWIHO

Get real time updates directly on you device, subscribe now.

Champhai Master Plan 2041 buatsaih mek chungchang sawiho a ni a, rawtna leh tul dang hrang hrangte rela ngaihtuahin, nimin khan Champhai Town Planning & Development Committee chu Chairman TJ Lalnuntluanga, Law & Judicial Minister hovin DC Conference Hall-ah an thukhawm.
Law & Judicial Minister TJ Lalnuntluanga chuan, Champhai Master Plan chu khawpui thang zel mamawh leh tul angte buaipui a,
ruahmanna tha tak nen awmze neia Champhai khawpui huam chhung tana hmalakna a ni, a ti a. Thuneitute pawmpui phawt a ngaih avangin Master Plan duan mekah N.Khawbung, Ngur leh Mualkawi a tel ve ta lo tih a sawi a. Master Plan siam kaltlangin sum leh pai awm sa hmanga hmasawnna ruhrel thawh nghal tur tihna a nih lo tih sawiin, Champhai Master Plan chu hmathlir thui tak neia duan, harsatna awm lova hmun ruat lawk anga hmasawnna kalpui nghal a nih theihna tura duan lawkna a ni tih hre tel turin mipui a chah a. Champhai tana tha ber tur tinzawna siam a ni, a ti.
Minister chuan, tun thla November ni 17, 2021 hian Master Plan duan chhin ‘Draft Champhai Master Plan 2041’ chu peihfel a, a duh apiang en theih turin DC Office leh DUDO Office, Champhai bakah Town & Country Planning Office, UD&PA Aizawl-ah te en theiha chhawpchhuah a nih tur thu a sawi a. Mipui atanga rawtna leh thu thlen duhte a awm a nih chuan ni 30 chhung hun hawn a ni a, Champhai Town Planning & Development Committee-in a pawm hnuah sawrkar pawmpui turin nakkum January thla chhunga peihfel hman tum a ni, a ti. Champhai District mipui te chu Draft Master Plan 2041 peihfel a, chhawpchhuah a nih hunah lo zirchiang a, rawtna an neihte inthlahrung lova thuneitute hnena thlen turin a sawm a ni.
Champhai District Bawrhsap Maria CT Zuali, Vice Chairman, Champhai Town Planning & Development Committee chuan, Champhai ti changtlung tura Master Plan puahchah mek chu khawpui thangzel tur thlir chunga tih makmawh a ni, a ti a. Theihna sang tak nei District a nih angin thuam thata cheibawl kawnga Minister TJ Lalnuntluanga thahnemngaihna fakawm a tih thu sawiin, nakin zela thangtharte dem hlawh loh nan inrawntawna Champhai tana tha ber tur ngaihtuah a tul a ni, a ti a. Champhai hmel lanna leh hmingthatna leilet phaizawl humhalh kawngah theihtawp chhuah mek zel a ni tih sawiin, khawtlang hruaitu leh District mipui te chu thawhpuiah a sawm a ni.
Deputy Director of Town Planning (UD&PA) Ralthuama Ralte, Member Secretary, Champhai Town Planning & Development Committee chuan Champhai Master Plan siam mek chu mimal hamthatna tur ni lo, a mi chengte nakin zel hun ngaihtuaha siam a ni, a ti a. Khawpui thang zel chuan master plan siam kawngah harsatna a thlen theih avangin a hma thei ang bera peihfel tuma tanlak a ni tih a sawi bawk.
Asst. Director, UD&PA R.Lalhmangaihzuali chuan Champhai Master Plan duan chhin chu powerpoint presentation hmangin a sawifiah a. Master Plan-ah Champhai khawpui leh Town area chhung khawper, satellite town-te khairual taka kaltir tum a ni tih a sawi a. Satellite Development Formation leh Urban Decentralisation-te ngaihpawimawh a ni tih a tarlang bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More