Tun hnaia Airuah surin Champhai zawl a chhiatna a thlen hrang hrangte Law & Judicial Minister TJ Lalnuntluanga,Champhai South Bialtu MLA chuan a hmunah kalin a enfiah.
Pu TJ Lalnuntluanga chuan, tuilianin Champhai leilet zawla harsatna a
thlen te, khuarel leh mihring siam chhiatna thleng thin dangte chu inzir thar nan leh hmasawnna kawng kawhhmuhtu atana hman ni se a duh tih sawiin, pumpelh emaw, tihnep emaw a nih theih nana tanlak a tul thu a sawi a.Sawrkar Department hotute hmalakna fakawm a tih thu sawiin, harsatna awmte ngaihvena a tul anga hma la zel turin a chah bawk a ni.
Pu TJ Lalnuntluanga chuan nimin zing khan ruahsur nasa avanga leiminin Pi Chhuangkimi, Ruantlang Mualvenga te chenna In, Thawhlehni zing dar 7:30 vela chim leh Mualvenga leimin dang awmte chu a tlawh nghal bawk
a. A bial chhung Mualkawi khaw panna World Bank Road atanga khaw chhung
pawhtu kawng leimin avanga harsatna awm leh Lungverh Zau, Zotlanga tuilianin harsatna a thlente a enfiah nghal bawk a ni.
Pu TJ Lalnuntluanga chuan tunhnai ruahsur avanga Champhai leh a chheh vela chhiatna hrang hrang thleng chu pawi a tih thu sawiin harsatna tawk leh tuarte thinlung taka a tawrhpui thu a sawi a. Tanpui ngaite tanpui
leh a tul angte ngaihvena bawhzui vat thintu District Bawrhsap, District thuneitu dangte leh khawtlang hruaitu bakah tlawmngaia chhiat tawkte puitu zawng zawngte inpekna leh hmalakna chu fakawm a ti a. Ralkhat atanga thil thlen dan ngaihven mai aiin a hmun ngeia harsatna thlen dante hmuhpui a hmalak theih dan tur Official leh khawtlang hruaitute sawipui chu a ngaihpawimawh leh tul nia a hriat thu a sawi bawk.
Thawhlehni tlai atangin ruah hi a sur chhunzawm tawh loh avangin Champhai zawla Phai bial chhunga tui tling te pawh a kam tawh hle a, tarlan tawh angin Buhphal tuiin a chim te tih loh chuan buh an thar that a la beisei awm deuh a. Buh la zai hman lo te zingah nimin lam atanga buhzai nghal an awm a, hmun tui hul lama buh phal senghawi hman te pawh buhphal letin an buai hle.
Comments are closed.