Champhai khawpuia Municipal Council din chungchangah nimin khan District Urban Development Officer (DUDO) hovin tlawmngai pawl hrang hrang hruaitute chu an inrawnkhawm.
He hunah hian Champhai DUDO R.Lalnunkimi chuan, District NGO Coordination Committee in Deputy Chief Minister lokal tuma lehkha an thehluh, Champhai Municipal Council din an rawtna bawhzui tur leh, an rawtna hre chiang tura inrawnkhawm an nih thu a sawi a. Municipal siamdan tur kimchang, Directorate-a thehluh turah rawtna awmte sawi hona tur niin, thutawp erawh engmah siam a la ni lo, a ti a. Kalkhawm khawtlang hruaitute chu tuihna humhalh lamah tanlak a tul tih sawiin, thawhpuiah a sawm a ni.
Nimina thukhawm chuan Champhai Municipal Council riruang an duan chhinah ward 11-a then ni se, tiin veng hrang hrang ward-a inthendarh dan tur rawtin, Municipal huam chhung atan hian Champhai Urban Area chu ni se, an ti a.
Vengsang, Kahrawt, Vengthlang, Venglai leh Bethel te chu Ward khat theuha awm tura rawtin, Veng pahnih Vengthlang North leh Hmunhmeltha chu Ward khatah; Veng pathum Kanan, Jail Veng leh Chhungte; Zotlang, Ruantlang leh Mualveng bakah Electric Veng, Zion Veng leh Dinthar te chu Ward khat theuha awm tura rawtin, Veng pahnih Tlangsam leh New Champhai; Vengthar leh Zote chu Ward khata awm turin an rawt bawk.
Kalkhawmte chuan Champhai Municipal Council Office atan CHANEM building chu hman ni se, tiin rawtna an siam bawk a. Sum mamawh turte nen rawtna an siamte hi UD&PA Directorate-ah thawn thlak a ni ang.
Hemi chungchangah hian NGOCC chuan thuchhuah siamin, India Danpui in State leh District khawpui tihhmasawnna tura Ministry of Urban Development in ruahmanna a lo siam tawh, Champhai khawpuia pawh luh ve theihna tur leh an mamawh tualchhunga rela hma an lak ve theihna tura ruahmanna siam saktu sawrkar, UD&PA Deptt. changtu
Tawnluia, Dy. Chief Minister leh UD&PA Deptt. chungah Champhai District NGO Co-ordination Committee chuan lawmthu an sawi a ni.
Comments are closed.