CHAMPHAI ṬHALAI PAWL CHAMPHAI MIPUI TAN:
Champhai leh Khawzawl inkar kawng chhe lutuk chungchangah Mizoram Sawrkarin sum awmlo chungin mipuite harsatna hriain kawng chhe zual an siam mek a min siam sak hi lawmawm an ti takzet a. Fur hmaa kawng pangngai tak neih tuma hmalak mek a nih lai hian hmun thenkhatah Contractor te inthlahdah avangin duhthusam loh lai a awm hi pawi an ti takzet a.
Champhai Ṭhalai Pawl te chuan an siam ang chhun chhun uluk leh tha taka thawk turin hemi changtu Dept. PWD National Highway Division hnenah ziakin an thlen. Dept. lam pawhin a chhe zual lai hi siam that tir nghal a ni.
Tunah hian Champhai to Khawzawl kawng siam thatna (Full Resurface) tur sum hi Central Sawrkar atangin hmuh a ni tawh a, tendar chhuah mek a ni.
SAMETI TEN CHAMPHAIAH HUN HMANG :
Nimin khan SAMETI, Mizoram Aizawl in Resource Institute atan thlan an nih angin, Mission Organic Mizoram hnuaia FPO te tan capacity building workshop, I&PR Conference Hall Champhai ah buatsaih a ni.
He programme hi Vala T.Tonsan, Faculty (IT) SAMETI, Mizoram-in a kaihruai a. SAMETI Director, RK Nithanga’n hawnna thu a sawi a, sawhthing chin dan leh enkawl dante sawifiah in, FPO te fuihna leh Mission hmathlir leh thu bengvar thlak tak tak te a sawi bawk. Ginger FPO leh Bird Eye chilli FP0 hruaitute hnen atangin report kimchang ngaihthlak a ni a, SAMETI Faculty lamin zirtirna an pe a ni. He workshop ah hian FP0, Ginger leh Mizo Chilli Champhai leh Khawbung Block atangin mi 40 an tel thei a ni.
MNF SOUTH BLOCK IN LAWMPUI :
Nimin khan Champhai South Block MNF chuan Executive Meeting an nei.
He hun hi Bethel Chhura Hmun Hall-ah R.Thangseia, Block President kaihhruai-a neih niin Congress sawrkar laia NLUP dawng duh lo, MNF a rinawm taka awm te leh MNF a sawrkar theihna atana tha tam tak sengtute’n hriat reng an phu tih a sawi a. He meeting-ah hian MP inthlan neih zawh tak thlirlet niin Champhai South Block bikah Vote 1439 a hnehna an chang thei chu lawmawm an tih thu tarlan a ni a. Champhai South Block huam chhunga HSLC leh HSSLC result chhuak ta a pass te lawmpuina thilpek hlan an kalpui mek chu chhunzawm dan tur te an sawiho a. June ni 11 a MNF thuneitu sangber National Executive Committee neih tura Agenda an thawh turte sawihoin hun an hmang a ni.
He hunah hian MP inthlan neih zawh taka VC Area anga hnehna chang sang bik 3 te hnenah lawmman pawisa fai hlan an ni a. Melbuk Unit in pakhatna la in Cheng Sing 3 an dawng a, Zokhawthar Unit in dawtin Cheng Sing 2 dawngin, Tuipui Unit te chu pathumna niin Cheng Sing 1 an dawng bawk a ni.
Hetihlai hian tukinah TJ Lalnuntluanga, Minister chuan Champhai a rawn thleng dawn a, chhun dar 12 ah zirlai titha te chawimawina hun MZP buatsaiha neih turah a telpui ang a, a bial a fan chhunzawm nghal dawn a ni.
KHAWZAWL GROUP YMA IN HMALAK NASAT TUM :
Khawzawl Group YMA Conference vawi 32-na, Khawzawl Vengthar YMA Hall-a neih, niminpiah khan rorel inkhawm neih a ni a, nizan khan a tiak.
Rorel palai te thu pass žingah hian Khawzawl Damdawi In Compound chhungah Group YMA hmingin khualbuk sak ni rawh se tih te, ramngaw leh nungcha humhalhna kawngah chak zawka hmalak a nih theihnan Awareness tam zawk neih dan zawn ni rawh se tih te, 2021 YMA Gen. Conference Khawzawl Group YMA in Khawzawlah thlen dil rawh se tih te, Tualte to Bungzung Road a tlang ngei theihnan Group YMA in hma la zui rawh se-tih te, PHE tuilak a thianghlimna atan Khawzawlah tui Filter lian dah a nih theihnan Group YMA in hma la rawh se; Sub-Hqrs.huam chhungah ruihhlo do chak zawka kalpui thei turin Sub-Hqrs. in hma la rawh se;
ILP pek chhuah a nihin Sponsor tute address kimchang leh contact no. tarlan a nih theihnan Central YMA in hma la rawh se tih te a tel.
FOCUS MEETING :
Vawiin chawhma dar 10:30 hian Venglai Community Hall-ah District level consultation meeting, FOCUS Champhai District neih a ni dawn a. Champhai North bialtu MLA Dr ZR Thiamsanga chuan khuallian a ni ang a, Lengteng bialtu MLA L.Thangmawia chu khual zahawm a ni ang.
SCHOOL MINISTER LOKAL DAWN :
School Education Minister Lalchhandama Ralte chuan karleh Thawhtanni-a Champhai HSS building thar hawng turin Thawhtanni zingah Aizawl atangin Champhai a rawn pan ang a, chawhnu dar 1:00 ah school building thar hi ahawng ang.
Thawhtanni zan Champhai-ah riakin, Thawhlehni zingah Farkawn HSS Crystal Jubilee lawmna hun hmanpui turin Farkawn a pan ang a, Farkawnah a riak ang. Nilaini zingah Khawbung a pan leh ang a, Khawbung HSS Tin Jubilee lawmna a hmanpui ang a, Khawbungah riakin, Ningani zingah Aizawl lamah a kir thla leh ang. Minister hi East Tuipui bialtu MLA Ramthanmawia leh
C.Lalmuanpuia, MLA bakah School Education deptt lama hotuten an rawn tawiawm ang,
ZU KHAP HNUAH THUBUAI PATHUM SIAM SAK TAWH :
Mizoram Sawrkar in zu khapna dan thar Mizoram Liquor (Prohibition) Act ’19 a hman tan leh hnuah nimin khan he dan hmanga thubuai siam hmasak ber, zu neitu nia puh chu Jail-ah dah luh a ni a.
Hemi ruala thubuai siamsak ve tho, zurui pahnihte chu pawisa chawitir an ni Champhai District ah MLP Act ’19 hmang hian mi 3 thubuai siamsak an ni tawh tih thu kan dawng. MLPC Act hman tirh khan Champhai District a thubuai siamsak hmasak ber chu vantlang hmun tihfai tir alo ni tawh bawk.
Comments are closed.