Nimin khan YMA Sub-Hqrs. Champhai chuan an huamchhung atanga MZU in Under Graduate examination 2021 result a tih chhuaha zirlai titha leh, MPSC hnuaia Excise & Narcotics Dept-a inziak tling te chawimawina hun an hmang.
SYMA Champhai Office, Tlangrawta hun hman hi Champhai Bawrhsap Maria CT Zuali chuan khuallian niin a hmanpui a. YMA in kumpuan atan Zirna uar kum an puang chu lawmawm a tih thu sawiin, zirna hi ram leh hnam humhalh kawnga pawimawh ber te zing a mi a ni, a ti. Zirlai hlawhtlinna changte chu a lawmpui thu sawiin, Sawrkar hnathawk tur emaw, sumdawnna leh Kut hnathawka eizawnga hlawhtlinna sang tak emaw chang tura pawimawh ber chu zirna a ni, a ti a. Kan rama ran leh thlaite hlawk zawka kan thar chhuah a, hmasawnpui tak tak tur chuan lehkhathiam leh thil zir peih mi kan nih a ngai tih a sawi.
Champhai khawpui fai leh thianghlim, khaw nuama siam tura zirlai leh thangtharte pawimawhzia sawiin, hnathawhna tur pawisa nei lo mah ila, tha kan neih avangin keimahni leh midangte zirtirtu kan ni thei a ni, a ti a. Bawrhsap chuan zirlaite chu tum mumal tak nei chunga lehkha zir chhunzawm tur leh, an kawngte uluk tlaka thlang tura fuihin duhsakna a hlan a. Kawng dik leh tlo thlang a, awlsam taka hausak ai chuan dik leh rinawm taka sum tlem zawk thawh chhuah thlang fo turin a chah bawk.
C.Laldinthara, BSc Statistics-a pakhatna; Vanlaltlanmawia, Geography Dept-a 4-na, Khamkhanthawnga, Political Science Dept-a 6-na; Lalremruatpuia, Geography Dept-a 7-na; Lalzawmliana Khiangte, Economics Dept-a 7-na; Remthangpuii, BSc Mathematics-a 10-na bakah MPSC hnuaia Inspector,
Excise & Narcotics Dept-a inziak tlinga pakhatna Lalhmingthanga te chawimawina hlan an ni a.
Nimina chawimawi tak te hi SYMA kum puan Sub Committee chuan kawtthler lun laiah an thlalak chuanna poster-an tar dawn a ni.
Zirlai ti thate chawimawina hun hi C.Hrangdawla, Kumpuan Sub Committee Vice Chairman-in a kaihruai a. T.Lalnunsanga, Kumpuan Sub Committee Chairman leh Dr. Lalfakawmi, Secretary ten thu an sawi bawk.
Comments are closed.