ni 2.5.2014 (ningani)
TANPUI NGAITE TAN FEHCHHUAK :
Nimin khan ZO Rimawi International & Champhai Promoters Club te buatsaih, Children In Need Mobile Concert neih a ni Mobile Concert hi Bethel kawn ah hawnna hun hman a ni a.
He hun hi Pu H. Laltlankima President chuan kaihruaiin, Pu Sangdingliana IAS, Champhai DC chu khuallian a ni a, Chairman chuan, Zo- Rimawi International ah hian chibing inthliarna a awm theilo a ni ati a, zofate inpumkhata, tha taka inzawmkhawm tir hi a tum ber a ni a, inhuatna leh inhalna in hmun a chang ve lo a ti.
Khuallian,Champhai District Bawrhsap,Pu Sangdingliana IAS chuan hetiang hun an hmang thei chu lawmawm a tih thu sawi in,tanpui ngaite tanpui hi a Pathian thu a ni tih a sawi a, Zo-Rimawi International leh Champhai District Promoters Club te bakah zaithiam hrang hrang ten mahni tha leh zung, neih sum senga midangte tanpuina atana an nun leh an thiamna an hmang chu lawmawm a tih thu sawiin, mipuite pawh ui hauhlova an neih sumte hlan turin a ngen bawk.
Khualzahawm Pu Jimmy L. Pachuau pawhin thu sawiin, khawvel ram ropui zawkah pawh hlawhtling taka an lo kalpui thin thu a sawi a, midangte tanpui nana kan thil tha tih hi Pathian hriatpui a ni a ti a, malsawmna a min vur let ve ngei a rin thu a sawi. Khualzahawm chuan, Zo rimawi ah hian Pathian kan lamah a tang a, khawvel hriatah kan la inphochhuak dawn a ni a ti bawk
He hunah hian Pu R. Lalrosiama Vice President in inhmelhriattirna a nei a, zaithiam hrang hrang ten zaia mipui awi in tanpuina bawm an dawh bawk a, Bethel kawna hun an hman zawh hian DK traffic Point ah leh Darthangvunga Traffic Point ah hun hmang chhunzawm in,Dawrkaikawnah kharna hun hman a ni
Nizan hmasa khan CCN leh LCN ah Khawngaihna zan hmangin,Live Concert neih a ni a, Live Phone hmangin mipui ten tanpuina an pe a ni. Nizan hmasa leh nimin nilenga concert a hun an hman chhung hian naupang rethei leh chanhai, natna tuar leh chhawmdawl ngaite tan pawisa thahnem tak an dawng a ni.
BIKE CHESUALAH BORAL :
Nizan hmasa dar 7:15 vel khan Zotlang kawng, tuipui lei pelh kawngkawi ah Bike chesualin, a khalhtu a boral.
Kan thudawnna in a sawi danin, he motor hi Hunk, MZ01-E- 1752 a ni a, Zotlang kawng, Tuipui lei pelh kawngkawiah tlanliamin, a khalhtu Malsawmtluanga kum 18, Dokhanpauva (L) fapa, Khawkawn khua, tuna Bethel a khawsa chuan hliam na tak tuarin MED AIM Hospital panpui a nih hnuah a hliam tuar lovin a thi a, a mi phurh erawh chuan hliam na lutuk a tuarlo thung. Malsawmtluanga hi nimin khan Bethel thlanmualah vuiliam a ni
KUMPUAN SUB-COMT. THUKHAWM :
Nimin chawhnu dar 3 khan Vengthlang North YMA In – ah,Sub Hqrs YMA hnuaia Kumpuan Sub Committee te chuan an hmalakna tur relin meeting pawimawh tak an nei He hun hi Pu H. Laltuliana Chairman,Kumpuan Sub committee chuan kaihruaiin, hma thar la tur kan ni a, kan tha leh zung bakah kan rilru tak tak kan pe tur a ni a ti a, Kumpuan Sub Committee hi kum 2 dawn din a lo nih tawhloh avangin,tunah hian hma thar la turin kan rilru kan inbuatsaih tur a ni a ti bawk, he Meeting ah hian an hmalak dan tur hrang hrangte an chhawpchhuak a ni.
MZP TE THUKHAWM :
Nimin chawhnu dar 4 khan MZP Hqrs,Champhai te chuan President Remnalalnghaka inah meeting pawimawh tak an nei
MZP chuan tunlaia sualna lo pung ta thut te, zirlai naupangte zinga zu leh ruihhlo bakah,mipat hmeichhiatna a hluar ta chu ngaimawhawm an tih thu an sawi a, hemi avang hian thuneitute nena tangkawpin, dan leh hrai bakah, zu leh ruihhlo hluar ta lutuk te, mipat hmeichhiatna laka zirlai naupangte an lo him zawk theihna tura inzirtirna neih nise an tih angin nimin khan ruahmanna an siam a, karleh zirtawp ni May ni 9 hian zirlai naupang huap Awareness Campaign neih nise, he Awareness Campaign ah hian,mipat hmeichhiatna chungchanga dan leh hrai te, thuneituten thiltisualtu te chunga dan an lekkawh dan leh thil tisuallo humhim an nih theih dan te bakah,sualna chi hrang hrang laka zirlai naupangte an him zawk theihna tura zirtirna pek nise an ti a ni.
TUIALHTHEI DINHMUN :
MIZOFED : (6:00 AM – 7:00 PM)
Petrol : Free Sale (Rs. 70.39)
Diesel : Free Sale (Rs. 54.88)
ni 1.5.2014 (ningani)
RUIHHLO MAN :
Mizoram Excise, Anti Narcotics Squad te chuan nimin zing dar 6:15 khan Seling ah Heroin gram 70 an man a, a neitua puh Vanlalrinsanga kum 20 Zokhawthar a cheng ni a insawi pawh an man nghal a. Heroin hi sahbawn bawm 4 leh plastoc bur 1 ah dah a ni a, Vanlalrinsanga hian a Maxi Cab ah phurin Aizawl lama tihral a tum niin a sawi.
VOLLEYBALL INELNA :
Nimin khan Tlangsam Lal Thanghlianga Memorial Volleyball Tournament chu Tlangsam ah khelh tan a ni a. Nimin khan Football lam chu chawlhsan rih niin, vawiin atang hian quarter final khelh zui veleh a ni ang.
MFA CUP SAWN :
Tunkar Thawhlehni a MFA Executive Comt. Emergency Meeting chuan tun thlaa Champhai a MFA Cup khleh tur chu a hun an sawn hla veleh ta a, season thar lamah Champhai ah vek hian khelh turin a rel.
DOCTOR DUTY :
Champhai Hospital OPD ah Dr. Janet Zoremnghaki, Pathologist chu a hnuaia mi ang hian a thu thin a, amah rawn duh tan pan theih a ni. OPD-ah Thawhlehni, Ningani leh Zirtawpni ah te thuin Thawhtanni, Nilaini leh Inrinni ah te Laboratory lamah a thu thung ang.
RAM CHUNGCHANG SAWI HO :
Ni 29.4.2014 (Thawhlehni) chawhnu dar 2 khan Sub Hqrs YMA Office ah Sub Hqrs YMA hnuaia Land & Building Sub Committee te leh Champhai District Badminton Assn te chuan Joint Meeting pawimawh tak an nei
He hun hi Pu VL Chama Hnamte President Sub Hqrs YMA leh Land & building Sub Committee Chairman ni bawk chuan kaihhruaiin, Town Hall cheithat leh enkawl chungchang an ngaihtuahho a, tun hnaia hmalakna tur Tui Connection chungchang sawihoin, Sub Hqrs YMA hminga Tui connection hi dil nise an ti. Hei bakah hian Meeting chuan tuna Town Hall enkawl leh cheitu ber Badminton Assn te hmachhawp leh tihtur hrang hrang an neihte an sawikhawm a, Sub Hqrs YMA te chu a neitu nihna chelhtu an nih angin Badminton Assn te pawhin Town Hall chei leh hemi atana Fund hrang hrang an dil te chu Sub Hqrs YMA hnenah hrilh hriat ve zel nise an ti a, Sub Hqrs YMA pawhin theihtawpchhuaha Hall cheithat a nih ngei theihna tura hmalakpui an inhuam thu an sawi.
Ni 29.4.2014 (Thawhlehni) meeting ah hian Memberte chuan pawl hrang hrang kan tan tlan a tul a ni an ti a, Lunglei tihdan tia sawichhawng reng lova, an tihdan a tha lama copy zel kan tum a ngai a ni an ti a, engpawh ti dawn ila, Champhai mipui bakah Assn hrang hrangte tang tlang lehzual ila, Champhai hian hma a sawn zawk dawn a ni an ti. Ni 29.4.2014 (Thawhlehni) meeting ah hian Sub Hqrs YMA hnuaia Land & Building Sub Committee member te leh Champhai District Badminton Assn hruaitute an kal tha hle
DMS THLAH:
Ni 29.4.2014 (Thawhlehni) tlai 1:30 khan Dr. Lalbiaktluangi Medical Superintendent thlahna hun Eye Ward-ah hman a ni. Dr. Lalbiaktluangi DMS Champhai Civil Hospital superintendent thlahna hun hi Dr. C.Vanlalhlua’n a kaihruai a. Dr. C.Vanlalhlua chuan thusawiin, Tute pawh in roreltu kan chunga awm kan nei theuh a, roreltute thu in kan awm tur a ni a, engtikah emaw chuan keini ho pawh hmun dangah kan thawh ala ngai anga, chutiang hunah pawh chuan khawihmunah pawh awm ila, Pathian thu anga roreltu te thu anga awm theuh turin kal khawm te a fuih a ni.
He hun-ah hian Dr.J Lalramchhuanga Asst Secretary,Staff Welfare chuan thlahna thusawiin “Champhai a a thawh chhungin thahnem ngai takin a thawk a ni tih kan hmu a, Kan chunga Lal tak ang a awm lova, thian anga kan kawm thei hi a ropui kan ti a, ni 29.4.2014 (Thawhlehni)ah min lo kalsan atul ta a, Champhai a a awm hun hi ni 29.4.2014 (Thawhlehni)ah lo tawp dawn mahsela, rawngbawlna thar zawk, rilru thar nen a rawngbawlna a tan tha leh dawn a ni tiin a sawi a. thahnemngai tak a a rawngbawlhna leh a eizawnna ni bawk chu hlen chho zel turin duhsak na a hlan a, a awm na hmun apiangah Doctor tha, mite ngainat ni zel turin a chah bawk a ni. Dr.Lalbiaktluangi Eye Specialist hi July 30,2010 ah champhai ah rawn thawk tan a, june 14, 2013 atangin DMS charge ala tan a ni. Tunah hian Kolosib District a transfer a ni.
MZP IN LEHKHATHAWN DAWN :
Ni 29.4.2014 (Thawhlehni) khan MZP Champhai Headquarters te chuan Health & Family Welfare Minister Pu Lalthanzara hnenah Champhai District Hospital Medical Superintendent Dr. Lalbiaktluangi sawn anih loh nan lehkha an thawn MZP Champhai Headquarters chuan Dr. Lalbiaktluangi Eye Specialist, Medical Superintendent ni bawk sawnchhuah anih chungchangah Champhai hmasawnna ngaihtuah a sawnlo turin Health & Family Welfare Minister hi lehkha an thawn a, tuna rawn awm tur hi kohhran rawngbawltu nupui a nih avangin kum 2/3 hnuah a chhuah leh a ngai dawn a, a awmsa leh inbengbel sa sawnchhuak tura hmalak a ni chu pawi an tih thu an lehkha ah chuan an ziaktel a, hemi chungchanga hmalatu te chu a tawp thlenga an thlawp tur thu pawh an sawitel bawk a ni.
Hetihlai hian Champhai Thalai Pawl leh NGO Co-ordination te chuan lehkha an lo thehlut ve tawh bawk.
TUIALHTHEI DINHMUN :
MIZOFED : (6:00 AM – 7:00 PM)
Petrol : Free Sale (Rs. 70.39)
Diesel : Free Sale (Rs. 54.88)
ni 29.4.2014 (thawhlehni)
CHAMPHAI TOWN HALL ENKAWLTU TUR NGAIHTUAH :
Nimin chawhnu khan Sub-Hqrs. YMA Office, Tlangrawtah Sub-Hqrs. YMA Land & Building Sub-Comt. an thukhawm. He Meeting Pu VL Chama Hnamte Land & Building Sub-Committee Chairman kaihhruaiah hian Champhai District Badminton Association atanga lehkha lut Town Hall enkawl chungchang ngun taka ngaihtuah a ni a, Meeting chuan CDBA te nen Jt. Meeting neih nise an ti a, he hunah hian thil engkim uluk zawka sawiho nise an ti bawk. Hei bakah hian Meeting chuan Jt. YMA leh Group YMA hminga YMA ram lo awm tawhte chu Sub-Hqrs. YMA hminga thlak vek nise an ti a, Sub-Hqrs. YMA in ram a neih ang angte tun aia thaa humhlah chhunzawm nise an ti bawk a, remchang hmasa berah hmalak nise an ti.
JNV A LUT DUH TAN :
JNV School Khawzawl a kumin session a Class 9 a lut duh tan DEO Office ah leh JNV School ah te Application Form lak theih a ni a, ni 30.5.2014 aia tlai lovah application form hi thehluh leh tur a ni. Ni 22.6.2014 ah JNV Khawzawl ah Entrance Exam neih tur a ni a, hrechiang duh tan DEO Office emaw Principal KNV ah te zawhfiah theih a ni.
DAWR RAWK :
Inrinni zan khan Pi Vanlalsangi Dawr, Awmpui Venga mi chu misual tu tih hriat lohten an rawk. He dawr hi a kawngka karchhiain misualte hi an lut a, dawr bungrua engemawzat an la a ni. Champhai POlice Station ah FIR thehlut niin dawr rawktu hi ngawrh taka zawn a ni. Tunlai hian Champhai leh a chheh velah In rawk leh thil bo a tam hle a, damdawi ti an tam poh leh thil bo a tam niin a lang a, zan lam duty kan mamawh ve ta niin a lang.
DVO AIZAWLAH :
DVO Pu H. Laltlanmawia chu Aizawlah cham mekin naktukah Department Meeting an neih hunah telin Zirtawpnia NLUP chungchanga meeting pawimawhah a tel leh ang a, Inrinni ah Champhai a lo thlen leh beisei a ni.
THLAH DAWN :
Vawiin hian Hospital Staff te chuan Medical Superintendent Kolasib a insawn chhuak tur Dr. Lalbiaktluangi, Eye Specialist chu thlahna hun an hmang dawn a. A aiawh tur hian Dr. Lalnuntluangi, Eye Specialist vek rawn dah a ni dawn niin thu dawn a ni.
LAL THANGHLIANGA MEMORIAL FOOTBALL :
Nimin khan Lal Thanghlianga Memorial Football TOurnament chu Round of 16 khelh tan a ni.
Venglai 0-0 Vengthlang North (Venglai 4-2 in penalty ah chak)
Melbuk 2-6 Friends United
Electric Veng 1-1 Zotlang II (Electric 6-5 in penalty ah chak)
Hmunhmeltha 1-2 Dilkawn
Vawiin inkhel tu :
Zotlang I Vrs Vengthlang
Vengsang Vrs Vengthar
Tlangsam II Vrs Bethel
Kanan Vrs Zokhawthar
DOCTOR DUTY DAN TUR :
Vawiin Champhai District Hospital a Doctor te Duty dan tur hetiang hi a ni :
OPD ah : Dr. J. Lalramchhuanga, Medicine Specialist; Dr. Zodinthara, MO; Dr Lalduhawma, Gynaecologist; Dr Thangsailova Colney leh Dr Lalbiaktluangi
OT ah : Dr. C. Vanlalhlua, Surgeon; Ultra Sound ah Dr. LT Lawta, MO
TUIALHTHEI DINHMUN :
MIZOFED : (6:00 AM – 7:00 PM)
Petrol : Free Sale (Rs. 70.39)
Diesel : Tanky Full (Rs. 54.88)
ni 28.4.2014 (thawhtanni)
MFA CUP SAWN :
May chawlhkar hnihnaa MFA Cup 2014, Champhai in kan thlen tur chu MFA in thuneihna a pek angin nimina CDFA Executive Committee, an President Pu C. Hualrikhuma Ina thukhawm chuan May ni 20 atanga khelhtan turin an rel. MFA Cup hi MFA Calendar ang chuan May chawlhkar hnihna atanga khelh tura tih a ni a, mahse a khelhna hmun tur Chhangphut Field a Grass phah mek chu peihfel hman a nih dawn loh avangin MFA chuan CDFA hruaitute chu an inpeih hun huna buatsaih mai turin a rawn hrilh ta a ni.
Chhangphut Field a Grass phahna tur hna kal lai mek hi a enkawltu Lushai Engineering Ltd. chuan Field zahve Grass phah turin vawiin hian an peihfel hman beisei a ni a, karlehah a zahve dang pawh peihfel hman in Grass phahtu tur Italian Company Lamonta pawh karleh khian Champhai an rawn thlen hman beisei a n ibawk.
DOCTOR DUTY :
Vawiina Champhai Civil Hospital Doctor te Duty dan tur chu OPD ah Dr. J. Lalramchhuanga, Dr. C. Vanlalhlua, Dr. Zodinthara, Dr. LT Lawta, Dr. Lalbiaktluangi leh Dr. Thangsailova Colney te an thu ang a; OT ah Dr. B. Lalduhawma a thu bawk ang.
PASS LAWM DAWN :
Govt. Hnahlan HS chuan kumin HSLC result tihchhuah taka an School atanga zielai an pass kim vek lawmna hun vawiin hian ruai nen ropui takin an lawm dawn.
THANGHLIANGA MEMORIAL :
Inrinni khan Group March khelh zawh a ni a, inkhel result chu :
Vengsang 2-0 Vengthlang
Zotlang I 2-1 Vengthar
Zote II 0-5 Zokhawthar
Tlangsam I 0-1 Hmunhmeltha
Vawiin atangin Round of 16 khelh a ni dawn a, chawhma dar 10 ah inkhel tan leh tur a ni. Inkhel turte : Venglai Vrs Vengthlang North; Melbuk Vrs Friends Utd. Hnahlan; Electric Veng Vrs Zotlang II; Hmunhmeltha Vrs Dilkawn
TUIALHTHEI DINHMUN :
MIZOFED : (6:00 AM – 7:00 PM)
Petrol : Free Sale (Rs. 70.39)
Diesel : Tanky Full (Rs. 54.88)
champhai tualchhung chanchin
Comments are closed.